(އެޕްރީލް 11، 2014 ވަނަ ދުވަހުގެ ބަޔާ ގުޅޭ)
ލިންކް ރޯޑާއި ސަރަހައްދީ ބަނދަރު
މި ފަހަރު އައްޑޫ މީހުންގެ ނަސީބު ވަރަށް ރަނގަޅެވެ. އައްޑު އަށް ލައްވާލީ 13.5 ކިލޯ މީޓަރުގެ ލިންކް ރޯޑެވެ. އައްޑޫ ޝަމްސުއްދީން ބޮޑު ފަނޑިޔާރުތަކުފާނު މަގެވެ.
އައްޑޫގައި އެ މަގު ހެދުމަށް ވާހަކަ ދެކެވި، އެތައް ޕްލޭނެއް ކުރެހި ބިޑް ކުރެވެމުންދާތާ އަހަރުތަކެއް ވެފައިވާ ބަންކަރިން ޕޯޓްގެ ބަދަލުގައި (މި ވަގުތަށް ހެއްދެވުމަށް ހަމަޖެއްސެވީ) ސަރަހައްދީ ބަނދަރާއި އެ ބަނދަރާ ގުޅިފައިވާ ދިގު މަގެވެ.
ތާރު އަޅައިގެން ރަނގަޅު ފެންވަރުގައި ހެދި މި މަގަކީ ރާއްޖޭގައިވާ އެންމެ ދިގު މަގެވެ. މޫދާ ގުޅިފައިވާ ދިމާއިން ބޮޑު ހިލަ ޖައްސައިގެން ހަދާ މި މަގުގެ ޕޭވްމަންޓާއި މަގާ ގުޅިފައިވާ ދެ ރަށް ދޭތެެރޭގެ ތަފާތު ފާލަންތަކުގެ މި ބޮޑު މަޝްރޫއު ފެށުނީ ޖުލައި 12، 2001 ގަ އެވެ.
ހަތަރު މީހުން ފިޔަވައި މުޅިން ވެސް (117 މީހުން) މަސައްކަތް ކުރީ އައްޑޫ މީހުން މަސައްކަތް ކުރި މި ޕްރޮޖެކްޓް ނިންމަން ކަނޑައަޅާފައި އޮތީ އޮކްޓޯބަރު 17، 2002 ގަ އެވެ.
ލިންކް ރޯޑްގެ މަޝްރޫއު ނިމުމާ އެކު ހެން އިއުލާން ކުރެއްވީ މުޅި އަތޮޅުގެ އުންމީދު ކަމަށްވާ ގަން އެއާޕޯޓް އިންޓަނެޝަނަލް އެއާޕޯޓަކަށް ހެއްދެވުމުގެ މަސައްކަތް އިނގިރޭސީ ކުންފުންޏަކާ ހަވާލު ކުރެވުނު ވާހަކަ އެވެ. އެއީ ސެޕްޓެމްބަރު 4، 2002 ގަ އެވެ.
މާފުށީ ޖަލުގައި ބަޑި ޖަހައި މީހުން މެރި ދުވަސް
ދެހާސް ތިން ވަނަ އަހަރު ފެށުނު އިރު ރައީސް މަައުމޫން ވަނީ ރިޔާސީ ހަ ވަނަ ދައުރަކަށް ތައްޔާރުވެ ވަޑައިގަތުމުގެ މަސައްކަތްޕުޅު ފައްޓަވާފަ އެވެ.
އެ މަނިކުފާނުގެ ރިޔާސަތަށް 25 އަހަރު ފުރޭ ރިހިޔޫބީލް ފާހަގަ ކުރާ އަހަރެވެ. އަހަރު ދެބައިވެ، ސެޕްޓެމްބަރު މަހަށް އަޅައިގަތް އިރު، އެ މަނިކުފާނަށް ހެޔޮ އެދޭހާ ބަޔަކު ވަނީ ކުރިމަތިވަމުން އަންނަ އިންތިހާބުގައި ހެޔޮ ފާހަގަ ލައިގެން ވޯޓް ދޭން ތައްޔާރުވެފަ އެވެ.
ރޭޑިއޯ، ޓީވީ އާއި ނޫސްތަކުން ކެނޑިނޭޅި ސަރުކާރުން ރައްޔިތުންނަށް ދެއްވާ ހިދުމަތްތަކުގެ އަގު ވަޒަންކޮށް ޝުކުރުގެ ގުލްދަސްތާތަކުން ވެދުން ކުރަމުން ދެ އެވެ. އައްޑޫ މީހުން ވެސް ތިބީ ލިންކް ރޯޑާއި އެއާޕޯޓްގެ ބޮޑު މަޝްރޫއުގެ ސަބަބުން ވަރަށް ބޮޑަށް ހިތްހަމަޖެހިފަ އެވެ.
މިފަދަ އަމާން މާހައުލެއްގައި އޮމާންކަމާ އެކު ރިޔާސީ އިންތިހާބުގެ ކެމްޕޭން ހިނގަމުން ދަނިކޮށް، މުޅި ރާއްޖެ ސިހިގެންދާ ފަދަ ގޮތަކަށް ހަމަ ކުއްލިއަކަށް މި އިވުނީ މާފުށީ ޖަލުގައި ހިނގި ގަތުލުއާންމެއްގެ ވާހަކަ އެވެ. ވަރަށް އަނިޔާވެރި ގޮތަކަށެވެ. އިންސާނިއްޔަތާ ހިލާފް ބޮޑު ޖަރީމާއެއްގެ ގޮތުގަ އެވެ.
ތަހުގީގަށާއި ހުކުމް ތަންފީޒު ކުރަން ޖަލުގައި ބަންދު ކުރެވޭ މީހުންނަށް އަނިޔާ ކުރުމަކީ ރާއްޖޭގެ ތާރީހުގައި އައު ކަމެއް ނޫނެވެ. އެންމެ ކުރީއްސުރެ ވެސް ސިޔާސީ ކުށްވެރިން ގަން ހިންގުވައި، ބުރިން ހަން ނަގައި، އަނދަގޮނޑީގައި ހިލިހިލާ ޖަހާފައި ބައިތިއްބާ ވާހަކައަކީ ހިނގަމުން އައި ހަގީގަތެވެ. އެއީ 1944 ވަނަ އަހަރު އެވެ. އެ ފަހުން 70 އަހަރު ވަނީ އެވެ.
ދެވަނަ ބޮޑު ހަނގުރާމައިގެ ދުވަސްވަރު އަލް އަމީރު ހަސަން ފަރީދުދީދީ އައްޑޫން ކޮޅުނބަށް ދަތުރު ކުރެއްވި އިނގިރޭސީ މަނަވަރު ޖަޕާނުގެ ކަނޑިގެ ލަޝްކަރުން ފައްތާލި ހިތާމަވެރި ހާދިސާ މުޅި ދިވެހި ގައުމު ރޮއްވާލި އެވެ. އެ މަނިކުފާނާ އެކު ދަތުރު ކުރެެއްވި އެންމެންނާ އެކު ދައުލަތުގެ ވަލިއްޔުލްއަމްރު ހަސަންފަރީދުދީދީ ނެތި ދިއުމުންނެވެ.
މި މައްސަލާގައި އެ ދީދީ ނެތިކޮށްލުމަށް ސިހުރު ހެދި ކަމަށް ތުހުމަތު ކުރެވިގެން މާލެ ގެންދެވުނު އައްޑޫ ހިތަދޫ އެޅަދީދީގެ އަލިދީދީގެ ބޭފުޅުންނާއި އެ ބޭފުޅުންގެ ތިމާގެ، ރައްޓެހި އައުލާދުންގެ ބަޔަކު ބަނޑޭރި ގޭގައި ބަންދުކޮށް ގަސްތުގައި ބަނޑު ޖައްސައި، ބުރިން ހަން ނަގައި އަރުވާލި ވާހަކައިގައި ވަނީ އަނިޔާވެރި ކަމެވެ.
އަދިވެސް އިވެނީ ޖަލުގައި ދޭ އަނިޔާގެ ވާހަކަ އެވެ. މިހާރު އޮތީ ކުޑަ ގޮޅީގައި ގިނަ ދުވަހު އެކަނި ބަންދު ކުރުމާއި އެންގަލަށް ނެގުމާއި ބިޑި ފަތީގައި އެމުނުން ފަދަ އަދަބެވެ. ބަދަލުވީ ވައްޓަފާޅި އެވެ. އަސްލަކަށް ބަދަލެއް ނާދެ އެވެ. (ނުނިމޭ)
ނޯޓް: މިއީ ފޭދޫ އަލީ ފަހުމީ އަހުމަދު ސެޕްޓެމްބަރު 25، 2013 ގައި ނެރުއްވި "އައްޑޫ ގަން ހިންގުން" މި ފޮތެވެ.
"އައްޑޫ ލައިވް" ގައި މި ފޮތް ސިލްސިލާއެއްގެ ގޮތުގައި ޝާއިއު ކުރަން ހަދިޔާ ކުރެއްވި ކަމަށްޓަކައި، މި ނޫހުގެ ފަރާތުން ފަހުމީ އަށް ހާއްސަ ޝުކުރެއް އަރިސް ކުރަމެވެ.