ބަނގުރާ ގެންގުޅުނު ކަމުގެ ތުހުމަތުގައި ހދ. ހޮނޑައިދޫން ހައްޔަރު ކުރި ހއ. އަލިދޫ ރިސޯޓުގެ ޖެނެރަލް މެނޭޖަރު ސ. ހުޅުދޫ ރީފްސައިޑް ޖާދުﷲ ޖަމީލް ހޯދުމަށް ފުލުހުން އިއުލާން ކޮށްފި އެވެ.
ފުލުހުން ބުނީ ޖާދުﷲ ހޯދުމަށް އިއުލާންކޮށްފައި ވަނީ ބަންދުގައި ބަހައްޓައިގެން އޭނާ ޝަރީއަތަށް ހާޒިރުކޮށްދިނުމަށް ފުލުހުންގެ މައްޗަށް ކްރިމިނަލް ކޯޓުން ނެރެފައިވާ އަމުރަކާ ގުޅިގެންކަމަށެވެ.
ކްރިމިނަލް ކޯޓަށް ހުށަހެޅިފައިވާ ބަނގުރާ ގެންގުޅުމުގެ ކުށުގެ މައްސަލައިގެ ޝަރީއަތަށް ހާޒިރުވާން ކޯޓަށް ހާޒިރުވުމުގެ އަމުރު ހަވާލުކުރަން އެތައްފަހަރެއްގެ މަތިން ކުރި މަސައްކަތުން ވެސް ޖާދުﷲ އަށް އަމުރު ހަވާލުކުރެވިފައިނުވާ ކަމަށް ފުލުހުން ބުންޏެވެ.
އެހެންކަމުން ޖާދުﷲ އުޅޭތަނެއްގެ މައުލޫމާތު ލިބިފައިވާ ފަރާތެއްވާނަމަ މޯލްޑިވްސް ޕޮލިސް ސާވިސްގެ ހޮޓްލައިން 3322111 އަށް ނުވަތަ ޕޮލިސް ކަސްޓޯޑިއަލް ޑިޕާޓްމަންޓްގެ ނަމްބަރު 9991442 އަށް ގުޅައި މައުލޫމާތު ހިއްސާކުރުމަށް ފުލުހުން ވަނީ އެދިފަ އެވެ.
ބަނގުރާ ގެންގުޅުމުގެ ދައުވާގެ އިތުރުން ކުޑަކަމުދާ އެއްޗިހި ދިނުމަށް އިންކާރުކުރުމުގެ ކުށުގެ ދައުވާ ވެސް ދައުލަތުން ވަނީ އޭނާގެ މައްޗަށް އުފުލާއިފަ އެވެ.
އަދި އޭނާގެ މައްޗަށް ދައުލަތުން ކުރާ ކެނަބިހުން މުއާމަލާތް ކުރުމުގެ ކުށުގެ ދައުވާ އަށް އޭނާ ވަނީ އިންކާރު ކޮށްފައެވެ.