ޒަމާނަށް އަންނަމުންދާ ބަދަލުތަކާ އެއް ހަމައެއްގައި، ދަނޑުވެރިކަން ކުރަމުން ގެންދާ ގޮތްތަކަށްވެސް ބަދަލު ގެންނަންޖެހޭ ކަމަށް ފިޝަރީޒް މިނިސްޓަރު ޑރ.ހުސެއިން ރަޝީދު ހަސަން ވިދާޅުވެއްޖެ އެވެ.
މިނިސްޓަރު މިހެން ވިދާޅުވީ މި އަހަރުގެ ދަނޑުވެރިންގެ ދުވަހާއި ދުނިޔޭގެ ކާބޯތަކެތީގެ ދުވަސް ފާހަގަ ކުރުމުގެ ގޮތުން ކ.ކާށިދޫގައި ބޭއްވި ދަނޑުވެރިކަމުގެ ވޯކްޝޮޕްގެ ނިންމުމުގެ ރަސްމިއްޔާތުގައި ވާހަކަދައްކަމުންނެވެ.
މި ވޯކްޝޮޕް ނިންމުމުގެ ރަސްމިއްޔާތުގައި މިނިސްޓަރ ދެއްކެވި ވާހަކަފުޅުގައި ޒަމާނަށް އަންނަމުންދާ ބަދަލުތަކާ އެއް ހަމައެއްގައި، ދަނޑުވެރިކަން ކުރަމުން ގެންދާ ގޮތްތަކަށްވެސް ބަދަލު ގެނައުމަކީ މުހިންމުކަމެއްކަން ވަނީ ފާހަގަ ކުރައްވާފަ އެވެ. އަދި ދަނޑުވެރިކަން ކުރަން ލިބޭ ކުޑަ ބިންކޮޅުން ރަނގަޅު ނަފާއެއް ހޯދޭނެ ގޮތަކަށް ދަނޑުވެރިކަން ކުރުމަށް މިނިސްޓަރު ވަނީ އިލްތިމާސް ކުރައްވާފަ އެވެ.
މި މަހުގެ 12 ވަނަ ދުވަހުން ފެށިގެން ތިން ދުވަހަށް ބަހާލައިގެން 29 ދަނޑުވެރިންގެ ބައިވެރިވުމާއެކު މި ވޯކްޝޮޕް ވަނީ ފުރިހަމަކޮށްފަ އެވެ. މި ވޯކްޝޮޕް ގައި ދަނޑުވެރިންނަށް ބޭނުންވާ ތަފާތު އެކި ދާއިރާތަކުން ވަނީ މައުލޫމާތު ހުށަހަޅައިދީފަ އެވެ. މައުލޫމާތު ހުށަހަޅުއްވައި ދެއްވާފައިވަނީ ކަމާގުޅުންހުރި އެކި އިދާރާތަކުންނާއި އަމިއްލަ ކުންފުނިތަކުންނެވެ.
މައުލޫމާތު ފޯރުކޮށްދެއްވުމުގައި ޙަރަކާތްތެރިވި ފަރާތްތަކުގެ ތެރޭގައި ހިމެނެނީ މިނިސްޓްރީގެ ރިސޯސް ބޭފުޅުންގެ އިތުރުން މިނިސްޓްރީ އޮފް އިކޮނޮމިކް ޑިވެލޮޕްމަންޓް، އެސް.އެމް.އީ ޑިވެލޮޕްމެންޓް ފައިނޭންސް ކޯޕަރޭޝަން (އެސް.ޑީ.އެފް.ސީ)، އަޔާދީ ތަކަފުލް، ބިސްނަސް ސެންޓަރ ކޯޕަރޭޝަން، އެގްރޯނެޓް އަދި ދަނޑުވެރިކަމުގެ ބާވަތްތައް ވިއްކުމުގައި ޙަރަކާތްތެރިވާ ފަރާތްތަކުން ވަނީ ދަނޑުވެރިންނަށް މައުލޫމާތު ފޯރުކޮށްދެއްވާފަ އެވެ.