(އެޕްރީލް 9، 2014 ވަނަ ދުވަހުގެ ބަޔާ ގުޅޭ)
ސިޔާސީ ޕާޓީ ރަޖިސްޓްރީކޮށް ދެއްވުމުގެ މައްސަލަ މިފަދަ ދެރަ ގޮތަކަށް ނިމި ދިއުމުން އިސްލާހަށް އެދިގެން ތިބި އެތައް ބަޔަކަށް މާޔޫސްކަން ލިބިގެން ދިޔަ އެވެ. ބައެއް މީހުންގެ ނަޒަރުގައި ސިޔާސީ ޕާޓީ ހެދުމުގެ މައްސަލަ ރައިސް މައުމޫން ސާސްކަފުގެ ދަތުރުފުޅަށް އަރާވަޑައިގެންނެވި އޮޑީގެ މޯހިރަށް ދޫކޮށްލެއްވީ އެވެ.
އެހާ ހިސާބުން އެ ވާހަކަ ބެހިގެން ދިޔައީ އެވެ. ދެން އެ ވާހަކަ އެހި މީހެއް ވެސް ނުހުންނާނެ އެވެ. ނަމަވެސް އަޒުމަކާ އެކު ހެޔޮ ވިސްނުމުގައި ތިބި މަދު ބަޔަކު ނަމަވެސް އުންމީދުގެ ކަނިކޮޅެއްހާ ވަރު، ދިއްލެމުންދާތީ އޭރު ވެސް ފެނެ އެވެ.
ސަރުކާރުން ރަޖިސްޓްރީކޮށް ނުދެވޭނެ ކަމަށް ނިންމެވި ޕާޓީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ނަމުގައި ކޮޅުނބުގައި ހިންގަން ފެށީ ދާދި އަވަހަށެވެ. ދުވަސްކޮޅެއްގެ ތެރޭގައި ލަންކާ ސަރުކާރާއި ކޮޅުނބުގައި ގާއިމުވެ ތިއްބަވާ ތަފާތު ގައުމުތަކުގެ ޑިޕްލޮމެޓިކް މިޝަންތަކުގެ ތާއީދު ވެސް ލިބެމުންދާ ވާހަކަ އިވެން ފެށި އެވެ.
ސޯޝަލް މީޑިއާގެ ހަމަލާ
މި ދުވަސްވަރަކީ އިންޓަނެޓްގައި ސޯޝަލް މީޑިއާ އިން ހަބަރު ފެތުރުން އާންމުވެގެން ދިޔަ ދުވަސްވަރެވެ. "ދިވެހި އޮބްޒާވާ" ގެ ނަމުގައި މ. މާފުށީގޭ އަހުމަދު މޫސާ ފެއްޓެވި ހަބަރު ފެތުރުމުގެ ރަސްމަގު ވެގެން ދިޔައީ މައުމޫން ސަރުކާރަށް ފާޑު ކިއުމުގައި ހައްދެއް ނެތްހާ ބޮޑު މިނިވަން ކަމެއް ލިބިގަތް ފަރާތަކަށެވެ.
އެ ދުވަސްވަރު ރާއްޖޭގައި ހަބަރު ފަތުރާ ހަމައެކަނި ރޭޑިއޯ އާއި ޓީވީއަކީ ސަރުކާރުގެ މީޑިއާ އެވެ. އޭގެ އިތުރުން ދުވަހު ނޫހުގެ ގޮތުގައި ނެރެމުން އައީ ދެތިން އަމިއްލަ ނޫހެކެވެ. އެއީ ވެސް ސަރުކާރުގެ ވަޒީރުންގެ ނޫސްތަކެވެ. ސަރުކާރުން ވަރަށް ބޮޑު ހަރަދުތަކެއް ދެއްވައިގެން ނެރުނު ނޫސްތަކެވެ.
އެހެން ކަމުން އެދުވަސްވަރުގެ ލިއުންތެރިކަމާއި ނޫސްވެރިކަން ވެގެން ދިޔައީ ރައީސް މައުމޫނުގެ ވެރިކަމަށް މަގުފަހިކޮށް ދިން އަދި އެ މަނިކުފާނުގެ ސަރުކާރު ދެމެހެއްޓުމަށް ބޭނުން ކުރެވުނު އެންމެ ބޮޑު ބާރަށެވެ. ޒަމާނަށް ދެމި ހުންނާނެހެން މީހުންގެ ހިތްތަކުގައި އެ މަނިކުފާނުގެ ޒާތީ ޝަހުސިއްޔަތު ކުރަހައި ލާފެންކޮށް ދިން ވަސީލަތެވެ.
އެހެން ނަމަވެސް 2002 ވަނަ އަހަރު ފެށިގެން އައީ އިންޓަނެޓްގައި ސަރުކާރާ މެދު ޝުއޫރު ފާޅު ކުރުމުގައި ހައްދެއް ނެތްހާ ބޮޑު މިނިވަންކަމަކާއި ލިޔާނެ އެއްޗެއް ލިއުމުގެ އިހުތިޔާރު ލިބިގެންފައި ވަނިކޮށެވެ. ފިލާ ތިބެގެންނެވެ.
ވަކި މީހަކު ނޭނގޭ ގޮތަށެވެ. މި ލިއުންތައް ނަކަލުކޮށްގެން ބަހައި ހެދި އެވެ. މަގުތަކާއި މީހުން އެއްވާ ތަންތަނަށް ވެސް އަޅަމުން ދިޔަ އެވެ. (ނުނިމޭ)
ނޯޓް: މިއީ ފޭދޫ އަލީ ފަހުމީ އަހުމަދު ސެޕްޓެމްބަރު 25، 2013 ގައި ނެރުއްވި "އައްޑޫ ގަން ހިންގުން" މި ފޮތެވެ.
"އައްޑޫ ލައިވް" ގައި މި ފޮތް ސިލްސިލާއެއްގެ ގޮތުގައި ޝާއިއު ކުރަން ހަދިޔާ ކުރެއްވި ކަމަށްޓަކައި، މި ނޫހުގެ ފަރާތުން ފަހުމީ އަށް ހާއްސަ ޝުކުރެއް އަރިސް ކުރަމެވެ.