(އެޕްރީލް 30، 2014 ވަނަ ދުވަހުގެ ބަޔާ ގުޅޭ)
ސުލްހަވެރި މުޒާހަރާއަކަށް ފާޅުފައި ދިން ފުރަތަމަ ހަމަލާ
އެއީ މޭ 14، 2006 އެވެ. ގާނޫނު އަސާސީ އިސްލާހު ކުރަން ގޮވާލައި ކުރި މުޒާހަރާ އެވެ. ރައްޔިތުންގެ ހާއްސަ މަޖިލީހަށް ރައީސުލްޖުމްހުރިއްޔާ އައްޔަން ކުރައްވާފައިވާ 29 މެމްބަރުން އުނިކޮށް ދެއްވުމަށް އެދި ގޮވާލި މުޒާހަރާ އެވެ.
ރޭގަނޑު 8:30 ފެށި މުޒާހަރާގެ އެތައް ސަތޭކަ ބައިވެރިންނާ އެކު މަޖީދީ މަގުން ކުރިމަތިލީ ދެކޮޅުވެރި ގްރޫޕްތަކުން ދިމާކޮށް ހަމަލާ ދޭން ފެށި އެވެ. ގަލާއި ފުޅިފަދަ ތަކެތިންނެވެ.
މިއީ މިފަދަ މުޒާހަރާއަކާ ދެކޮޅަށް މިހާ ފާޅުކަން ބޮޑު ގޮތަކަށް ހަމަލާ ދެވުނު ފުރަތަމަ ފަހަރެވެ. މޫނު ނިވާކޮށްގެން ތިބި ބަޔަކު ކުއްލިއަކަށް މީހުންގެ ތެރެއަށް ވަދެ ގަނެ، ލަޓިއާއި ދަގަނޑުބުރި ފަދަ ތަކެތިން ހަމަލާ ދޭން ފެށި އެވެ.
މުޒާހަރާގެ ބައިވެރިން މި ގްރޫޕާ ކުރިމަތިލުމުން ފަހަތަށް ޖެހި ގާ އުކައި ހެދި އެވެ. މި ހުރިހާ ކަމެއް ހިނގީ ސަލާމަތީ ބާރުތަކާއި އަދި އެ ނޫން ވެރިންގެ ކުރިމަތީގަ އެވެ. މިއަދު ވެސް އެމްޑީޕީގެ 21 އެކްޓިވިސްޓުން ހައްޔަރު ކުރި އެވެ.
"ކިއަންކާއު" ޝޯ
އޮގަސްޓް 17، 2006 ވަނަ ދުވަހުގެ ރޭ އައްޑު އަތޮޅު ހިތަދޫގައި އެމްޑީޕީން އިންތިޒާމް ކުރި "ކިއަންކާއު" ޝޯއެއް އޮތެވެ. އައިޓަމްތަކުގެ ތެރޭގައި ރައީސް މައުމޫނާއި ވަޒީރު ބޭފުޅުންނަށް ރައްދުވާ ގޮތަށް ކުޅެފައިވާ ތަމްސީލްތައް ދެއްކުން އޮތެވެ.
މި ޝޯ އޮތީ ހިތަދޫ އޯޕަން ސްޓޭޖްގަ އެވެ. ސަތާރަ ވަނަ ދުވަހު އޮތް ފުޅަނދު ބުރުގައި ބޭނުން ކުރި "ކޯސްޓްގާޑް" އާއި "ގޮޅާ" ދައްކާލުން ވެސް އޮތެވެ.
މި ބުރު ބޭއްވުނީ ސިޔާސީ ހަރަކާތްތައް ހިންގުމުގެ ގަވައިދާ މުޅިން ހިލާފަށް ކަމަށް ބުނެ، އެކަން ހުއްޓުވަން ފުލުހުން ވަނީ ލިންކް ރޯޑް ބަންދުކޮށް މުޒާހަރާއަށް ހުރަސް އަޅައިފަ އެވެ.
މުޒާހަރާގެ ބައިވެރިން، މި ހަރަކާތަކީ ސުލްހަވެރި އެއްވުމެއް ކަމަށް ބުނެ، ފުލުހުންނާ ވާހަކަ ދެއްކުމަށް ވަރަށް ގިނަ ވަގުތުތައް ހޭދަވެގެން ދިޔަ އެވެ. ނަމަވެސް ކޮޅެއްގައި ނުޖެހި ވަގުތުތައް ހޭދަވަމުން ދަނިކޮށް، އެއްވެ ތިބި މީހުންގެ ތެރެއިން އުފެދުނު ހާޖާނުގެ ތެރޭގައި އާންމުންނާއި ފުލުހުންނާ ދެމެދު ކުރިމަތިލުންތަކެއް ހިނގި އެވެ. އަދި ފުލުހުންގެ ސަފުތައް ރޫޅި މުޒާހަރާ ކުރިއަށް ދިއުމަށް މަގު ހުޅުވާލި އެވެ. (ނުނިމޭ)
ނޯޓް: މިއީ ފޭދޫ އަލީ ފަހުމީ އަހުމަދު ސެޕްޓެމްބަރު 25، 2013 ގައި ނެރުއްވި "އައްޑޫ ގަން ހިންގުން" މި ފޮތެވެ.
"އައްޑޫ ލައިވް" ގައި މި ފޮތް ސިލްސިލާއެއްގެ ގޮތުގައި ޝާއިއު ކުރަން ހަދިޔާ ކުރެއްވި ކަމަށްޓަކައި، މި ނޫހުގެ ފަރާތުން ފަހުމީ އަށް ހާއްސަ ޝުކުރެއް އަރިސް ކުރަމެވެ.