(މެއި 1، 2014 ވަނަ ދުވަހުގެ ބަޔާ ގުޅޭ)
ފުލުހުން އެމްޑީޕީގެ އޮފީހަށް ހަމަލާ ދިނުން
އެއީ ނޮވެމްބަރު 6، 2006 އެވެ. އެ އަތޮޅެއް ތަމްސީލް ކުރައްވާ ރައްޔިތުންގެ މަޖިލީހުގެ މެމްބަރުންނަށް އާދޭސް ދަންނަވަން މާލެ އެރުމަށް އެމްޑީޕީގެ ގައުމީ މަޖިލީހުން ގަރާރެއް ފާސް ކުރި އެވެ. ގާނޫނު އަސާސީ އިސްލާހު ކުރުން އަވަސް ކުރަން ބާރު އެޅުމަށެވެ.
މިކަމަށްޓަކައި މާލެ އެރުމަށް ހިތްވަރުދީ އެމްޑީޕީން ކެމްޕޭން ފެށި އެވެ. ސަރުކާރާއި ޑީއާރްޕީން މި ހަރަކާތަކީ ބަޢާވާތެއް ކަމަށް ކަނޑައަޅުއްވައި، މިއީ ސަރުކާރުން ވައްޓާލަން ރޭވަމުންދާ ނުބައި ރޭވުމެއް ކަމަށް ބަޔާންތައް ނެރުއްވަމުން ގެންދެވި އެވެ.
މިކަމުގައި ބައިވެރިވާ ފަރާތްތަކާ މެދު ގާނޫނީ ފިޔަވަޅު އަޅުއްވާނެ ކަމަށް ހޯމް މިނިސްޓްރީން އޮކްޓޯބަރު 29 ވަނަ ދުވަހު އިއުލާން ކުރެއްވި އެވެ. އަދި މާލެ އާއީ އަތޮޅުތަކުން މި ހަރަކާތާ ގުޅޭ ކަމަށް ފެންނަ އިސް ފަރާތްތައް ހިފައި ހައްޔަރު ކުރަން ފެއްޓެވި އެވެ.
ނޮވެމްވަރު 16 ވަނަ ދުވަހު އެމްޑީޕީ އޮފީސް ދޮަަށަށް މީހުން އެއްވާން ފެށި އެވެ. މި ސަރަހައްދުގައި ހުންނަވައިގެން ނަޝީދު އަޑުގަދަ ކުރާ އިން މައުލޫމާތު އަރުވަމުން ގެންދެވި އެވެ. ދިހަ ވަނަ ދުވަހުގެ އެއްވުމާ ބެހޭ ގޮތުންނެވެ. ފުލުހުންގެ ސްޓާފޯސް އެ ހިސާބުގެ މަގުތައް ބަންދު ކުރި އެވެ. އަދި އެމްޑީޕީގެ މީހުން ފަހަތަށް ޖައްސަމުން ދިޔަ އެވެ.
އެމްޑީޕީ އޮފީހަށް ވެސް ވަދެގަތެވެ. މިރުސް ދުން ބުރުވައި، ކަރުނަ ގޭސް ޖަހައި މުޅި ހިސާބުގަނޑު ހަރާބުކޮށްލި އެވެ. އޮފީސްތެރޭގައި ހުރި ވާހަކަ ދައްކަން ބޭނުން ކުރަން ތިބި ސައުންޑް ސިސްޓަމް ގެންދިޔަ އެވެ.
އެއަށް ފަހު އޮފީހުގެ ތެރެއިން ބައެއް މީހުން ހައްޔަރުކޮށް ނިންމާލި އިރު އޮފީހުގައި ހުރި ބައެއް ތަކެއްޗާއި މުދަލަށް ވެސް ވަނީ ބޮޑެތި ގެއްލުންތަކެއް ލިބިފަ އެވެ.
"ނަމޫނާ" ދޯނީގެ މާލެ ދަތުރު މުޅި ރާއްޖޭގެ ސަމާލު ކަމަށް
އެއީ ނޮވެމްބަރު 6، 2006 އެވެ. އެ ދުވަހުގެ ރޭ އައްޑު އަތޮޅު މަރަދޫ ބަނދަރުން މާލެ ދިއުމަށް ފުރި "ނަމޫނާ" ދޯނީގައި ވަނީ އެމްޑީޕީގެ އެކްޓިވިސްޓުންނެވެ.
މި ދޯނި ފުރުވަން އެމްޑީޕީ އަށް ތާއީދު ކުރާ ވަރަށް ގިނަ ބަޔަކު މަރަދޫ ބަނދަރަށް ޖަމާވި އެވެ. މި ދޯންޏާ އެކު އެހެން ދެ ދޯންޏެއް ވެސް ފުރި އެވެ.
ނަމަވެސް މި ދޯނިން ދިޔަ މީހުން ނަމޫނާ ދޯނި އައްޑު ކަނޑަށް ނިކުތުމުން އެނބުރި އައީ އެވެ. ފުލުހުން ދިޔައީ މި ހުރިހާ ހަރަކާތެއް ރަނގަޅަށް ބަލަމުންނެވެ.
އަތޮޅުތަކުން މާލެ ދެވެން ތިބި ބަޔަކު ނޮވެމްބަރު 10 އަށް މާލެ އައުމަށް އެމްޑީޕީން ގޮވާލައިފައިވާތީ އެވެ. މާލޭގައި ބޭއްވުމަށް އިންތިޒާމު ކުރެވިފައިވާ ބޮޑު މުޒާހަރާއަށެވެ. ގާނޫނު އަސާސީ އިސްލާހުކޮށް އަވަހަށް ނިންމެވުމަށް އެ ދާއިރާއެއްގެ މެމްބަރުންނަށް އާދޭސް ދެންނެވުމަށެވެ.
ސަރުކާރުން ބެއްލެވީ މިކަމަކީ ސަރުކާރާ ދެކޮޅަށް ކުރެވޭ ޓެރަރިޒަމްގެ އަމަލެއް ފަދަ ނުރައްކާތެރި ކަމަކަށެވެ. ވީމާ އެމްޑީޕީގެ ގޮވައިލުމަށް އެގޮތަށް އަތޮޅުތަކުން މާލެ އައުމަކީ ސިފައިންނާއި ފުލުހުންނަށް ބާރުގެ ބޭނުންކޮށްގެން ވެސް ހުއްޓުވާނެ ކަމުގެ އިންޒާރު ވަނީ ދެއްވައިފަ އެވެ. ނަމަވެސް އެމްޑީޕީން ބަޔާން ކުރަމުން ދިޔައީ އެއީ އައިރު ގާނޫނީ އަމުރެއް ކަމުގަ އެވެ. (ނުނިމޭ)
ނޯޓް: މިއީ ފޭދޫ އަލީ ފަހުމީ އަހުމަދު ސެޕްޓެމްބަރު 25، 2013 ގައި ނެރުއްވި "އައްޑޫ ގަން ހިންގުން" މި ފޮތެވެ.
"އައްޑޫ ލައިވް" ގައި މި ފޮތް ސިލްސިލާއެއްގެ ގޮތުގައި ޝާއިއު ކުރަން ހަދިޔާ ކުރެއްވި ކަމަށްޓަކައި، މި ނޫހުގެ ފަރާތުން ފަހުމީ އަށް ހާއްސަ ޝުކުރެއް އަރިސް ކުރަމެވެ.