ދުނިޔޭގެ ސިއްހަތު ދުވަސް ފާހަގަ ކުރުމުގެ ގޮތުން ހާއްސަ ކުޑަކުދިންގެ ހަވީރެއް ހިތަދު އާއި ހުޅުމީދޫގައި ބާއްވައިފި އެވެ.
ހިތަދޫ ރީޖަނަލް ހޮސްޕިޓަލުން އިސްނަގައިގެން ބޭއްވި ކުޑަކުދިންގެ ހަވީރު ބާއްވާފައިވަނީ ހިތަދޫ ކުޑަކުދިންގެ ޕާކްގައިއެވެ.
ޕާކްގައި ކުޑަކުދިންގެ ހަވީރު ފައްޓަވާ ދެއްވީ ހިތަދޫ ދެކުނު ދާއިރާގެ ކައުންސިލަރު މުހައްމަދު ޔަސްރިފްއެވެ. ޔަސްރިފް ވަނީ ރަނގަޅު ކާނާ ކެއުމާއި، ކަސްރަތު ކުރުމުގެ މުހިއްމު ކަމާއި ގުޅޭ ގޮތުން ވާހަކަ ދައްކަވާފަ އެވެ.
މި ކުޑަކުދިންގެ ހަވީރުގައި ހިތަދޫ ސްކޫލާއި، ޝަރަފުއްދީން ސްކޫލް، ހިތަދޫ ޕޮލިސް، އެމްއެންޑީއެފް ސަދަން އޭރިއާ އަދި ސިވިލް ފަޔާގެ ފަރާތުން ވަނީ ބައިވެރިވެފައެވެ. މި ހަވީރުގައި ހިތަދޫގެ ގިނަ އަދަދެއްގެ ކުޑަކުދިންވަނީ ބައިވެރިވެފަ އެވެ.
ސިއްހަތު ދުވަސް ފާހަގަ ކުރުމަށް ހުޅުމީދޫގައި ބޭއްވި ކުޑަކުދިންގެ ހަވީރު އިންތިޒާމް ކޮށްފައިވަނީ ހުޅުމީދޫ ސިއްހީމަރުކަޒުގެ ފަރާތުންނެވެ.
މި ހަވީރުގައި ވެސް ގިނަ އަދަދެއްގެ ކުދިންވަނީ ބައިވެރިވެފައެވެ. ހުޅުމީދޫ ސިއްހީ މަރުކަޒުން ބުނީ މި ހަރަކާތުގައި މަދިރި އާއި ތަފާތު ފަނިފަހުޒަތަކުން ފެތުރޭ ބަލިތަކާއި ގުޅޭ މައުލޫމާތު އާއްމު ރައްޔިތުންނަށް ފޯރު ކޮށްދިންކަމަށެވެ.
ހުޅުމީދޫ ސިއްހީ މަރުކަޒުން ވަނީ ސިއްހަތު ދުވަހާއި ގުޅިގެން ރެޑް ކްރެސެންޓާއި، ސ.އަތޮޅު މަދަރަސާގެ ސައިންސް ކްލަބާއި ގުޅިގެން ރޯޑް ޝޯވްއެއްވެސް ބާއްވާފަ އެވެ.