މި ދުނިޔެ އަށް އިންސާނާ އުފަންވަނީ ފިތުރަތުގެ ސާފުކަންމަތީގަ އެވެ. އެހިނދު އޭނާގެ ކުރިމަތީގައި ވަނީ ދެ މަގެކެވެ. އެއީ ސާފުސީދާ ތެދުމަގާއި ނުސީދާ ގޯސް މަގެވެ. ރަނގަޅު ގޮތާއި ނުބައިގޮތެވެ.
މި ދެ މަގު ދެނެގަނެ، ހެވާއި ނުބައި ވަކިކު ކުރުމަށްޓަކައި މާތްﷲ އިންސާނުންނަށް ވަނީ ބުއްދި ދެއްވައިފަ އެވެ. ޢިލްމު އުނގެނުމަށެވެ. ކަންކަން ހޯދައި ބެލުމަށެވެ. ކަންކަމުން ޢިބްރަތް ޙާޞިލް ކުރުމަށެވެ. ހެޔޮ ރަނގަޅު ގޮތް ބުއްދީގެ އެހީގައި ދެނެގަނެ އެއަށް ޢަމަލު ކުރުމަށެވެ.
ހުންނަން ޖެހޭ ވަރަށް މާތް ސިފައެކެވެ. މިއީ އިންސާނާ ދުނިޔަވީ ކަންކަމުގައި އަދި އުޚުރަވީ ޙަޔާތުގައި ވެސް ކާމިޔާބުވުމަށްޓަކައި މުހިންމު ސިފައެކެވެ.
މި ސިފަ އަށަގަންނުވައި އާލާކުރުމަށްޓަކައި، އަމިއްލަ ނަފްސުން ފަށައި ގަތުން އެއީ އެންމެ އެދެވޭ ގޮތެވެ. އަމިއްލަ ނަފްސަށް ތެދުވެރިވުމެވެ. "ސެލްފް ޑިސިޕްލިން" އެވެ. މިއީ އިޚްލާޞްތެރިކަމުގެ ތަޅުދަނޑި އެވެ. އެއީ ހެއްދެވި ފަރާތާއި ތިމާ އާ ދެމެދު ވާ ތެދުވެރިކަމެކެވެ. ހަމައެކަނި ﷲ ދެނެވޮޑިގެންވާ އަދި ތިމާ އަށް އެކަނި އެނގޭކަން ކަމުގައި ވާ ތެދުވެރިކަމެވެ.
ދިރިއުޅުމުގެ ހުރިހާ ޙާލަތްތަކެއްގައި ވެސް ތިމާގެ ތެދުވެރިކަމާއި އިޚްލާޞްތެރިކަން އިމްތިޙާނު ކުރެވިގެންދާ ޙާލަތްތަކާއި ކުރިމަތިވެ އެވެ. ތިމާމެންނަށް ހަދާލެވޭ ކުޑަކުޑަ ދޮގެއްގެ ސަބަބުން ވެސް ހީވެސް ނުކުރާހާ ދެރަވަރު ކަންކަމާ ތިމާމެންނާ ކުރިމަތިވާތަން ފެންނަނީ މަދެއް ކޮށެއް ނޫނެވެ.
އެހެން ނަމަވެސް އަމިއްލަ ނަފްސުގެ ތެދުވެރިކަމަކީ އޭގެ ސީދާ އަސަރު ތިމާ އަށް ނުފެންނަ ކަމެއް ކަމުގައި ހީވެދާނެ އެވެ. އެއީ އޭގެ އަސަރު ސީދާ ގޮތެއްގައި އެހެން މީހަކަށް ނުފޯރާތީ އެވެ. އެއީ ހަމައެކަނި ތިމާގެ ކިބައިގައި ހުންނަ ރިވެތި އަޚުލާޤާ ގުޅިފައިވާ ކަމަކަށްވާތީ އެވެ.
ނަފްސުގެ ތެދުވެރިކަމަކީ، ތިމާ އެކަނި ހުންނަ ޙާލަތުގައި، ނުވަތަ އެހެން މީހުން ބަލަން ނުތިބި ކަމުގައި ވިޔަސް ރަނގަޅު ގޮތަށް ޢަމަލު ކުރުމެވެ. ހެޔޮޢަމަލު ކުރުމުގައި ދެއްކުންތެރިކަން އެއް ފަރާތް ކުރުމެވެ.
ބޮސް ބަލަން ނެތީމާ ކަންފަސޭހަކޮށްލުމާއި، އެހެން މީހުން ބަލަން ތިބީތީ ހިތްހެޔޮކަން، ދީލަތިކަން، މުރާލިކަން ފަދަ ސިފަތައް ދެއްކުމާއި، ތިމާއެކަނި އުޅޭ ކޮޓަރިއަކަށްވީތީ މުޑުދާރުކޮށް އެފަދަ މާހައުލު ބެހެއްޓުން ފަދަ ކަންކަމަކީ ތިމާގެ ނަފްސުގެ ތެދުވެރިކަމާއި ގުޅިފައިވާ ކަންކަމެވެ.
ތިމާ ބުނާ ބަހާއި ޢަމަލާ ދިމާ ނުވުމާއި، ތިމާއަށް އެނގޭ އަދި ޤަބޫލު ކުރާ ރަނގަޅު ޢަމަލުތަކާ ޚިލާފަށް ތިމާގެ ޢަމަލުތަށް ބެހެއްޓުން ފަދަ ކަންކަމަކީ ވެސް ނަފްސުގެ ތެދުވެރިކަން ނެތް މީހުންގެ ކިބައިން ފެންނާނެ ސިފަތަކެވެ.
އެހެންކަމުން، ނަފްސުގެ ތެދުވެރިކަން ނެތުމަކީ ތިމާއަށް ދިރިއުޅުމުގެ ކޮންމެވެސް ހިސާބެއްގައި އެކަމުގެ ނޭދެވޭ އަސަރު ފޯރާނެ ކަންކަންކަމުގައި މިހާރު ޤަބޫލު ކުރެވޭނެ އެވެ.
ވަގުތާއި ޙާލަތުގެ ގޮތުން ތިމާ އަށް އެއްވެސް ގެއްލުމެއް ނުލިބި ދިއުމަކީ ވަގުތީ ފަސޭހައަކަށް ނުވަތަ ހިތްހަމަޖެހުމަކަށް ވީކަމުގައިވި ނަމަވެސް، އެކަމުގެ ސަބަބުން ރޫޙާނީ ގޮތުންނާއި ނަފްސާނީ ގޮތުން ތިމާ ބަލިކަށި ވެގެންދެ އެވެ. އަދި އެފަދަ މީހުން މުޖުތަމަޢުން ފެނިގެން ދަނީ ނާކާމިޔާބު މީހުންގެ ގޮތުގައެވެ. އަދި އެއްވެސް އަގެއް ނެތް މީހުންގެ ގޮތުގަ އެވެ. އެހެންކަމުން އިޚްލާޞްތެރި ބަޔަކަށް ވުމަށްޓަކައި، އަހަރުމެންނަކީ ނަފްސަށް ތެދުވެރި ބަޔަކަށް ވާން ޖެހެ އެވެ.
ނަފްސަށް ތެދުވެރިވުމާ އެކު އަނެކާއަށް ވެސް ތެދުވެރި މީހަކަށް ތިމާވެއްޖެ ނަމަ ހިތްހަމަޖެހޭ ދިރިއުޅުމެއް ޙާޞިލު ކުރުމަށް ދާންވީ މިސްރާބު ތިމާއަށް ވަރަށް ސާފުކޮށް ފެންނާނެ އެވެ.