ޕޯސްޓް މެެދުވެރިކޮށް އައްޑު އަށް އަންނަ ޕާރުސަލްތައް އަންނަ އާދީއްތަ ދުވަހުން ފެށިގެން މަރަދޫގައި ހުންނަ ކަސްޓަމްސްގެ ސަދަން ރީޖަނަލް ހެޑް އޮފީހުން ދޫކުރާ ގޮތަށް ނިންމައިފި އެވެ.
ކުރިން ޕޯސްޓް އޮފީސްތަކުން އެ ތަކެތި ދޫކުރި ނަމަވެސް، އާދީއްތަ ދުވަހުން ފެށިގެން އެ ބަދަލު ގެނައި ސީދާ ސަބަބެއް ސާފުވާ ގޮތެއް ނުވި އެވެ.
އެހެން ނަމަވެސް އައްޑޫގެ ދެ ރަށެއްގައި ހުރި ޕޯސްޓް އޮފީސްތަކުން ވަނީ އެ ބަދަލު ގެނައިކަން ކަށަވަރުކޮށް ދީފަ އެވެ.
މިކަމާ ބެހޭ ގޮތުން ޕޯސްޓް އޮފީހުގެ އިސް ވެރިއެެއްގެ ބަހެއް ހޯދަން ކުރި މަސައްކަތް އަދި ކާމިޔާބުވާ ގޮތެއް ނުވެ އެވެ.
މި ގެނައި ބަދަލާ ގުޅިގެން ޕޯސްޓް މެދުވެރިކޮށް ގެންނަ ތަކެތީގެ ތެރެއިން ކަސްޓަމްސް އިން ޗެކް ކުރާ ހުރިހާ ޕާރުސަލްތަކެއް އާދީއްތަ ދުވަހުން ފެށިގެން ދޫކުރާނީ މަރަދޫގައި ހުންނަ ކަސްޓަމްސް އޮފީހުންނެވެ. އަދި ތަކެތި ދޫކުރާނީ ބަންދު ނޫން ކޮންމެ ދުވަހަކު ހެނދުނު 11:00 އިން 12:00 އަށެެވެ.
މި ގެނައި ބަދަލާ ގުޅިގެން އާންމު ރައްޔިތުންނަށް ކުރިއާ ހިލާފަށް ޕޯސްޓުން ގެންނަ ތަކެތި ނެގުމުގައި ދަތިތަކެއް ދިމާވާނެކަން ފާހަގަ ކުރެވެ އެވެ.
ކުރިން ހަމަޖެހިފައި އޮތް ގޮތުން ނަމަ ފޭދޫގައި ހުންނަ ޕޯސްޓް އޮފީހުން މަރަދު އާއި މަރަދޫފޭދޫ އަދި ފޭދޫގެ މީހުން ޕޯސްޓުން ގެންނަ ތަކެތި ފަސޭހަކަމާ އެކު ލިބެ އެވެ.
އަދި ހިތަދޫގައި ހުންނަ ޕޯސްޓް އޮފީހުން އެ ރަށުގެ ރައްޔިތުންނަށް ފަސޭހަ ކަމާ އެކު ތަކެތި ނެގެ އެވެ.
ނަމަވެސް އިތުރު ހަރަދުތަކެއްކޮށްފައި ތަކެތި ނަަގަން މަރަދު އަށް ދާން ޖެހުމަކީ އާންމުންނަށް އުފުލަން ޖެހޭނެ ބޮޑު ތަކުލީފަކަށް ވާނެ އެެވެ.