އައްޑޫގެ ޕަބްލިކް ހެލްތު ދާއިރާ އަށް 38 އަހަރު ހިދުމަތް ކުރެއްވުމަށް ފަހު، މަރިޔަމް ޝަކީބާ މިއަދު ރިޓަޔާ ކުރައްވާނެ އެވެ.
އުމުރުން 23 އަހަރުގައި ހިދުމަތަށް ނުކުންނެވި ގޮތަށް ފޭދޫ ކަރަންކާގޭ ޝަކީބާ ވަނީ އާންމު ސިއްހީ ހެލްތު ދާއިރާގައި މެދުކެނޑުމެއް ނެތި ހިދުމަތް އިހުލާސްތެރި ހިދުމަތްތަކެއް ކުރައްވައިފަ އެވެ.
ޅަ އުމުރުގައި ފެއްޓެވި މަސައްކަތުން މުސްކުޅި ކުރައްވައި މިއަދު އޭނާ މަގާމުން ރިޓަޔާ ކުރައްވާ އިރު، ޝަކީބާ ވިދާޅުވީ ފާއިތުވި މި ދިގު މުއްދަތުގެ ތެރޭގައި ލިބިވަޑައިގެންނެވި އެންމެ ބޮޑު ހިތްހަމަޖެހުމަކީ ވެސް މެދުކެނޑުމެއް ނެތި، ދެ ގޮތެއް ނުވެ ހިދުމަތުގައި ދެމިހުންނެވުން ކަމަށެވެ. އަދި އެހާ ގިނަ ދުވަހު މި ދާއިރާގައި މަަސައްކަތް ކުރެއްވުނީ މަސައްކަތަށް ހިތުގައި އޮތް ލޯތްބާއި، ޝައުގުވެރި ކަމެއްގެ ބޮޑު ކަމުން ކަމަށް އަށް ދަރިންނާއި ނުވަ މާމަ ދަރިން ވެސް ތިބި ޝަކީބާ ވިދާޅުވި އެވެ.
އޭނާ އިތުރަށް ވިދާޅުވީ މި މަސައްކަތުގައި އެހާ ދިގު މުއްދަކަށް "ބްރޭކެއް ނެތި" ދެމިހުންނެވުމުގެ މައިގަނޑު އެންމެ ބޮޑު އަސްލަކީ އާއިލާ އިން ދެއްވި އެއްްބާރުލެއްވުން ކަމަށެވެ.
"ވަރަށް ދެރަވޭ މިހާ ގިނަ ދުވަހު މި ދާއިރާގައި މަސައްކަތްކޮށްފައި، ދުރަށް ދާން ޖެހޭތީ. ވަރަށް ހިތްދަތި އިހުސާސެއް ކުރެވެނީ،" ފޭދޫ ސިއްހީ މަރުކަޒުގެ ޕަބްލިކް ހެލްތު ޔުނިޓްގައި އިންނަވައިގެން "އައްޑޫ ލައިވް" އަށް ޝަކީބާ ވިދާޅުވި އެވެ. "މި ދާއިރާ އިން ރަސްމީކޮށް އަޅުގަނޑު ދުރަށް ދިޔަސް، ހިތް އަބަދު ވެސް އޮންނާނީ މި ދާއިރާ އާ ގުޅިފައި. ކޮންމެ ވަގުތެއްގައި އަޅުގަނޑަަށް ގޮވާލިޔަސް، އެހީތެރިކަން ފޯރުކޮށް ދެވޭ ހިސާބެއްގައި އަޅުގަނޑު ހުންނާނީ."
ޝަކީބާ އިތުރަށް ވިދާޅުވީ އެތައް ބަޔަކާ އެކު އެތައް ދުވަހެއް ވަންދެން މަސައްކަތް ކުރައްވާފައި ގެއަށް ވަޑައިގަންނަވަން ޖެހުމަކީ، އެކުގައި މަސައްކަތް ކުރެއްްވި ހުރިހާ މުވައްޒަފުންގެ "ވަރަށް މިސްވާނެ ކަމެއް" ކަމަށެެވެ.
"އެކުގައި މަސައްކަތް ކުރި އެންމެންގެ މަތިން އަބަދުވެސް އަޅުގަނޑު ހަނދާން ހުންނާނެ. އަޅުގަނޑު ދަންނަވާނީ އެކުގައި އެންމެ ފަހު ދުވަހާ ހަމައަށް މަސައްކަތް ކުރަން ތިބި ހުރިހާ މުވައްޒަފުން ވެސް މި ދާއިރާ ދޫކޮށްފައި ނުދާށޭ. ހިދުމަތުގައި ދެމި ތިބޭށޭ ޝައުގުވެރިކަމާ އެކު. މިއާ އިންސާނިއްޔަތަށް ދެވޭ އަގުހުރި އިޖުތިމާއި ބޮޑު ހިދުމަތެއް،" ފޭދޫ ރަށް ކުރިއަރުވާ ކޮމިޓީގައި ވެސް ކުރިން ވަރަށް އިސް ދައުރެއް، ދިގު މުއްދަތަކަށް އަދާ ކުރެއްވި ޝަކީބާ ވިދާޅުވި އެވެ. "އަޅުގަނޑު ވަރަށް ދެކެން ބޭނުންވި ދުވަހެއް ރާއްޖޭގެ ސިއްހީ ދާއިރާ އަށް މިހާރަށް ވުރެ ހެޔޮ ބަދަލުތަކެއް އައިސްފައި އޮންނަ ދުވަހެއް ދުށުމަކީ."
ޝަކީބާ ޕަބްލިކް ހެލްތު ދާއިރާ އަށް ކޮށް ދެއްވި ހިދުމަތްތަކުގެ އަގު ސަރުކާރުން ވެސް ވަނީ ވަޒަންކޮށްފަ އެވެ. ސިއްހީ ދާއިރާ އިން އާންމު ހިދުމަތުގެ އިނާމް ޝަކީބާ އަށް ވަނީ 1991 ވަނަ އަހަރު ލިބިވަޑައިގެންފަ އެވެ.
އެކަން އޭނާ ސިފަ ކުރައްވަނީ މިހާތަނަށް ލިބިވަޑައިގެންނެވި އެންމެ ބޮޑު އުފާގެ ގޮތުގަ އެވެ.
"އަޅުގަނޑުގެ މަސައްކަތުގެ އަގު ސަރުކާރުން ވަޒަންކޮށް އަޅުގަނޑަށް އާންމު ހިދުމަތުގެ އިނާމް ލިބުނު ދުވަހަކީ އެންމެ އުފާވި ދުވަސް." 2011 ވަނަ އަހަރު ގާރީ ކޯހުގެ ސެޓްފިކެޓް ލެވެލް 3 ވެސް ހާސިލް ކުރައްވާފައިވާ ޝަކީބާ ވިދާޅުވި އެވެ.
މީގެ އިތުރުން 1988-1998 ވަނަ އަހަރާ ހަމައަށް ސިއްހީ ދާއިރާ އިން އެންމެ ފާހަގަކޮށްލެވޭ 10 މީހުންގެ ތެރޭގައި ހިމެނިވަޑައިގެން ސަރުކާރުން ދެއްވާ އައްޑަނަ ވެސް އޭނާ ވަނީ ހާސިލް ކުރައްވައިފަ އެވެ.
ޓީވީއެމް އިން 2008 ވަނަ އަހަރު ގެނެސް ދިން "ލާމަސީލް ކާފަ/މާމަ" އެވޯޑްގައި ވާދަކޮށް، އެ އެވޯޑްގެ އެންމެ ފާހަގަކޮށްލެވޭ 10 މާމައިންގެ ތެރޭގައި ވެސް ޝަކީބާ ވަނީ ހިމެނިވަޑައިގެންފަ އެވެ.
ޝަކީބާ ވިދާޅުވީ ޕަބްލިކް ހެލްތު ދާއިރާގެ "އޮފީސް" މަސައްކަތްތަކުން މިއަދު އޭނާ ރިޓަޔާ ކުރެއްވި ނަމަވެސް، ކުރިއަށް އޮތް ތަނުގައި ވެސް ރަށަށާއި މުޖުތަމައަށް ހިދުމަތް ކުރެއްވުމުގައި ދެމިހުންނަވާނެ ކަމަށެވެ.
އެ މަސައްކަތް މިހާރު ވެސް އޭނާ ވަނީ ފައްޓަވައިފަ އެވެ. ޝައުގުވެރިކަމާ އެކު އޭނާ މިހާރު ގެންދަވަނީ ޤުރުއާން ކުލާހެއް ހިންގަވަމުންނެވެ. ދިވެހި ބޭސްވެރިކަމުގެ ދާއިރާ އިން އޭނާ އަށް ފޮޅާލެވޭކަށް އަދިއެއް ނެތެެވެ. އެ ވެސް ބޮޑު ލޯތްބެއް ޖެހިފައި އޮތް، އަދި ދިރުވަން ބޭނުންވެފައިވާ ދާއިރާއެއްގެ ގޮތުގައި ޝަކީބާ ސިފަ ކުރައްވަ އެވެ.
ހަމަ މިއާއެކު ފޫޅުމައި ކަމަކީ އަދިވެސް ޝަކީބާ ޝައުގުވެރިކަން އޮތް ދިމާއެެކެވެ. އެ މަސައްކަތުގެ ތެރެއިން ވެސް ޝަކީބާ ކުރިއަށް އޮތް ތަނުގައި ވެސް ފެނިގެން ދާނެ ކަމަަށް ފޭދޫގެ ގިނަ ބަޔަކު ގައިމު ވެސް އުންމީދު ކުރާނެ އެވެ.
"އަޅުގަނޑުގެ ސިއްހީ ހާލަތު ތަންދޭ މިންވަރަކުން މަަސައްކަތް ކުރުމުގައި ދެމިހުންނާނަން،" ޝަކީބާ ވިދާޅުވި އެވެ.
އެޕްރީލް 9، 2014 ވަނަ ދުވަހަކީ ޝަކީބާ ފޭދޫ ސިއްހީ މަރުކަޒަށް މަސައްކަތަށް ނިކުންނަވާނެ އެންމެ ފަހު ދުވަހެވެ. އެތަނުގެ މުވައްޒަފުންނަށް މިއީ ހަގީގަތުގައި އުފާވެރި ދުވަހެއް ނޫނެވެ.
"އަޅުގަނޑުމެން ވެސް ވަރަށް ދެރަވޭ އެކުގައި އެހާ ޒަމާން ވަންދެން ޝަކީބައްތަ މަސައްކަތްކޮށްފައި ވަކިވެގެން ދާތީ. އަބަދު ވެސް އަޅުގަނޑުމެން ޝަކީބައްތަ މިސްވާނެ،" އެކުގައި 22 އަހަރު ވަންދެެން މަސައްކަތް ކުރި މުވައްޒަފަކު ބުންޏެވެ.
"އައްޑޫ ލައިވް" އިން ވެސް އެދެނީ އަޅުގަނޑުމެންގެ "ޝަކީބައްތަ" އަށް އަދަށް ވުރެ ފާގަތި މުސްތަގުބަލެކެވެ. ތިއީ އައްޑޫ ފަހުވެރިވާ ފަދަ އަންހެން ކޭބަނބަލެކެވެ. ރައްޔިތުންނަށް ދެއްވި ހިދުމަތަކަށްޓަކައި އަދި ކޮށްދެއްވަމުން ގެންދަވާ ހިިދުމަތްތަކަށްޓަކައި ފަށްފަށުން ޝުކުރިއްޔާ އެވެ.