ދީނީ އިލްމުވެރިޔާ މުފްތީ މެންކް އަކީ ދިވެހިންގެ ތެރޭގައި ވެސް މަޝްހޫރު ބޭފުޅެކެވެ. އެކި ފަހަރު މަތިން އޭނާ ރާއްޖޭގައި ދަރުސް ވެސް ދެއްވާފައިވެ އެވެ. މި މަހު އަނެއްކާ ދަރުސް ޓުއާއެއްގައި ޒިންބާބުވޭގެ ދީނީ އިލްމުވެރިޔާ ރާއްޖެ ވަޑައިގަނަވާނެ އެވެ. އޭގެ ކުރިން މުފްތީ މެންކްގެ އެހެން ވާހަކައެއް ތަންކޮޅެއް ލުއިކޮށް ނަގަމާ ހިނގާށެވެ.
ތިރީގައި އެ އިން ޕޯސްޓުން އިން ފެންނަނީ ކާކު ހެއްޔެވެ؟ އެއީ މުފްތީ މެންކްއޭ ބުނެފިއްޔާ ގަބޫލުކުރަން ފަހަރުގައި ހަމަ ދަތިވެދާނެ އެވެ. ސަބަބަކީ އަހަރެމެންނަށް އޭނާ އާންމުކޮށް ފެންނަނީ ވަރަށް ހިތްގައިމުކޮށް ހުދު ޖުއްބާ ތުރުކުރައްވައިގެން ހުންނަވަނިކޮށެވެ. އެއީ މުފްތީ މެންކްގެ ޝަހިއްސަތު ވެސް ވަރަށް ބޮޑަށް ދައްކުވައިދޭ ކަމެކެވެ.
ކޮންމެއަކަސް މީގެ ދެ ދުވަސް ކުރިން ފޭސްބުކާއި އިންސްޓަގްރާމްގައި މުފްތީ މެންކް ޕޯސްޓްކުރެއްވި ފޮޓޯގައި އެ ފެންނާނީ އޭނާ "މާ ނުވައްތަރުކޮށް" އެކަމަކު "ފުލް ކިޓްގައި" ހުންނަވައިގެން ފްލައިބޯޑިން ތަޖުރިބާކުރައްވާ ތަނެވެ. މިއީ ދުބާއީގެ ދަތުރެއްގެ ބައެކެވެ. ފޮޓޯއާ އެކު ލިިޔުއްވާފައި އިނީ "ކެޕްޝަން ދިސް" އެވެ. އެ ފޮޓޯ އަށް އެތައް ހާސް ބަޔަކު ލައިކްކޮށް، ކޮމެންޓްކޮށް ޝެއާ ވެސް ކޮށްފައިވެ އެވެ.
Mufti Menk will be Touring Maldives this October.
#muftimenkmv2022 pic.twitter.com/xXr5C1VZUn— Ministry of Islamic Affairs (@MVIaffairs) October 16, 2022
މިއީ މި ފަހަރު މުފްތީ މެންކް ރާއްޖެ އަށް ކުރައްވާ ދަތުރުގެ ކުރިން ފެނުނު ހަމަ ހާއްސަ ކަމަކަށް ވެދާނެ އެވެ. ޓޫރިޒަމަށް މަޝްހޫރު ރާއްޖޭގައި ވެސް ޓޫރިސްޓުންގެ މެދުގައި ފްލައިބޯޑިން އަކީ ވަރަށް މަގުބޫލު ކަމެކެވެ. އެހެންވެ މި ފަހަރުގެ ރާއްޖެ ދަތުރުގެ ތެރެއިން މުފްތީ މެންކް ވެސް ރާއްޖޭގައި ފްލައިބޯޑިން ތަޖުރިބާކޮށްލައްވާނެ ކަމަށް އުންމީދުކުރަމާ ހިނގާށެވެ.
އިސްލާމިކް މިނިސްޓްރީގެ ދައުވަކަށް މެންކް، 47، މި ފަހަރު ރާއްޖެ އަށް ކުރައްވާ ދަތުރުގައި މި މަހުގެ 28-31 އަށް ދަރުސް ދެއްވާނެ އެވެ. އެއީ މާލެ އާއި ހުޅުމާލެ އާއި ފުވައްމުލަކާއި އައްޑޫގަ އެވެ.