އަބަދުވެސް ދައްކާ ވާހަކައެވެ. އަތޮޅުތަކަށް ކަމެއް ކުރަންޏާ އެކަމެއް ސަރުކާރުން ކުރާނީ އެކަމެއްގެ އެންމެ ދޯދިޔާ، ގޮތަށެވެ. ނަމެއްގައި ކަމެއް ކުރުމުގެ އުސޫލުންނެވެ. އަދި "ވަގުތީ" ކަމެއް ގޮތުގައެވެ.
އެކަން މިފަހަރު ރާއްޖޭގައި ބާއްވާ އޭއެފްސީ ޗެލެންޖް ކަޕްގެ ތައްޔާރީން ވެސް މިދަނީ ފެންނަމުންނެވެ. މާލެ އާއި އައްޑޫގައި އޭއެފްސީގެ މެޗްތައް ކުޅެން ނިންމި އިރު ގަލޮޅު ދަނޑާއި ހިތަދޫ ޒޯން ސްޓޭޑިއަމްއަށް ބޮޑެތި ބަދަލުތަކެއް ގެންނަންޖެހެއެވެ. ރާއްޖޭގެ ސިޔާސީ މަސްރަހް ދެމިގެން ދިޔަ ގޮތުން ޗެލެންޖް ކަޕް ރާއްޖޭގައި ނުބޭއްވިދާނެ ކަމުގެ ވާހަކަތަކެއް ވެސް ދެކެވުނެވެ. ނަމަވެސް ސަރުކާރުން މުބާރާތް ބޭއްވޭނެ ކަމުގެ ފުރިހަމަ ޔަގީންކަން ދީ ދަނޑުތައް އޭއެފްސީ ގަބޫލް ކުރާ ފެންވަރަށް ތަރައްޤީ ކުރުމުގެ މަސައްކަތް ފެށިއެވެ.
އެގޮތުން ދަނޑުތައް މަރާމާތު ކުރުމަށް ރަސްމީކޮށް އަމީން ކޮންސްޓަރަކްޝަން އާއި ހަވާލުކޮށް ކުރީ 14 ޖެނުއަރީގައެވެ.
ހިތަދޫ ޒޯން ސްޓޭޑިއަމްގެ މިހާރު ހުރި، ސިޑިބަރި ދެ ފަރާތުން ބޮޑުކޮށް، ސިޑިބަރީގެ ދަށުގައި އެކިއެކި ކަންކަމަށް ބޭނުން ކުރާނެ ރޫމްތައް ވަނީ ހަދާފައެވެ.
ދަނޑުގެ މަސައްކަތް ފެށިއިރު ދަނޑުގެ ސިޑި ބަރި މުޅިން ހިޔާކުރާ ގޮތަށް އޮތީ ނިމިފައެވެ. އެކަން ދަނޑު ނިމުމުން ހުންނަ ގޮތުގެ ކުރެހުމުންވެސް އެހެރީ ފެންނާށެވެ. އެކަމަކު "ވަގުތު ނެތިގެން" މިވަގުތު ހިޔާ ކުރެވުނީ ވިއައިޕީން ތިބޭ ތަނެވެ.
މަސައްކަތުގެ ބޮޑު ބައެއް ނިމިއްޖެއެވެ. އެކަމަކު މަސައްކަތުގެ ކޮލެޓީ މިނިސްޓްރީއަކަށް ނުބެލުނެވެ. ސިޑި ބަރީގެ ކޮންކްރީޓް މަސައްކަތް ކުރީ ރަނގަޅަށް ހެއްޔެވެ؟ އެކަން ބެލީ ސަރުކާރުގެ ކަމާއި ބެހޭ ކޮން ފަރާތަކުން ހެއްޔެވެ.
ވަގުތު ނެތިގެން އަވަސް އަރުވާލައިގެން އަތަށް ފަސޭހަ ގޮތަކަށް ނިންމާލީ ކިތައް މަސައްކަތް ތޯއެވެ.
ސްޓޭޑިއަމް އާއި ގުޅިގެން މިހާތަނަށް ލިބުނު އެންމެ ހައިރާން ކުރުވަނިވި ހަބަރަކީ ދަނޑުގެ ވީއައިޕީގައި ބޭނުން ކުރުމަށް ކޮންވެންޝަން ސެންޓަރުގައި ތިބި ގޮނޑި ބޭނުން ކުރާ ވާހަކައެވެ. އަދި މާލޭ ސްޓޭޑިއަމްއަށް ބިޑްކޮށްގެން އާ ގޮނޑި ގަންނަ ވާހަކައެވެ.
ސަރުކާރުން ބޮޑު ހަރަދެއްކޮށްގެން ދެ ސްޓޭޑިއަމް ތަރައްޤީކުރާއިރު ވަގުތު ނެތިގެން އެއް ސްޓޭޑިއަމްއަށް ބޭނުންވާ ގޮނޑި ނުގަނެވެއެވެ. އެކަމަކު އެއް ދުވަހެއްގައި ފަށާ މުބާރާތަށް ދެވަަނަ ސްޓޭޑިއަމްގެ ބޭނުމަށް ގޮނޑި ގަންނަން ކޮންމެހެން ވެސް ޖެހެއެވެ. އެކަމަށް ވަގުތު އެބައޮތެވެ.
ވަގުތު ނެތިގެން ނަމަ މާލޭގެ ކޮންމެ ވެސް ތަަނަކުން ގަލޮޅު ދަނޑަށް ބޭނުން ކޮށްލަން ކުއްޔަށް ގޮޑިތަކެއް ނަގަންވީއެވެ. އެކަމަކު އެގޮތަކަށް އެކަން ކުރާކަށް މިނިސްޓްރީއަކުން ނިންމާފައި ނެތެވެ.
ސަރުކާރުން ތަފާތު ކުރުން ގެން ގުޅޭ މިންވަރު ހާމަކޮށްދޭ އަނެއް ކަމަކީ ހިތަދޫ ސްޓޭޑިއަމްގައި ޖަހާ ލައިޓެވެ. ކުރިން ބުނަމުން ދިޔައީ ފެންވަރު ރަނގަޅު ލައިޓީން ސިސްޓަމެއް ޖެހުމުގެ ވާހަކައެވެ. އެކަމަށް މިނިސްޓްރީން މަސައްކަތްވެސް ކުރިއެވެ. އެކަމަކު ލައިޓިން ސިސްޓަމެއް ގެންނަ ނަމަ ގެންނަން ޖެހެނީ ގަލޮޅު ދަނޑުގައި މިވަގުތު ހުރި ލައިޓިން ސިސްޓަމަށް ވުރެ ފެންވަރު ރަނގަޅު ލައިޓިން ސިސްޓަމެކެވެ، އެކަން މިނިސްޓްރީ އާއި އެފްއޭއެމްގެ ބައެއް ބޭފުޅުންނަށް ކަމަކު ނުދިޔައެވެ.
ދެން ވިސްނީ ގެނެސް ހަރުކުރުމަށް ފަހު ފަހުން އަނބުރާ ގެންދާ ގޮތަށް ކޮންމެވެސް ތަނަކުން ލައިޓިން ސިސްޓަމެއް ހޯދާށެވެ. އަވައްޓެރި ލަންކާގެ ސަރުކާރުގައި އެދިގެން އެންމެ ފަހުން "ވަގުތީ" ލައިޓިން ސިސްޓަމެއް ލިބިއްޖެއެވެ. އެކަމަށް މިހާރު ސާވޭއެއްވެސް ހަދައިފިއެވެ. .
ބައިނަލް އަގްވާމީ މުބާރާތެއް ބޭއްވުމަށް ތައްޔާރު ކުރި ދަނޑުގެ ފަށައިގެން ޖަހާފައި ހުރި ފެންސަކީވެސް ސަރުކާރުން އައްޑޫގެ ދަނޑު ތަރައްޤީ ކުރުމަށް ދެއްވާ އަހަމިއްޔަތުގެ ރަމްޒެކެވެ. އާދައިގެ ގޮތަކަށް "އަތައް ފަސޭހަ" ގޮތަކަށް ޖަހާފައިވާ ފެންސް އެހެރީ އެންމެންނަށް ފެންނާށެވެ. ގޮސް ފެންވަރު ވަޒަން ކޮށްލާށެވެ.