(މެއި 4، 2014 ވަނަ ދުވަހުގެ ބަޔާ ގުޅޭ)
މި މަހުގެ 20 ވަނަ ދުވަހު އާންމު ވޯޓްގައި 18 އަހަރުން މަތީގެ މީހުން ބައިވެރި ކުރުމަށް ގޮވާލުމަށް ބޭއްވި މުޒާހަރާ އެމްޑީޕީން މާލެ އާއި އަތޮޅުތަކުގައި ކުރިއަށް ގެންދިޔަ އެވެ.
ހުސައިން ސޮލާހުގެ މަރު
ގައިދީންނަށާއި ހުކުމްކޮށްފައި ތިބޭ ކުށްވެރިންނަށް އަނިޔާ ކުރުމަކީ ރާއްޖޭގެ ތާރީހާ ގުޅިފައިވާ ކަމެކެވެ. އެންމެ ކުރީއްސުރެ ވެސް ސިޔާސީ ކުށްވެރިން ގަންހިންގުވައި ބުރިން ހަން ނަގައި ހެދުމަކީ ހަގީގަތެވެ.
އެޕްރީލް 15، 2007 ވީ އާދީއްތަަ ދުވަހު ހެނދު މާލެ ދެކުނު ފަރާތު ކަނޑިންމަ އާ ދިމާއަށް މީހުން އެއްވަމުން ދިޔައީ ވަރަށް އާދަޔާހިލާފް ގޮތަކަށް އެ ދިމާ ފަޅުތެރެއިން މަރުވެފައިވާ މީހަކު ފެނުނު ހަބަރު ފެތުރިގެން ދިއުމާ ގުޅިގެންނެވެ.
މި ހަބަރު ފެތުރިގެން ދިޔައީ މަރުވެފައި އޮތްވާ މި ފެނުނީ އައްޑު އަތޮޅު ހިތަދޫ ނާޒުކީގޭ ހުސައިން ސޮލާހަކީ ފުލުހުންގެ ތަހުގީގަށް ބޭނުންވެގެން މާލޭ ޖަލުގައި ބަންދު ކުރެވިފައިވާ ގައިދީއަކަށްވާތީ އެވެ.
ސޮލާހުގެ މުޅަ ހަށިގަނޑު މޫދުން ނަގައިގެން އައިޖީއެމް ހޮސްޕިޓަލަށް ގެންދިއުމުން ޑޮކްޓަރުން ބައްލަވާފައި އެންގެވި ކަމަށް ފުލުހުން ބަޔާންކޮށްފައި ވަނީ "އޭނާގެ ބޮލަށް ލިބިިފައިވާ އަނިޔާއެއްގެ ސަބަބުން ނިޔާވެފައި ވަނީ" ކަމަށެވެ. ބޮލުގެ ސައިނަސް ކަށިގަނޑުގައި ފްރެކްޗައެއް ހުރި ކަމަށާއި އަދިވެސް ބޮލުގެ އިތުރު ތަންތަނުގައި އެތެރޭން އަނިޔާތަކެއްވެފައި ހުރި ކަމަށް ޑޮކްޓަރުން ބުނޭ ކަމަށް ފުލުހުން ބުންޏެވެ. ސަހަރޯ އެވެ!
ހުސައިން ސޮލާހުގެ އާއިލާގެ މީހުންނާއި އައްޑޫގެ ވަރަށް ގިނަ ބަޔަކު އިސްވެ ދެކޮޅުވެރިކަން ފާޅުކޮށް ހެދުމުން މައްޔިތާ ވަޅުލެވޭ ގޮތެއް ނުވި އެވެ.
އެ މީހުން ތުހުމަތު ކުރަމުން ދިޔައީ ސޮލާހުގެ މަރަކީ ފުލުހުންގެ ރަހުމް ކުޑަ އަނިޔާވެރި އަމަލެއް ކަމަށެވެ. ވުމާ އެކު މިކަމާ ގުޅިގެން ނުރުހުން ފާޅު ކުރެވެމުން ދިޔަލެއް ބޮޑުކަމުން ހިއުމަން ރައިޓްސް ކޮމިޝަންގެ ބާރު ވެސް އެޅުއްވުމާ އެކީ ސަރުކާރުން ނިންމެވީ ސޮލާހު މަރުވި ގޮތް ހޯދައި ބަލަން ހަށިގަނޑު ޕޯސްޓްމޯޓަމް ހެދުމަށް ސްރީ ލަންކާ އަށް ފޮނުއްވުމަށެވެ.
މިކަމަކީ މާލޭގެ މަގުތަކުގައި ނުރުހުން ފާޅު ކުރަމުން ދިޔަ މީހުންގެ އުތުރި އެރުމަށް ވަގުތީ މަސަލަސް ކަމަކަށް ވެގެން ދިޔަ އެވެ.
ލަންކާގައި ޕޯސްޓްމޯޓަމް ހެދި ޑޮކްޓަރުންގެ ރިޕޯޓްގައި ވަނީ ސޮލާހް އަށް އެއްވެސް އަނިޔާއެއްކޮށްފައި ނެތް ކަމަށެވެ.
އޭނާ މަރުވެފައި ވަނީ ގެނބިގެން ކަމަށެވެ. މި ރިޕޯޓް ލަންކާގެ ދިވެހި އެމްބަސީން އާންމުކޮށްފައި ވަނީ ހިއުމަން ރައިޓްސް ކޮމިޝަންގެ ބޭފުޅުންނާއި ސޮލާހުގެ އާއިލާގެ މީހުންގެ ކުރިމަތީގައެއް ނޫނެވެ.
އަދި ލަންކާ އިން އޭނާ ސަންދޯކަށް ލީ ވެސް އާއިލާގެ މީހުންނަށް ދައްކާފައި ނޫން ކަމަށް ބުނެ އާއިލާ އިން ޝަކުވާ ކުރަމުން ދަނިކޮށް، ސަރުކާރުން ސޮލާހުގެ ހަށިގަނޑު މާލެ ގެނެސް ވަޅުލާފައި ވަނީ ވެސް އާއިލާގެ މީހުންނަށް ވާނުވާ ވެސް ނުދައްކައި ކަމަށް ވެސް ބުނެފައިވެ އެވެ.
ވީމާ މިކަން މި ހިނގައި ދިޔަ ގޮތް ވަރަށް ގިނަ ބަޔަކު ގަބޫލް ކުރީ އަނިޔާވެރި މަރަކުން ސޮލާހް މަރާލައި، މޫދަށް ފައްތައިލީ ކަމަށެވެ.
އޭގެ ފަހުން މީހުން އިންތިޒާރު ކުރީ ހިއުމަން ރައިޓްސް ކޮމިޝަންގެ ރިޕޯޓަށެވެ. އެ ކޮމިޝަނުން ސޮލާހްގެ މަރުގެ މައްސަލަ ތަހުގީގު ކުރެއްވުމަށް ކޮމިޝަންގެ މެމްބަރުންގެ އިތުރުން ސިޔާސީ ޕާޓީތަކަށް ނިސްބަތް ނުވާ، މިނިވަން ގާނޫނީ ވަކީލުންގެ ދެ ބޭފުޅަކާ ވެސް ހަވާލު ކުރައްވާފައިވެ އެވެ. (ނުނިމޭ)
ނޯޓް: މިއީ ފޭދޫ އަލީ ފަހުމީ އަހުމަދު ސެޕްޓެމްބަރު 25، 2013 ގައި ނެރުއްވި "އައްޑޫ ގަން ހިންގުން" މި ފޮތެވެ.
"އައްޑޫ ލައިވް" ގައި މި ފޮތް ސިލްސިލާއެއްގެ ގޮތުގައި ޝާއިއު ކުރަން ހަދިޔާ ކުރެއްވި ކަމަށްޓަކައި، މި ނޫހުގެ ފަރާތުން ފަހުމީ އަށް ހާއްސަ ޝުކުރެއް އަރިސް ކުރަމެވެ.