ދައުލަތުގެ ބަޖެޓުން ޙަރަދު ކުޑަކުރުމުގެ ގޮތުން 3 ބިލިއަން ރުފިޔާ ޙަރަދު ކުޑަކުރުމަށް ހުށަހަޅާފައިވާނެ ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.
ރައްޔިތުންގެ މަޖިލީހުގެ ދައުލަތުގެ ބަޖެޓު ހުށަޙަޅުއްވަމުން އަމީރު ވިދާޅުވީ، މިއަހަރު ޙަރަދު ބަޖެޓުން ޙަރަދު ކުޑަކުރުމުގެ ސިޔާސަތުތަކެއް ހިމަނާފައިވާނެ ކަމަށެވެ. އެގޮތުން ޖުމްލަ 3 ބިލިޔަ ރުފިޔާ ކުޑަ ކުރުމަށް ހިމަނާފައިވެ އެވެ. މީގެ ތެރޭގައި ތެލަށް ދެވޭ ސަބްސިޑީ އިތުރު ކުރުމުގެ ބަދަލުގައި ޓާގެޓެޑް ސަބްސިޑީއަކަށް ބަދަލުކުރުން ހިމެނެ އެވެ.
ދައުލަތުގެ ބަޖެޓުން ތެލަށް ދެވޭ ސަބްސިޑީ ޓާގެޓެޑް ސަބްސިޑީއަކަށް ހަދަން ހުށަހަޅާފައި ވަނީ ތަލަށް ދުނިޔޭގެ ބާޒާރުގައި ތެލުގެ އަގު އުފުލި، އަގުތަށް ހިފެހެއްޓުމަށް ތެލަށް ދެވޭ ސަބްސިޑީ އިތުރުވުމުގެ ސަބަބުން ދައުލަތުގެ ޙަރަދުތައް އިތުރުވެފައިވާ ކަމަށް ސަރުކާރުން ހާމަކޮށްފައިވާ ދަނޑިވަޅެއްގަ އެވެ.
މީގެ އިތުރުން އާސަންދައިން ކުރެވޭ އިސްރާފު ކުޑަ ކުރުމަށް ސިޔާސަތު ބަދަލު ކުރުމަށް ބަޖެޓުގައި ހިމެނިފައިވާ ކަމަށް އަމީރު ވިދާޅުވި އެވެ.
"އެގޮތުން، އަގުހެޔޮކޮށް، ބޭސް ހޯދޭނެ ގޮތްތައް ހޯދުމާއި، އާސަންދައިގެ ބޭސްލައިން އަގުތައް މުރާޖަޢާކުރުން ފަދަ ސިޔާސަތުތަކަށް ގެންނަ ބަދަލުތައް ހިމެނޭ." އަމީރު ވިދާޅުވި އެވެ.
އަދި ޖުމްލަ ގޮތެއްގައި ޙަރަދުތައް ކުޑަ ކުރުމަށް އަޅާފައިވާ ފިޔަވަޅުތައް ދަމަހައްޓައި ޙަރަދު އެފިޝަންސީ މަތި ކުރެވޭނެ ކަމަށް އަމީރު ވިދާޅުވިއެވެ.
މިއަހަރު ދައުލަތުގެ ބަޖެޓުގެ ގޮތުގައި 42.6 ބިލިއަން ރުފިޔާ ވަނީ ހުށަހަޅައިފަ އެވެ. މީގެ ތެރެއިން ޙަރަދުގެ ގޮތުގައި ހިންގާނީ 40.6 ބިލިއަން ރުފިޔާ އެވެ. އެއީ ރިކަރެންޓް ޙަރަދުގެ 28.6 ބިލިއަން ރުފިޔާ އަދި ކެޕިޓަލް ޙަރަދުގެ 14.1 ބިލިއަން ރުފިޔާ އެވެ.