ކަންގަނާ ރަނާވަތުގެ ކުރިއަށް އޮފް ފިލްމް "ރިވޯލްވާ ރާނީ" ގައި އޭނާ އަަދާކޮށްފައިވާ އާދަޔާހިލާފު "ބޮލްޑް" ކެރެކްޓާގެ ސަބަބުން އެ ފިލްމު ބަލާފައި އެއްވެސް ފިރިހެނަކު އޭނާ އާ ކައިވެނި ކުރަން ބޭނުން ނުވާނެ ކަމަށް ޒުވާން ބަތަލާ ބުނެފި އެވެ.
އުމުރުން މިހާރު 27 އަހަރުގެ ކަންގަނާ ބުނީ ހުރިހާ ގޮތަކުން ބެލިޔަސް "ރިވޯލްވާ ރާނީ" ވެގެން ދާނީ ވަަރަށް ތަފާތު ފިލްމަަކަށް ކަމަށެވެ.
ފިލްމުގެ ކޮންސެޕްޓާއި އޭގައި ހިމެނޭ ކެރެކްޓާތައް އާންމުކޮށް ހިންދީ ފިލްމުތަކުން ފެންނަ ކެރެކްޓާތަކާ މާ ބޮޑަށް ވެސް ތަފާތު ވާނެ ކަމަށް ކާމިޔާބު ފިލްމުތަކެއް ކުޅެފައިވ ކަންގަނާ ބުންޏެވެ.
"ހާއްސަކޮށް އަހަރެންގެ ކެރެކްޓާ ވަރަށް ތަފާތު ވާނެ. ފިރިހެންވެރިން މި ފިލްމު ބަލާފައި ރުޅި ވެސް ގަދަވާނެ. އަހަންނަކަށް ހިއެއް ނުވޭ މި ފިލްމު ބެލުމަށް ފަހު އެއްްވެސް ފިރިހެނަކު އަހަންނާ ކައިވެނި ވެސް ކުރަން ބޭނުންވާނެ ހެންނެއް،" ފިލްމުގެ ޕްރޮމޯޝަނަލް އިވެންޓެއްގައި ކަންގަނާ ބުންޏެވެ. "އެކަމަކު މި ފިލްމު ގިނަ ބަޔަކަށް ކަމުދާނެ ކަމަށް އުންމީދު ކުރަން."
"ރިވޯލްވާ ރާނީ" ގައި ކަންގަނާ ފެނިގެން ދާނީ ފިރިހެނުންގެ މައްޗަށް ބާރު ހިންގާ "ފިރިހެނުން ސައިޒްކޮށްގެން" އުޅޭ ނުރައްކާތެރި ގޭންގްސްޓާރެއްގެ ރޯލުންނެވެ. އަދި އޭނާ ފެނިގެން ދާނީ ވެސް މޭކަޕެއް ނެތް "ހުތުރު" ޑިގްލެމް ކެރެކްޓާއަކުންނެވެ.
ކަންގަނާ އާ އެކު މި ފިލްމުން ވީރް ދާސް ވެސް މުހިއްމު ރޯލަކުން ފެނިގެން ދާނެ އެވެ.
ސައި ކަބީރު ޑައިރެެކްޓްކޮށްފައިވާ "ރިވޯލްވާ ރާނީ" ސިނަމާތަކަށް އަންނާނީ މި މަހުގެ 25 ގަ އެވެ.