މީދޫ މެޖިސްޓްރޭޓް ކޯޓުގެ ކޯޓް އިސްމެޖިސްޓްރޭޓްކަމަށް އައްޔަން ކުރެއްވި މީދޫ ދޮންދީދީމަންޒިލް އައްޝައިޙް މުޙައްމަދު ޠައްޔިބު މަގާމުގެ ހުވާ މިއަދު ކުރައްވައިފިއެވެ.
ޖުޑީޝަލް ސަރވިސް ކޮމިޝަނުގައި މިއަދު ބޭއްވި ރަސްމިއްޔާތުގައި ފަނޑިޔާރުކަމުގެ ހުވައިލައިދެއްވީ ސުޕްރީމް ކޯޓުގެ ފަނޑިޔާރު އަލްއުސްތާޛު ޢަބްދުﷲ ޢަރީފެވެ. މިރަސްމިއްޔާތުގައި އިތުރު ހަ ބެފުޅަކުވެސް ވަނީ ހުވާ ކުރައްވައި މަގާމުގެ ފަތްކޮޅު ލިބިގެންފައިއެވެ.
މިއަދު ފަނޑިޔާރުކަމުގެ ހުވާކުރެއްވި ބޭފުޅުންނަށް މަޤާމުގެ ފަތްކޮޅު ދެއްވީ ޖުޑީޝަލް ސަރވިސް ކޮމިޝަންގެ ނާއިބުރައީސް އަލްއުސްތާޛު ޢަބްދުﷲ ދީދީއެވެ. މިއަދު މަޤާމުގެ ހުވާކުރައްވައި ފަތްކޮޅު ލިބިވަޑައިގެންނެވި ބޭފުޅުންނަކީ
ރ. މަޑުއްވަރީ މެޖިސްޓްރޭޓް ކޯޓުގެ ކޯޓް އިސްމެޖިސްޓްރޭޓްކަމަށް ޅ. ކުރެންދޫ ބޮޑުގަސްދޮށުގޭ އަލްއުސްތާޛު ޙުސައިން އިބްރާހީމް އާއި ރ. މާކުރަތު މެޖިސްޓްރޭޓް ކޯޓުގެ ކޯޓް އިސްމެޖިސްޓްރޭޓްކަމަށް، އެރަށު ޖަވާހިރުމާގޭ އަލްއުސްތާޛު ޢަދުނާން ޙުސައިން އާއި ބ. ހިތާދޫ މެޖިސްޓްރޭޓް ކޯޓުގެ ކޯޓް އިސްމެޖިސްޓްރޭޓްކަމަށް، އެރަށު ރަނައުރާގޭ އަލްއުސްތާޛާ އުއްމުކުލްސޫމް އަބޫބަކުރުއެވެ.
މީގެ އިތުރުން ބ. ދަރަވަންދޫ މެޖިސްޓްރޭޓް ކޯޓުގެ ކޯޓް އިސްމެޖިސްޓްރޭޓްކަމަށް، ބ.މާޅޮހު ނަފާޕެލަސް އަލްފަޟިލް ޢަބްދުރަޝީދު ޔޫސުފު އާއި ކ. ގާފަރު މެޖިސްޓްރޭޓް ކޯޓުގެ ކޯޓް އިސްމެޖިސްޓްރޭޓްކަމަށް، ސ.ފޭދޫ ބެލޫން އަލްއުސްތާޛާ މަރިޔަމް ވަޙީދު އާއި އދ. ފެންފުށީ މެޖިސްޓްރޭޓް ކޯޓުގެ ކޯޓް އިސްމެޖިސްޓްރޭޓްކަމަށް، ގަލޮޅު ނޫރާނީވިލާ އަލްއުސްތާޛާ ޝީރީން ނާހިދާ ލަޠީފު އެވެ.