(މެއި 3، 2014 ވަނަ ދުވަހުގެ ބަޔާ ގުޅޭ)
ފުލުހުންގެ އިންޒާރަށް ބެލުމެއް ނެތި މި ދަތުރަށް އެރި ޖެހިލުން ކުޑަ އެކްޓިވިސްޓުންގެ ދަތުރަށް ކޯސްޓްގާޑުން ހުރަސް އަޅަން ފެށީ ކޮޅުމަޑުލަށް ވަން ފަހުންނެވެ.
ސަލާމަތީ ބާރުތަކުގެ ތިން ކޯސްޓްގާޑް ލޯންޗް ދިމާ ކުރަމުން ދިޔަ އެވެ. ދޯނީގެ ވަށައިގެން ކައިރިން ދުއްވައި އުފެއްދި ރާޅުތަކުގެ ތެރޭގައި ނަމޫނާ ދޯނި އަރިވެސް އަޅާލި އެވެ. ފެތިދާނެހާ ވަރު ކުރި އެވެ. އެތައް ފަހަރެއްހެ މަތިން އިންޒާރު ދީ ދޯނި މަޑު ކުރުވި އެވެ.
ދަތުރުގައި 45 މީހުން ބިޑި އަޅުވައިގެން ނަގައިގެން ގެންގޮސް ޖަލުގައި ބަންދު ކުރީ އެވެ. ނަމަވެސް މި އޮޕަރޭޝަނުގެ ތެރޭގައި އަނބުރައި ގަނެގެން ދޫނިދޫ އަށް ވެއްޓުނު ޒުވާން އަންހެން ކުއްޖަކު ފަރުވާ އަށް ކޯސްޓްގާޑުން ހުވަދު އަތޮޅަށް ގެންދެވުނެވެ.
ޖަލުގައި ބައިތިއްބައިގެން ތަހުގީގުކޮށް ނޮވެމްބަރު 22 ގައި ބަންޑާރަ ނައިބްގެ އޮފީހާ މައްސަލަ ހަވާލު ކުރެވުނެވެ. ނިންމެވީ 16 މީހެއްގެ މައްޗަށް ދައުވާ ކުރެއްވުމަށެވެ.
އެޕްރީލް 30 ގައި މި 16 މީހުންގެ މައްސަލަ ޝަރީއަތަށް ފޮނުއްވި އެވެ. އެމްޑީޕީގެ ގޮވާލުމަށް 10 ނޮވެމްބަރަށް މާލެ ދިއުމަށް އައްޑޫން ފުރާފައިވާތީ އެވެ. އެއީ ގާނޫނާ ހިލާފް އަމަލެއް ކަމަަށް ބައްލަވާފަ އެވެ.
ރާއްޖޭގެ މީޑިއާތަކުން ކަވަރު ކުރަމުން ދިޔަ "ނަމޫނާ" ދޯނީގެ ހަބަރުތައް ރާއްޖޭގެ ހުރިހާ ދިމާއަކުން އަޑު އަހައި ބަލަމުން ދިޔަ އެވެ. ހަމަ މިފަދައިން މާލެ ދާން އެކި އަތޮޅުތަކުން ފުރި އުޅަނދުފަހަރު ކޯސްޓްގާޑުން ވަނީ ފައްސާލައިފަ އެވެ.
މި މުޒާހަރާ އާ ގުޅިގެން ފާހަގަ ކުރެވޭ އެމްޑީޕީގެ 93 މީހަކު ފުލުހުން ވަނީ ހައްޔަރުކޮށް، ޖަލަށް ލައިފަ އެވެ.
މި މުޒާހަރާ ނުބާއްވާ ގޮތަށް ހަމަޖެއްސިކަން އެމްޑީޕީން ނޮވެމްބަރު 9 ވަނަ ދުވަހު އިއުލާން ކުރެއްވި އެވެ. މި މުޒާހަރާ އިންތިޒާމް ކުރުމާ ގުޅިގެން އުފެދުނު ހާޖާނު ތަޅައިފޮޅުމާއި ލޭ އޮހޮރުވުމަކަށް ބަދަލުވެގެން ދާން ނޭދޭތީ އެފަދަ އަށް ނުކުތާއެއް ފާހަގަ ކުރައްވައިފަ އެވެ.
ރައްޔިތުންގެ މަޖިލީހުގެ އެތެރޭގަ އާއި ބޭރުގައި މުޒާހަރާ
އެއީ އެޕްރީލް 10، 2007 އެވެ. ވެރިކަމުގެ ނިޒާމް ކަނޑައެޅުއްވުމުގެ ވޯޓްގައި 18 އަހަރުން މަތީގެ މީހުން ބައިވެރި ކުރަން ފެނޭތޯ ބެލުމަށް މަޖިލީހަށް ހުށަހެޅުނު ހިނދު އެއީ ގާނޫނާ ހިލާފު ހުށަހެޅުއްވުމެއް ކަމަށާއި އެ ހުށަހެޅުމަށް ވޯޓަށް ވެސް ނޭހޭނެ ކަމަށް ޑީއާރްޕީގެ މެމްބަރުން ވިދާޅުވަމުން ގެންދެވުމުގެ ސަބަބުން މަޖިލީހުގެ ތަޅުން ހޫނުވަމުން ދިޔަ އެވެ.
އެމްޑީޕީގެ މެމްބަރުން ދޫނުދެއްވައި 18 އަހަރުން މަތީގެ މީހުންގެ ހައްގުގައި ވަކާލާތު ކުރައްވަމުން ގެންދެވި އެވެ. އެ ބޭފުޅުން އެ ދުވަހު ރިޔާސަތުގައި އިންނެވި ހާއްސަ މަޖިލީހުގެ ނައިބް ރައީސް އަލްއުސްތާޒް ޝާހީމް ހަމީދު ވަރަށް ހަރުކަށި އިބާރާތުން ކުށްވެރިކޮށް، އެ ބޭފުޅާގެ އިސްތިއުފާ އަށް ވެސް ގޮވި އެވެ.
ޝާހީން ވިދާޅުވީ ގާނޫނު އަސާސީގެ 42 ވަނަ މާއްދާގެ ދަށުން އާންމު ވޯޓެއް ނެންގެވެން އޮތީ ހަމައެކަނި ރައީސުލްޖުމްހުރިއްޔާ ބޭނުންފުޅުވެވަޑައިގަންނަވާ ވޯޓެއްގެ ގޮތުގައި ކަމަށެވެ.
މި ހިސާބަށް ދިއުމުން މަޖިލީހުގެ ތަޅުން އިތުރަށް ހޫނުވެ، ޖަލްސާ ކުރިއަށް ނުގެންދެވިގެން ހުއްޓާލެއްވި އެވެ. އެކަމާ ހިތްހަމަނުޖެހިގެން ބައެއް އިއްޒަތްތެރި މެމްބަރުން ވަރަށް ބޮޑަށް ކޯފާ އިސްކުރެއްވި އެވެ. މޭޒުކޮޅުތަކުގެ މައްޗަށް ވެސް އަރާވަޑައިގެންނެވި އެވެ. އަދި ޖަލްސާ ކުރާ ގޭގެ ބޭރަށް މީހުން އެއްވެ މި މައްސަލަ އާ މެދު ފާޑު ކިޔައި ނުރުހުން ފާޅު ކުރަމުން ގެންދިއުމުގެ ސަބަބުން ބޮޑު މުޒާހަރާއެއް ފެށުނެވެ. (ނުނިމޭ)