ހޮލީވުޑްގެ އެންމެ ޝަރަފުވެރި އެވޯޑް ހަފުލާ ކަމަށްވާ މި އަހަރުގެ އޮސްކާ ނިންމާލި އިރު، އެންމެ ހިޓް ކަމަކަށްވެފައި އޮތީ، އެ ހަފުލާގެ ހޯސްޓް، މަޝްހޫރު ގިނަ ތަރިންތަކަކާ އެކު ނެގި ސެލްފީ އެވެ.
ފެބްރުއަރީ މަހު ބޭއްވި އޮސްކާ ހަފުލާ ހުށަހަޅައި ދިން އެލެން ޑިޖެނެރަސް އާ އެކު އެ ސެލްފީން ފެނިގެން ދިޔަ ތަރިންގެ ތެރޭގައި ޖެނިފާ ލޯރެންސް، ބްރެޑް ޕިޓާއި އޭނާގެ އަންހެނުން އަދި ބަތަލާ އެންޖެލީނާ ޖޯލީ، ބްރެޑްލީ ކޫޕާ، މެރީލް ސްޓްރީޕް، ކެވިން ސްޕޭސީ އަދި ޖޫލިއާ ރޮބަޓްސް ފަދަ ތަރިން ހިމެނެ އެވެ.
އެ ސެލްފީ މުޅި ދުނިޔޭގައި ވައިރަހެއްހެން ފެތުރި، ގިނަ ބައެއްގެ ސަމާލުކަން ހޯދި އެވެ.
އެ ސެފްލީން ހިތްވަރު ލިބިގެން މި ފަހަރު މި އޮތީ ބޮލީވުޑްގެ ސެލްފީއެކެވެ. މި ސެލްފީ ނަގާފައި ވަނީ އިއްޔެ ރޭ އެމެރިކާގެ ފްލޮރިޑާގެ ޓަމްޕާ ބޭގައި ބޭއްވި އައިފާ އެވޯޑް ހަފުލާ ނިންމާލުމަށް ފަހު އެވެ.
ސެލްފީ ނެގީ އައިފާ އެވޯޑް ފަރްހާން އަހްތަރާ އެކު ހުށަހަޅައި ދިން ޝާހިދު ކަޕޫރެވެ. އޭނާގެ ޓްވިޓާގައި މި ސެލްފީ ވަނީ ޕޯސްޓް ވެސް ކޮށްފަ އެވެ. އެ ސެލްފީން ބޮލީވުޑްގެ ބައެއް ތަރިންނާ އެކު ހޮލީވުޑްގެ ތަރި ކެވިން ސްޕޭސީ ވެސް ފެނެ އެވެ.
އެ ސެލްފީގައި ފެންނަ ތަރިންގެ ތެރޭގައި ފަރްހާން، ސަތުރަގަން ސިންހާ އާއި އޭނާގެ އަންހެން ދަރި އަދި ބަތަލާ ސޮނާކްޝީ ސިންހާ އާއި އޭނާގެ ބޭބެ ލަވް ސިންހާ އަދި އަނިލް ކަޕޫރު ހިމެނެ އެވެ.
އެމެރިކާގައި ބޭއްވި އައިފާ އެވޯޑް ހަފުލާގައި ބޮލީވުޑްގެ މަޝްހޫރު ހުރިހާ ފަންނާނުހެން ބައިވެރިވެފައިވެ އެވެ. މި ހަފުލާ އިން ހޮލީވުޑްގެ ތަރިންގެ ތެރެއިން ކެވިން ސްޕޭސީ އާއި ޖޯން ޓްރެވަލްޓާ ފަދަ ތަރިން ވެސް ފެނިގެން ގޮސްފައިވެ އެވެ.