އެބޯލާގެ ކޭސްތައް ޔުގާންޑާގައި މިހާރު ވަރަށް ބޮޑަށް އިތުރުވަމުންދާތީ ރައްކާތެރިކަމުގެ ފިޔަވަޅެއްގެ ގޮތުން އެ ގައުމުގެ ބައެއް ޑިސްކްޓްރިކްތައް ލޮކްޑައުންކޮށްފި އެވެ.
އިރުމަތީ އެފްރިކާ އަށް ނިސްބަތްވާ ގައުމުގެ ރައީސް ޔޮވޭރީ މުސެވެނީ ވިދާޅުވީ އެބޯލާގެ ހާލަތު ގޯސްވުމާ ގުޅިގެން ބަލީގެ ހާލަތު އެންމެ ގޯސް ދެ ޑިސްޓްރިކްޓް ލޮކްޑައުންކުރަން ނިންމީ ތިން ހަފުތާގެ މުއްދަތަށް ކަމަށެވެ. އެގޮތުން ކާގޯ ޓްރަކްސް އިސްތިސްނާވާ ގޮތަށް މުބެންޑީ އާއި ކަސަންޑާ ޑިސްޓްރިކްޓަށް އެތެރެވުމާއި ބޭރުވުން ވަނީ މަނާކޮށްފަ އެވެ.
ރައީސް ވިދާޅުވީ ލޮކްޑައުންގެ މުއްދަތުގެ ތެރޭގައި އެ ދެ ޑިސްޓްރިކްޓްގައި ކާފިއު ވެސް ހިންގާނެ ކަމަށެވެ. އެގޮތުން އަޅުކަންކުރާ ތަންތަނާއި ބާތަކާއި ޖިމްތަކާއި ސައުނާތަކާއި މުނިފޫހި ފިލުވަން ހާއްސަ ތަންތަން ބަންދުކުރަން ނިންމާފައިވެ އެވެ. އެކަމަކު ސްކޫލްތައް ހުޅުވައި ކިޔަވައިދޭނެ އެވެ.
"މި ފިޔަވަޅުތަކާ އެކީ ބަލީގެ ހާލަތަށް އަންނަ ބަދަލުތަކާ ގުޅިގެން ބަލީގެ ހާލަތު އިތުރަށް ގޯސްވާ ނަމަ އިތުރު ފިޔަވަޅުތަކެއް ވެސް އަޅާނެ. އަދި މިފަދަ ފިޔަވަޅުތަކެއް އަޅަން ނިންމީ ރައްޔިތުންގެ ސަލާމަތާއި ރައްކާތެރި ކަމަށްޓަކައި،" މުސެވެނީ ވިދާޅުވި އެވެ. "އެހެންވީމަ ފިޔަވަޅުތަކަށް ބޯލެނބުމަށް އެންމެންނަށް ވެސް ގޮވާލަން."
އެބޯލާގެ ހާލަތު ގޯސްވަމުންދާތީ ޔުގާންޑާގެ ހެލްތު މިނިސްޓްރީން މިހާރު ވަނީ ކޮންޓްރެކްޓް ޓްރޭސިން އިތުރުކޮށް ސިއްހީ ހިދުމަތްދޭ ތަންތަނަށް ބޭނުންވާ އިތުރު އެހީތެރިކަން ވެސް ފޯރުކޮށް ދޭން ފަށައިފަ އެވެ.
އެހާ އާންމު ނޫން ބައްޔެއް ކަމަށްވާ އެބޯލާ ޖެހުމުން ވަރަށް ގަދަ އަށް ހުން އައިސް، ބަލީގައި އެންމެ ހާލު ބޮޑުވާއިރު، ހަށިގަނޑުން ލޭ ފޭބުމުގެ މައްސަލަ ކުރިމަތިވެ އެވެ. އެބޯލާ އެންމެ ފަސޭހައިން އެކަކުގެ ގައިން އަނެކަކުގެ ގަޔަށް ނަގުލުވަނީ، ބަލި ޖެހިފައިވާ މީހާގެ ލޭގެ ޒަރީއާއިންނާއި، ކުޑަކަމުދާ ތަކެއްޗާއި ބޮޑުކަމުދާ ތަކެތި އަދި ކުޅާއި ޖިންސީ ދިޔައިގެ ޒަރީއާއިންނެވެ.
އެބޯލާ ބަލި ޖެހުމުގެ ނުރައްކާ އެންމެ ބޮޑީ އެބަލި ޖެހިފައިވާ މީހުންނާ އެކީގައި ދިރިއުޅޭ މީހުންނަށާއި، ބަލިމީހުންނަށް ފަރުވާ ދިނުމުގައި އުޅޭ ސިއްހީ ހިދުމަތްތެރިންނެވެ. އަދި މި ބައްޔަކީ މިހާތަނަށް ސީދާ ފަރުވާއެއް އަދި އެއަށް ހާއްސަ އެޕްރޫޑްގެ ވެކްސިނެއް ވެސް ނެތް ބައްޔެކެވެ.
އެބޯލާ ޖެހިގެން ޔުގާންޑާގައި 2000 ވަނަ އަހަރު 200 މީހުން މަރުވެފައިވެ އެވެ. އަދި މިހާރު ކޭސްތަކުގައި މިހާތަނަށް 29 މީހަކު މަރުވެފައިވާ އިރު، ބަލި ޖެހުނު މީނުންގެ އަދަދު 63 އަށް އަރަ އެވެ.