(އެޕްރީލް 24، 2014 ވަނަ ދުވަހުގެ ބަޔާ ގުޅޭ)
ޒުވާން ކެބިނެޓްގެ ބައު ލިބާސް
ރައީސް މައުމޫނުގެ ޒައާމަތުގެ އެންމެ ފަހު ދުވަސްތައް ގުނެމުން ދިޔަ އިރު، ސަރުކާރުގެ އެތެރެ އާއި ބޭރުން ކުރިމަތިވަޑައިގަތް ދުއްތުރާތައް ވަރަށް ބޮޑެވެ. [މި މުހިއްމު ވަގުތ އެ މަނިކުފާން އިސްލާހީ އެޖެންޑާ ތަންފީޒު ކުރުމާ ހަވާލު ކުރެއްވި ޒުވާން އައު ބޭފުޅުންކޮޅަކާ އެވެ. ގާބިލް އިލްމީ ބޭފުޅުންނެވެ.
އިހުލާސްތެރިކަމާ އެކު ގިނަ ދުވަހު ހިދުމަތްކޮށް ދެއްވި ނުހަނު ތިމާގެ ގާތް ބޭފުޅުން ކަމަށްވާ ފަތުހުﷲ ޖަމީލާއި ޑރ. މުހައްމަދު ޒާހިރު ހުސައިން އަދި އަބްދުﷲ ހަމީދު ފަދަ ބޭފުޅުން އެއްފަރާތްކޮށް ލައްވައިފަ އެވެ.
ފަތިން ގޮސްފައިވާ އެ ބޭފުޅުންގެ ކޯޓްތައް ދެއްވީ ޑރ. މުހައްމަދު ޖަމީލް އަހުމަދާއި ޑރ. ހަސަން ސައީދާއި ޑރ. އަހުމަދު ޝަހީދު ފަދަ ޒުވާން ބޭފުޅުންނަށެވެ.
ގަޔަށް ހެޔޮވަރުވޭތޯ ބައްލަވާނެ ވަގުތެއް ވެސް ނުލިބި ލެއްވި ކޯޓްކޮޅުތަކާ އެކު އެ ބޭފުޅުން ފެންނަމުން ދިޔައީ އައިބު ގޮތަކަށެވެ. އެކަމަކު އެއީ ވަރަށް ގިނަ ރައްޔިތުންގެ އެދުމެވެ. އިސްލާހަށް އެދި ގޮވާ މީހުންގެ ގޮވެލިފަތީގެ އަޑެވެ.
ނަމަވެސް އަލަށް ކެބިނެޓަށް މި ގެންނެވި ބައެއް ވަޒީރުންނަށް އިހުލާސްތެރިކަމާ އެކު މަސްއޫލިއްޔަތު އަދާކުރެވެމުން ނުދާ ކަމަށް ހުދު ޒައާމަތުގެ ތެރެއިން ވެސް ދިޔައީ ތުހުމަތު ކުރައްވަމުންނެވެ. އެކަމަކު ރައީސް މައުމޫންގެ އިތުބާރު އެ ބޭފުޅުންނަށް އޮތެވެ. ވުމާ އެކު ޑީއާރްޕީ ހިންގެވުމުގެ މަސްއޫލިއްޔަތު ވެސް އުފުއްލެވީ އެ ބޭފުޅުންނެވެ.
ކޮންމެއަކަސް އެ ދުވަސްވަރު ބައެއް ވަޒީރުންނާއި އެ ދަރަޖައިގެ ބައެއް އެހެން ވެރިންގެ ތެރޭގައި އެ ބޭފުޅުންގެ އަމިއްލަ މަސްލަހަތު އިސް ކުރައްވައިގެން ތިއްބެވި ބޭފުޅުން އުޅުއްވިކަން ފާހަގަ ކުރެވެ އެވެ. އޭގެ ތެރެއިން ބައެއް ބޭފުޅުންނަކީ ކުރިއަށް އޮތް ރިޔާސީ އިންތިހާބަށް ކުރިމަތިލެއްވުމުގެ އުންމީދުގައި ތިއްބެވި ބޭފުޅުންނެެވެ.
ބައެއް ބޭފުޅުން އިންތިޒާރު ކުރައްވަމުން ގެންދެވީ ކުރިއަށް އޮތް ރައްޔިތުންގެ މަޖިލީހުގެ މެމްބަރު ކަމަށެވެ. ވީމާ އެ ބޭފުޅުންނަށް ވެސް ރައްޔިތުންގެ ރުހުން ނުހަނު ބޭނުންވެ އެވެ.
މިސާލަކަށް ބަލާލަމާތޯ އެވެ. އައްޑޫގެ އަތޮޅުވެރިކަން އެ އަތޮޅުގެ ބޭފުޅަކަށް ނުދެއްވާތާ ވިއްސަކަށް އަހަރަށް ވުރެ ވެސް ގިނަ ދުވަސްވެފައި ވަނިކޮށް އެޓާނީ ޖެނެރަލް ޑރ. ހަސަން ސައީދުގެ ބޭބެ ހުސައިން ސައީދު އެ މަގާމަށް މަތިކުރެއްވުން ބައްލަވާށެވެ.
ރިޔާސީ އިންތިހާބު ބޯމަތިވަމުން އަންނަނިކޮށެވެ. ޑިމޮކްރަސީ އަށް މަސައްކަތް ކުރައްވާ އިދިކޮޅު ފަރާތްތަކަށް އައްޑޫގެ ތަރުހީބު އޮހެމުން ދަނިކޮށެވެ.
މިފަދަ ވަގުތަކާ ދިމާކޮށް އައްޑޫގެ އަތޮޅުވެރިކަން ހުސައިން ސައީދު ފަދަ ބޭފުޅަކާ ހަވާލު ކުރެއްވުން އެއީ އެޅުއްވި ޅައެއްޗެއް ކަމަށް އަބްދުﷲ ޔާމީން މި ވެރިކަމުގެ ވައްޓަފާޅި އާ ދުރު ފެށުނީއްސުރެ ޝަކުވާ ދަންނަވަމުން ދިޔަ ކަމަށްވެ އެވެ. ޔާމީނަކީ އެވަގުތު ސަރުކާރުގައި ހުންނެވި އެންމެ ނުފޫޒު ގަފަ ވަޒީރެވެ.
ރައީސް މައުމޫންގެ ކޮއްކޯފުޅެވެ. އެންމެ ފަހުން ކެބިނެޓްގެ މަގާމުތަކަށް ބޮޑެތި ބަދަލުތަކެއް ގެންނެވި އިރު، އެ ބޭފުޅާ އާ ހަވާލު ކުރެއްވީ ރައްޔިތުންނާ އެންމެ ގާތުން ހިދުމަތް ދެއްވާ ސަރުކާރުގެ ތިން ވުޒާރާއެއް މަަސައްކަތް ޓުކުރިއަކަށް ލައްވާފަ އެވެ. މިނިސްޓްރީ އޮފް ހަޔަ އެޑިއުކޭޝަން އެމްޕްލޯއިމަންޓް އެންޑް ވެލްފެއާ އެވެ. އަދި އައްޑޫގެ އެންމެ ގިނަ ވަޒީފާތަކާއި ކާރޫބާރޫ އޮތް އެސްޓީއޯ އާއި ސްޓެލްކޯގެ ވެސް ޗެއާމަނަކީ ޔާމީނެވެ.
ނަމަވެސް އައްޑު އަތޮޅުގެ އަތޮޅުވެރިކަމުގެ ފަތްކޮޅު އެރުވީ ޔާމީން ރުހިވަޑައިގަންނަވާ ފަރާތަކާ ނޫނެވެ. ވުމާއެކު އާދަކާދަތަކާ ހިލާފަށް މި އެޅުއްވި ފިޔަވަޅު ގަބޫލް ކުރައްވާކަށް އެހާ ފަސޭހަފުޅެއް ނުވި އެވެ.
ކަން ހިނގި މަގަކީ ޔާމީނުގެ ފަހަތްޕުޅުން އައްޑޫގެ ކަންތައްތައް ބެލެހެއްޓުމާ ހަވާލު ކުރެވިފައިވާ ފަދަ ގޮތަކަށް އަބަދު ވެސް މަސައްކަތް ކުރައްވަމުން ދިޔަ ހިޔަލީ މުހައްމަދު ރަޝީދު އާއި އޭނާގެ ވާގިވެރިން ހުސައިން ސައީދު އަތޮޅުވެރި ކަމަށް ފާޅުގައި ފާޑުކިޔުއްވަން ފެއްޓެވުމެވެ.
ނަމަވެސް ނަތީޖާ ފެނިގެން ދިޔައީ ވަރަށް ތަފާތު ގޮތަކަށެވެ. ހުސައިން ސައީދު ވީ ރައީސް މައުމޫން ނުހަނު އިތުބާރު ކުރައްވާ އަތޮޅުވެރިއަކަށެވެ. ހިޔަލީ އެސްޓީއޯ އިން ބޭރުކޮށްލެއްވީ އެވެ.
އެސްޓީއޯ އައްޑޫ މެނޭޖަރު ވެސް އެ މަގާމުން ވަކި ކުރެއްވީ އެވެ. މި ބަދަލުތައް ވެގެން ދިޔައީ އައްޑޫން ޔާމީންގެ ބާރާއި ނުފޫޒު ދެރަކޮށްލެއްވުމަށް އެޅުއްވުނު ފިޔަވަޅަކަށެވެ. ޑރ. ހަސަން ސައީދާ މެދު އަނދަމުން ދިޔަ ސިޔާސީ ވާދަވެރިކަމުގެ އަލިފާނަށް ދަރު އެޅުން ފަދަ ކަމަށެވެ.
ޔާމީނާއި މި އަލިފާނުގައި އަނދަމުންދާ ރައީސް މައުމޫނުގެ ޒައާމަތާ މެދު ވިސްނާކަށް ވެސް ފުރުސަތެއް ނެތެވެ. އެ ބޭފުޅުންގެ އަމިއްލަ އެޖެންޑާގެ މުހިއްމުކަން އެއަށް ވުރެ ބޮޑެވެ. ވަގުތެއް ވެސް ނެތެވެ. އެހެންކަމުން އެ ބޭފުޅުންނަށް އަޅުއްވަން ޖެހިފައި އޮތީ އަވަސް އަދި ހަލުވި ފިޔަވަޅުތަކެކެވެ.
ފަހަތަށް ބަލާކަށް ވެސްް ފުރުސަތެއް ނެތެވެ. ދެ ފަރާތުން ހަމަލާތައް ބަދަލު ކުރަމުން ދިޔަ ވަގުތެވެ. ވަރަށް ގިނަ ބައެއްގެ ހީ އާ ހިލާފަށް އެހާ ވަގުތު ކުޑަތަންކޮށް ރައީސް މައުމޫން ރިޔާސީ އިންތިހާބްގައި ވާދަ ކުރެއްވުމަށް ނިންމެވި ދުވަސްކޮޅެވެ.
ކެމްޕޭންގެ ފޯރި ގަދަވެގަތް ވަގުތެވެ. ކުއްލިއަކަށް ފެނިގެން ދިޔައީ އެޓާނީ ޖެނެރަލް ޑރ. ހަސަން ސައީދާއި ޖަސްޓިސް މިނިސްޓަރު ޑރ. މުހައްމަދު ޖަމީލް އަހުމަދާއި ފޮރިން މިނިސްޓަރު އަހުމަދު ޝަހީދު މަގާމުން އިސްތިއުފާ ދެއްވި ތަނެވެ.
އެ ބޭފުޅުންނާ ހަވާލު ކުރެވުނު ސަރުކާރާއި ރައީސް މައުމޫންގެ ޑީއާރްޕީ ދޫކޮށްލައްވައިފަ އެވެ. މުޅި ގައުމް ހައިރާންކޮށްލައިފަ އެވެ. އިސްތިއުފާ ދެއްވުމަށް ފަހު އޮތް ނޫސް ކޮންފަރެންސެއްގަ އެވެ. (ނުނިމޭ)
ނޯޓް: މިއީ ފޭދޫ އަލީ ފަހުމީ އަހުމަދު ސެޕްޓެމްބަރު 25، 2013 ގައި ނެރުއްވި "އައްޑޫ ގަން ހިންގުން" މި ފޮތެވެ.
"އައްޑޫ ލައިވް" ގައި މި ފޮތް ސިލްސިލާއެއްގެ ގޮތުގައި ޝާއިއު ކުރަން ހަދިޔާ ކުރެއްވި ކަމަށްޓަކައި، މި ނޫހުގެ ފަރާތުން ފަހުމީ އަށް ހާއްސަ ޝުކުރެއް އަރިސް ކުރަމެވެ.