ނަފުސާނީ ބަލިތަކަށް ހޯދާ ފަރުވާތަކަކީ ހުރިހާ އެންމެންނަށް ވެސް ހޯދޭ ވަރުގެ ފަރުވާތަކަށް ވާން ޖެހޭ ކަމަށް ރައީސް އިބްރާހީމް މުހައްމަދު ސޯލިހު ވިދާޅުވެއްޖެ އެވެ.
މިއަދު ފާހަގަކުރާ ވޯލްޑް މެންޓަލް ހެލްތު ޑޭއާ ގުޅިގެން ކުރެއްވި ޓްވީޓެއްގައި ރައީސް ވިދާޅުވީ ނަފުސާނީ ބަލިތަކުގެ ފަރުވާ އަކީ އެ ބޭނުންވާ ކޮންމެ މީހަކަށް ހޯދޭ ފެންވަރުގެ ފަރުވާތަކެއްކަން ކަށަވަރުވުމަކީ ކޮންމެ މީހަކަށް ވެސް ލިބިދޭން ޖެހޭ ހައްގެއް ކަމަށެވެ. އަދި ނަފުސާނީ ބަލިތަކާ މެދު ދެކޭ ގޮތް ބަދަލުވާން ޖެހޭ ކަމަށާއި މުޖުތަމައުގެ ތެރޭގައި އެފަދަ ބަލިތަކާ ދޭތެރޭ ދެކޭ ގޮތް ބަދަލުކުރުމަށް ހޭލުންތެރިކަން އިތުރުކުރަން ޖެހޭ ކަމަށް ވެސް ރައީސް ވިދާޅުވި އެވެ.
ރާއްޖޭގައި ފަހަކަށް އައިސް ނަފުސާނީ ބަލިތައް އިތުރުވަމުންދާކަން ސިއްހީ ތަޖުރިބާކާރުން އަންނަނީ ފާހަގަކުރަމުންނެވެ. އެކަމަކު އެފަދަ ބަލިތަކާ މެދު މީހުން ދެކޭ ގޮތާއި ހޭލުންތެރިކަން ވެސް ކުޑަކަމުން ފަރުވާ އަށް ދެވޭ އިސްކަން ކުޑަ ކަމަށާއި ފަރުވާ ހޯދަން ޖެހިލުންވާ ކަމަށް ވެސް ތަޖުރިކާރުން ވިދާޅުވެއްޖެ އެވެ.
As we mark #WorldMentalHealthDay today, I call for a whole-of-society approach to bolster our commitment to raise awareness and make mental health and wellbeing for all a global priority. Timely and affordable access to mental health services must be a guaranteed right for all.
— Ibrahim Mohamed Solih (@ibusolih) October 10, 2022
ވަކިން ހާއްސަކޮށް ނަފުސާނީ ބަލިތަކަށް ފަރުވާ ހޯދުމަކީ ލަދުވެތި ކަމެއްގެ ގޮތުގައި ދެކޭ މީހުން ގިނަ އެވެ.
ވޯލްޑް މެންޓަލް ހެލްތު ޑޭ މިއަދު ފާހަގަކުރަމުން އަންނަ އިރު، ނަފުސާނީ ބަލިތަކަށް ފަރުވާދޭ ސެންޓަރެއް ހުޅުމާލޭ ހޮސްޕިޓަލްގައި މިއަދު ހުޅުވާފައިވެ އެވެ. ކުރިން އެފަދަ ސެންޓަރެއް އައިޖީއެމްއެޗްގައި ވެސް ހުޅުވާފައިވެ އެވެ.
ނަފުސާނީ ބަލިތަކަށް ފަރުވާ ހޯދަން ފަސޭހަކޮށް ދިނުމުގެ ގޮތުން ރާއްޖޭގެ އެކި ހިސާބުތަކުގައި ވަސީލަތްތައް ގާއިމުކުރަން ސަރުކާރުން އަންނަނީ މަސައްކަތްތަކެއް ކުރަމުންނެވެ. އެގޮތުން އައްޑޫ އިކްއެޓޯރިއަލް ހޮސްޕިޓަލް (އޭއިއެޗް) ވެސް މެންޓަލް ހެލްތު ސެންޓަރެއް ހުޅުވަން ހަމަޖެހިފައިވެ އެވެ.