ލޮލަށް އަޅާ ބޭހެއްގައި ޑިފެކްޓެއް ހުރިކަން ފާހަގަވެފައިވާތީ އެ ބޭސް ބޭނުން ނުކުރަން ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އަންގައިފި އެވެ.
އެތަނުން ބުނީ ބޭނުން ކުރުން މަނާކުރީ އެލަސިން އައި ޑްރޮޕް ކަމަށާއި އެއީ މެލޭޝިއާގެ ކުންފުންޏެއް ކަމަށްވާ ޑުއޯފާމާ އިން އުފައްދާ ބޭހެއް ކަމަށެވެ. އަދި މައްސަލަ ހުރިކަން ފާހަގަކުރެވިފައި ވަނީ އެ ބޭހުގެ ބައެއް ބެޗުތަކުގަ އެވެ. އެގޮތުން މެލޭޝިއާގެ ނެޝަނަލް ފާމަސޫޓިކަލް ރެގިއުލެޓަރީ އޮތޯރިޓީން މައްސަލަ ހުރިކަން އަންގާފައި ވަނީ ބޭހުގެ ތިން ބެޗެކެވެ.
އެއީ ބެޗު ނަމްބަރު 193033، 200827 އަދި 200230 ކަމަށް އެޗްޕީއޭ އިން ބުންޏެވެ.
މައްސަލަ ހުރި މި ބޭހަކީ ރާއްޖެ އެތެރެކޮށް ވިއްކުން ހުއްދަކުރާ ބޭސްތަކުގެ ލިސްޓުގައި ހިމެނޭ ބޭހެއްކަމުން އޭގައި މައްސަލަ ދިމާވެފައިވާ ތިން ބެޗުގެ ތެރެއިން ދެ ބެޗެއް ރާއްޖެ އަށް އެތެރެކޮށް ވިއްކާފައިވާ ކަމަށް ވެސް އެޗްޕީއޭ އިން ބުންޏެވެ. އެހެންވެ މިހާރު އެ ބޭސް ރަޖިސްޓްރީކޮށްފައިވާ ކުންފުންޏާ ގުޅިގެން މާކެޓުން އެ ނެގުމަށް އަންގަމުން އަން ކަމަށާއި، އެ ބޭސް ބޭނުން ނުކުރަން އާންމުންނަށް އިލްތިމާސްކުރާ ކަމަށް ބުންޏެވެ.