ނަފްސާނީ ޞިއްޙަތުގެ ދާއިރާއަކީ، ދިވެހިންނަށް ކުރިއަށް ދިއުމަށް ފުރުޞަތު އޮތް ދާއިރާއެއް ކަމަށާއި، އެ ދާއިރާއިން ދިވެހި ދަރިވަރުން ކުރިޔަށް ދިއުމަށް އެދިވަޑައިގަންނަވާ ކަމުގައި ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަޙްމަދު ވިދާޅުވެއްޖެ އެވެ.
ފަޒްނާ މިހެން ވިދާޅުވީ، ރާއްޖޭގެ ޤައުމީ ޔުނިވަރސިޓީގެ، ފެކަލްޓީ އޮފް ހެލްތް ސައިންސަސް އިން ހިންގި "ޕިއަރ ސަޕޯޓް ސްކޮޑް" ތަމްރީން ޕްރޮގްރާމް ނިންމުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
ފަޒްނާ ވިދާޅުވީ ނަފްސާނީ ޞިއްޙަތުގެ ދާއިރާއިން ހުރި ވަޒީފާގެ ފުރުޞަތުތަކާއި އެއްވަރަށް ދިވެހިން ނުލިބޭ ކަމަށާއި ސައިކޮލޮޖިސްޓުންގެ ވަޒީފާ އަދާކުރާނެ ދިވެހިންނަށް ވަރަށް ބޮޑަށް ބޭނުންވެފައިވާ ކަމަށެވެ. އެގޮތުން ތަމްރީންތައް ނިންމާ ދަރިވަރުން ދާއިރާގައި މަސައްކަތް ކުރެއްވުމަށް ވަރަށް ބޮޑަށް އެދިވަޑައިގަންނަވާ ކަމަށް ފަޒްނާ ވިދާޅުވި އެވެ.
އޭގެ ސަބަބަކީ ނަފްސާނީ ބަލި ތަޙައްމަލް ކުރާ މީހާ އިތުރު ތަރުޖަމާނެއް މެދުވެރިނުކޮށް ސީދާ ޑޮކްޓަރާ ވާހަކަދެއްކުމަށް ބޭނުންވާނެތީކަން ފަޒްނާ ފާހަގަކުރެއްވި އެވެ. އަދި ސައިކޮލޮޖީގެ ދާއިރާއިން ކިޔަވާ ދަރިވަރުން ވެސް ޑިގްރީއާ ހަމައިން ކިޔެވުން ނިންމާނުލައި، މި ދާއިރާއިން މާސްޓަރސް ފެންވަރަށް ކިޔެވުމަށާއި، ލައިސަންސް ނެގުމުގައި ގޮންޖެހުންތައް ހުރި ނަމަވެސް ދަރިވަރުން ހިތްވަރުކޮށްގެން ވެސް ލައިސަންސް ނެގުމަށް ފަޒްނާ އިލްތިމާސްކުރެއްވި އެވެ.
މީގެއިތުރުން ނަފްސާނީ ޞިއްޙީ އެހީތެރިކަން ފޯރުކޮށް ދިނުމުގައި އެކަން ކުރެވޭނެ ހަމައެކަނި ބަޔަކީ، ސައިކޮލޮޖިސްޓުން ނޫން ކަމަށާއި، ޚިދުމަތް ހޯދަން މަރުކަޒަކަށް އަންނަ ފަރާތްތަކާ އެންމެ ފުރަތަމަ ބައްދަލުވާ މީހުންގެ ފަރާތުންވެސް އޯގާތެރިކަމާއި އަޅާލުން ބޭނުންވާނެ ކަމުގައި ވިދާޅުވެފަ އެވެ. މިގޮތުން، ނަފްސާނީ ޞިއްޙީ އެހީތެރިކަން ފޯރުކޮށް ދިނުމަކީ އެތައް ބަޔަކު ގުޅިގެން ކުރެވޭ މަސައްކަތެއްކަން އެކަމަނާ ފާހަގަކުރެއްވި އެވެ.
ފަޒްނާ ވިދާޅުވިގޮތުގައި ކޮންމެ ކަމެއްވެސް ފެށިގެން އަންނަނީ ގޭތެރެއިން ކަމަށާއި، އެހެން ނަމަވެސް މިހާރު މުޖުތަމަޢުގެ ކަންތައްތައް ހުރި ގޮތުން، ބައެއް ފަހަރަށް ގޭގައި ނަފްސާނީ ބަލީގެ މީހުންނަށް އެކަށީގެންވާ މާޙައުލެއް ނޯންނަ ކަމުގަ އެވެ. އެހެންކަމުން، ނަފްސާނީ ދުޅަހެޔޮކަމަށް މަސައްކަތް ކޮށްދޭނެ ފަރާތްތަކެއްގެ ބޭނުންތެރިކަން ބޮޑުކަމަށާއި، ފެކަލްޓީ އޮފް ހެލްތް ސައިންސަސް އިން ކުރަމުންގެންދާ މަސައްކަތްތަކަކީ މުހިންމު މަސައްކަތެއް ކަމުގައި އެކަމަނާ ފާހަގަކުރެއްވި އެވެ.
ފެކަލްޓީ އޮފް ހެލްތް ސައިންސަސްގައި ބޭއްވި މި ރަސްމިއްޔާތުގައި، މި ތަމްރީން ޕްރޮގްރާމް ފުރިހަމަކުރި ދަރިވަރުންނަށް ސެޓްފިކެޓް ޙަވާލުކޮށްދެއްވީ، ރައީސުލްޖުމްހޫރިއްޔާގެ އަނބިކަނބަލުންނެވެ. އަދި އެކަމަނާ ވަނީ، އެ ފެކަލްޓީގެ ދަރިވަރުންގެ ފަރާތުން ހުށައަޅައިދިން ތަމްސީލެއް ވެސް ބައްލަވައިލައްވާފަ އެވެ.