މަސްތުވާތަކެތި ކަމަށް ޝައްކު ކުރެވޭ އެއްޗެހިތަކަކާ އެކު ހުޅުދޫން ދެ މީހަކު ފުލުހުންގެ ބެލުމުގެ ދަށަށް ގެންގޮސްފި އެވެ.
އިއްޔެ އާއި ރޭ ފުލުހުންގެ ބެލުމުގެ ދަށަށް ގެންގޮސްފައި ވަނީ 25 އަހަރުގެ ދެ ފިރިހެނުންނެވެ.
މަސްތުވާތަކެއްޗާ އެކު ފުރަތަމަ މީހާ ފުލުހުންގެ ބެލުމުގެ ދަށަށް ގެންގޮސްފައި ވަނީ އިއްޔެ ރޭ ދަންވަރު 2:30 ހާއިރު ހުޅުމީދޫ ޕެޓްރޯލް ކުރަމަށް ފުލުހުން ހަރަކާތްތެރި ވަމުން ދަނިކޮށް ޢާއްމު ފަރާތަކުން ފުލުހުންނަށް ހިއްސާ ކުރި މަޢުލޫމާތަކާ ގުޅިގެންނެވެ.
އޭނާ ފުލުހުންގެ ބެލުމުގެ ދަށަށް ގެންގޮސް ހަށިގަނޑު ބަލައި ފާސްކުރި އިރު ލައިގެން ހުރި ބޮކްސާގެ ތެރެއިން މަސްތުވާތަކެތި ކަމަށް ޝައްކު ކުރެވޭ އެއްޗެއް އަޅާފައި ފަސް ރަބަރު ޕެކެޓް ފެނިފައިވެ އެވެ.
ދެ ވަނަ މީހާ ފުލުހުންގެ ބެލުމުގެ ދަށަށް ގެންގޮސްފައި ވަނީ ޕޮލިސް އިންޓަލިޖެންސަށް ލިބުނު މަޢުލޫމާތަކާ ގުޅިގެން ހުޅުމީދޫގައި ފުލުހުން ހިންގި ހަރަކާތެއްގަ އެވެ.
އެއީ ރޭ 7:15 ހާއިރު އޭނާ ފުލުހުންގެ ބެލުމުގެ ދަށަށް ގެންގޮސް ހަށިގަނޑާއި އޭނާ ހުރި ސަރަޙައްދު ބަލައި ފާސް ކުރި އިރު އޭނާ ހުރި ސަރަޙައްދުން ހުސްކޮށްފައިވާ މަސް ދަޅެއްގެ ތެރޭގައި މަސްތުވާތަކެތި ކަމަށް ޝައްކުކުރެވޭ އެއްޗެއް އަޅާފައި ހުރި ބްލެޓް ސައިޒުގެ 14 ރަބަރު ޕެކެޓް ރައްކާކޮށްފައި ވަނިކޮށް ވަނީ ފެނިފަ އެވެ.