އުނގޫފާރު ރީޖަނަލް ހޮސްޕިޓަލަކީ ވެސް ސްޕެޝަލައިޒް ވަކި ދާއިރާތަކަށް ހާއްސަ ކުރެވޭ ހޮސްޕިޓަލެއްގެ ގޮތުގައި ތަރައްޤީކުރުމަށް މަސައްކަތްކުރުމުގެ މުހިންމުކަން ބޮޑު ކަމަށް ނައިބު ރައީސް ފައިސަލް ނަސީމް ވިދާޅުވެއްޖެ އެވެ.
އެ ހޮސްޕިޓަލަށް މިއަދު ޒިޔާރަތްކުރައްވައި ނައިބު ރައީސް އެތަނުގެ ތަރައްޤީއަށް ކުރެވޭ މަސައްކަތްތަކާ ގުޅޭގޮތުން ހޮސްޕިޓަލުގެ އިސްވެރިންނާ ބައްދަލުކުރައްވައި މަޝްވަރާކުރައްވާފައިުވެ އެވެ. އެގޮތުން އުނގޫފާރު ރީޖަނަލް ހޮސްޕިޓަލުގައި ވަޞީލަތްތައް ޤާއިމުކޮށް ޚިދުމަތްތައް ތަރައްޤީކުރުމަށް ކުރެވޭ މަސައްކަތަކީ ސަރުކާރުން ވަރަށް އިސްކަންދޭ މުހިންމު މަސައްކަތްތަކެއް ކަމަށް ވިދާޅުވި އެވެ.
ފައިސަލް ވިދާޅުވީ ޓްރާންސްޕޯޓް ނެޓްވޯކުން އުނގޫފާރާއި، އެހެން ރަށްތައް ގުޅާލެވުމުން މިހާރު ހޮސްޕިޓަލުން ޚިދުމަތް ހޯދާ މީހުންގެ ޢަދަދު ވެސް އިތުރުވެގެންދާނެ ކަމަށެވެ. އަދި އުނގޫފާރު ރީޖަނަލް ހޮސްޕިޓަލަކީ ސްޕެޝަލައިޒް ވަކި ދާއިރާތަކަށް ޚާއްޞަ ކުރެވޭ ތަނަށް ހެދުން މުހިއްމު ކަމަށާއި އެ ހޮސްޕިޓަލްގައި ސީއެމްބިއުލާންސްގެ ޚިދުމަތް ދިނުމުގައި ކުރިމަތިވާ ބައެއް ދަތިތަކާއި، ބޭސްލިބުމުގައި ކުރިމަތިވާ ދަތިތައް ފަދަ އަތޮޅުތަކުގެ ޞިއްޙީ ޚިދުމަތް ދިނުމުގައި ކުރިމަތިވާ މައްސަލަތައް ޙައްލުކޮށްދިނުމަށް ކަމާގުޅޭ ފަރާތްތަކާ މަޝްވަރާކުރައްވާނެ ކަމަށް ވެސް ވިދާޅުވި އެވެ.
ބައްދަލުކުރެއްވުމުގައި ރީޖަނަލް ހޮސްޕިޓަލުގެ ސީނިއާ މެނޭޖްމަންޓުން ފާހަގަކުރި ކަންކަމުގެ ތެރޭގައި އެންމެ ގިނައިން ދިމާވާ އެއް ކަމަކީ ހިތުގެ ބަލިތަކަށް ފަރުވާ ހޯދަން މީހުން މާލެ ފޮނުވަން ޖެހުމެވެ. އަދި، ހޮސްޕިޓަލުގެ ޚިދުމަތްތައް ފުޅާވެ އިތުރުވަމުންދާ އިރު އެއާ އެއްވަރަށް އިންސާނީ ވަޞީލަތް ތަރައްޤީކުރުމުގެ މުހިންމުކަން ވެސް ފާހަގަކުރި އެވެ.