ގެވެށިއަނިޔާ އާއި ރޭޕް އަދި މަރުގެ އިންޒާރު ދިނުމުގެ ތުހުމަތުގައި ހައްޔަރު ކުރުމަށް ފަހު ކަފާލާތުގެ ދަށުން ދޫކޮށްލާފައި ހުރި މެންޗެސްޓާ ޔުނައިޓެޑްގެ ޒުވާން ފޯވާޑް މޭސަން ގްރީންވުޑް، ކަފާލާތުގެ އުސޫލާ ހިފާލުވުމުން އިއްޔެ އަލުން ހައްޔަރުކުރުމަށް ފަހު އޭނަގެ މައްޗަށް ދައުވާކޮށްފި އެވެ.
އުމުރުން 21 އަހަރުގެ ކުޅުންތެރިޔާ އަށް ދައުވާކުރީ މިދިޔަ ޖެނުއަރީ މަހުގެ ތެރޭގައި އޭނަގެ ލޯބިވެރިޔާ ހެރިއަޓްކުރި ތުހުމަތުތަކާ ގުޅިގެން ހިންގި ތަހުގީގުގައި މިހާތަނަށް އެކަމާ ގުޅޭ ހެކިތަކެއް ވެސް ލިބުމާ ގުޅިގެން ކަމަށް ގްރޭ ރޭޓަ މެންޗެސްޓާ ޕޮލިހުން ބުންޏެވެ.
ގްރީންވުޑަށް ދައުވާކުރުމާ ގުޅިގެން އެ މައްސަލާގައި ބާއްވާ ފުރަތަމަ އަޑު އެހުން މާދަމާ އަށް ސަލްފޯޓް މެޖިސްޓްރޭޓް ކޯޓްގައި ތާވަލުކޮށްފައިވެ އެވެ.
އޭނަގެ މައްޗަށް ކުރެވުނު ތުހުމަތުތަކާ ގުޅިގެން ޔުނައިޓެޑުން ވަނީ މުއްދަތެއް ނެތް ގޮތަށް ގްރީންވުޑް ސަސްޕެންޑްކޮށްފަ އެވެ. އަދި ގްރީންވުޑާ އެކީ ސްޕޮސަޝިޕް އެއްބަސްވުންތައް ހަދާފައިވާ ބައެއް ކުންފުނިތަކުން އެއްބަސްވުންތައް ވެސް ވަނީ އުވާލާފައިވެ އެވެ. އޭގެ ތެރޭގައި މަޝްހޫރު ކުންފުނި، ނައިކީ ވެސް ހިމެނެ އެވެ.