ނުކުޅެދުންތެރިކަން ހުންނަ މީހުން ކުރާ މަސައްކަތްތަކާއި އެ މީހުންގެ ހުނަރުތައް ދައްކައިލުމަށްޓަކައި ޖެންޑަ މިނިސްޓްރީން މައުރަޒެއް ބާއްވަން ނިންމައިިފި އެވެ.
އެ މިނިސްޓްރީން ބުނީ "ރިވެލި ތަރި" ގެ ނަމުގައި ބާއްވާ މައުޒަރު އޮންނާނީ އަންނަ މަހުގެ 14 އާއި 15 ގައި ކަމަށެވެ.
އެހެންވެ މި މައުރަޒުގައި ބައިވެރިވާން ބޭނުންވާ ނުކުޅެދުންތެރިކަން ހުންނަ މީހުންނަށް މިއަދު ވަނީ ބައިވެރިވާން ފުރުސަތު ހުޅުވާލައިފަ އެވެ. ބައިވެރިވާން އެދޭ ފޯމް މިއަދުން ފެށިގެން މި މަހުގެ 30 އާ ހަމައަށް މިނިސްޓްރީ އާއި އެތަނުގެ ދަށުން އަތޮޅު ތެރޭގައި ހިންގަމުން ފެމިލީ އެންޑް ޗިލްޑްރަން ސާވިސް ސެންޓަރުތަކުގެ އިތުރުން މިނިސްޓްރީގެ ވެބްސައިޓުން www.gender.gov.mv ޑައުންލޯޑް ވެސް ކުރެވޭނެ އެވެ.
ޖެންޑަ މިނިސްޓްރީން ބުނި ގޮތުގައި "ރިވެލި ތަރި" މައުރަޒަށް ހުށަހަޅާ ތަކެތި ބަލައިގަންނަން އަންނަ މަހުގެ ދެ ވަނަ ހަފުތާގެ ތެރޭގައެވެ. އަދި މިކަމާ ގުޅިގެން މި މައުރަޒުގައި ބައިވެރިވުމަށް އެދި ހުށަހަޅާ ފަރާތްތަކަށް މިނިސްޓްރީން ގުޅައި ގުޅުންހުރި މަޢުލޫމާތު ހިއްސަކުރާނެ ކަމަށް ވެސް ބުންޏެވެ.
މި މައުރަޒުގެ މައިގަނޑު މަގުސަދަކީ ނުކުޅެދުންތެރިކަން ހުންނަ މީހުންނާއި، ކުދިންގެ ކިބައިގައިވާ ހުނަރާއި، އުފެއްދުންތެރިކަން އާންމުކޮށް، މަސައްކަތްތެރިކަމާއި ވިޔަފާރި ކުރިއެރުވުމަށް ޝައުގުވެރިކަން ހުންނަ ފަރާތްތައް ބާރުވެރިކޮށް އެކަމަށް މަގުފަހިކޮށް ދިނުން ކަމަށް މިނިސްޓްރީން ބުންޏެވެ.