އައްޑޫ ރައްޔިތުންގެ އަބަދުގެވެސް އެންމެ ބޮޑު ޝަކުވާއަކީ އެކަށީގެންވާ ރަނގަޅު ފެންވަރުގެ ސިއްހީ ފަރުވާ މިސިޓީން ލިބެން ނެތުމުގެ ޝަކުވާއެވެ.
ސަރުކާރުން ހިންގަމުން އަންނަ ރިޖަނަލް ހޮސްޕިޓަލް އަކާއި، އަމިއްލަ ފަރާތަކުން ހިންގަމުން އަންނަ ހޮސްޕިޓަލެއް އައްޑޫގައި ހުރިއެއް ކަމަކު ކިރިއާވެސް ބައްޔެއް ވާއިރަށް ފަރުވާ ނުލިބިގެން ފުރައިގެން ދާންޖެހެނީ އީކުއޭޓާރ ހުރަސްކޮށް އުތުރުން ކޮންމެވެސް ތަނަކަށެވެ.
މިހާރުން މިހާރަށް ބަލާއިރު ވެސް ހިތަދޫ ރީޖަނަލް ހޮސްޕިޓަލްގައި ގިނަ ބަލިތަކާއި ބެހޭ ޑޮކްޓަރުންނެއް ނެތެވެ. މިވަގުތުވެސް، އޮޕަރޭޝަން، ކަރުންމަތީގެ ބަލިތައް، އަދި އެތެރެ ހަށީގެ ބަލިތަކާއި ބެހޭ ޑޮކްޓަރުންނެއް ނެތެވެ. ހުރި ހަމައެކަނި ކުޑަކުދިންގެ ޑޮކްޓަރުވެސް އެމަޖެންސީއެއްގައި ދިހަ ދުވަހުގެ ޗުއްޓީއަކަށް މިއަދު ހިނގައްޖެއެވެ.
އަންހެނުނުން ގެ ޑޮކްޓަރަކަށް ހުރި މީހާ އަކީ އެއްވެސް މީހަކަށް އިތުބާރު ކުރެވޭ ފެންވަރެއްގެ މީހެއް ނޫނެވެ. މި ޑޮކްޓަރުގެ ފަރުވާ ކުޑަކަމުން ދާދި ފަހުން ފޭދޫ އަންހެނެއް ގެ ރަހިމުވެސް ވަނީ ނަގާފައެވެ. އަދި އެ އަންހެން މީހާ މިހާރު ވަނީ އިތުރު ފަރުވާ ދިނުމަށް އިންޑިޔާ އަށް ގެންގޮސްފައެވެ. އައްޑޫސިޓީ އިން މީހަކު ވިއްސަން ޖެހިއްޖެނަމަ ގެންދަން ޖެހެނީ ކަންނެލި ދޯންނެއްގައި ފުވައްމުލަކަށް ނޫނީ ތިނަދޫއަށެވެ.
މާލެ ފިޔަވައި ރާއްޖޭގެ އެންމެ ބޮޑު އާބާދީއެއް އޮތް އައްޑޫގައި އެންމެ ދެތިން ހަތަރު ޑޮކްޓަރުން ތިބުމަކީ ޤަބޫލު ކުރެވޭނެ ކަމެއް ނޫނެވެ. އެއިން ޑޮކްޓަރަކު ބަލިވެއްޖެނަމަ، ނޫނީ ޗުއްޓީއެއް ނަގައިފިނަމަ ދެން އައްޑޫ ރައްޔިތުން ތިބެންޖެހެނީ ހަދާނެ ގޮތް ހުސްވެފައެވެ. މިހުރިހާ ކަމެއް މިހެންވާއިރުވެސް ސިއްހަތާޢި ބެހޭ ވުޒާރާއިން މިކަމަކާ މާބޮޑު ފަރުވާލެއް ބަހައްޓާހެން ހިއެއްނުވެއެވެ. ކުޑަވެސް ފަރުވާލެއް ހުރިނަމަ، ޕްރޮފެޝަނަލް މިންގަޑުތަކާއި ހިލާފަށް އަމަލު ކުރާ ޑޮކްޓަރުންނާއި މެދު ފިޔަވަޅު އަޅާނެއެވެ.
7 ފެބްރުައަރީގައި ސަރުކާރު ބަދަލުވުމަށްފަހު އެންމެ ފުރަތަމަވެސް ކުރި ކަމަކީ ކުރީގެ ސަރުކާރުން ހަދާފައިވާ ހެލްތު ކޯރޕަރޭޝަންތަށް އުވާލުމެވެ. އަދި މި ކޯރޕަރޭޝަންތަކުގެ ސަބަބުން ކުރެވޭ ބޭކާރު ހަރަދުތަކާއި ލިބޭ ގެއްލުންތަކުގެ ވާހަކަ ސިއްހަތާއި ބެހޭ ވަޒީރު ދެއްކެވިއެވެ. ހުރިހާ ހޮސްޕިޓަލްތައް ސީދާ މިިނިސްޓްރީގެ ބެލުމުގެ ދަށުން ހިންގުމުން ލިބޭނެ ފައިދާ ތަކުގެ ވާހަކަވެސް ދެއްކިއެވެ.
މިގޮތުން އެއް ހޮސްޕިޓަލަށް ޑޮކްޓަރުންގެ "ޝޯރޓްއޭޖެއް" އަންނަ ވަގުތު އަނެއް ހޮސްޕިޓަލުން އެތަނަށް ޑޮކްޓަރުން ފޮނުވޭނެ ވާހަކަވެސް ވިދާޅުވިއެވެ. އެކަމަކު މިއަދާއި ޖެހެންދެން ވެސް މިބުނާ ފަސޭހަތަކެއް ލިބޭ ތަނެއް ނުފެނެއެވެ. ދާދި މިދާކަށް ދުވަހުވެސް އައްޑޫސިޓީގެ މިބުނި ފަދަ "ޝޯރޓޭޖެއް" ކުރިމަތިވެގެން ފުވައްމުލަކުގައި ހުރި ޑޮކްޓަރު ގެންނަން މަސައްކަތް ކުރުމުން ޑޮކްޓަރު ވަނީ އައްޑޫއަށް އައުމަށް ދެކޮޅު ހަދާފައިއެވެ. އަދި އެކަމާ ގުޅިގެން އެ ޑޮކްޓަރާއި މެދު ފިޔަވަޅެއްވެސް ނާޅައެވެ.
ދެން ހޮސްޕިޓަލަށް ދިމާވެފައިވާ އެންމެ ބޮޑު މައްސަލައަކީ ފެންވަރު ރަނގަޅު މެޝިނަރީސް ނެތުމުގެ މައްސަލައެވެ. ވަރަށް އާދައިގެ ޓެސްޓުތަށް ވެސް ގިނަފަހަރު ހޮސްޕިޓަލުން ނެހެދެއެވެ. އާދައިގެ ސްކޭން އެއް ކޮށްލަން މާލެ ދާން ޖެހޭ ފަހަރު އާދެއެެވެ. ސާރކް ސަމިޓަށް ގެނައި ބަދަލުތަކެއް ފިޔަވައި އެ ހޮސްޕިޓަލް ހެދި ފަހުން އެތަނަށް މާ ބޮޑު ބަދަލެއް އައިސްފައެއް ނުވެއެވެ.
މީގެ 10 އަހަރު ކުރިންވެސް މިތަން ހުރީ މިގޮތަކަށެވެ. އިމާރާތައް ގެނައި ބަދަލެއް ގެނައީ މިދިޔަ ސަރުކާރުންނެވެ. ނަސީބަކަށް ރަނގަޅު ފެންވަރެއްގެ އެމްބިއުލާންސެއް އޮވެއެވެ. އެކަމަކު އަދިވެސް ތަމްރީން ލިބިފައި ތިބި ޕެރަމެޑިކުންނެއް ނެތެވެ.
ކަންތައް މިހެން ހުރި އިރު މިކަމާ އަޅާލާ މީހަކު އެބަހުރި ހެއްޔެވެ؟ ހޮސްޕިޓަލްގެ މެނޭޖްމެންޓެއްވެސް އޮވެއެވެ. ހެލްތު މިނިސްޓްރީ އެއްވެސް އެބަ އޮތެވެ. ފޭސްބުކްގައި މޮޅު ވާހަކަ ދެއްކުން ނޫން ކަމެއް މި މެނޭޖްމެންޓްގެ ބައެއް މީހުންނަކަށް ނުވެއެވެ.
ކޮނެމެ ގޮތެއް ވިޔަސް މިހާރުން މިހާރަށް ހިތަދޫ ހޮސްޕިޓަލަށް ވަނީ ކުއްލި ފަރުވާ ބޭނުން ވެފައިއެވެ.