ވޯލްޑް ކަޕުން އެމެރިކާ ބޭރުކުރަން އިރާނުން ފީފާ އަށް ގޮވާލައިފި އެވެ.
އިރާނުން މިކަމަށް ގޮވާލީ އެމެރިކާ ފުޓްބޯޅަ ޓީމުގެ ރަސްމީ ޓްވިޓާ އެކައުންޓުން އާންމުކުރި ޕޯސްޓެއްގައި އިރާނުގެ ދިދަ އަށް ބަދަލުތަކެއް ގެނެސްފައިވާތީ އެވެ. އެގޮތުން އިރާންގެ ދިދައިގެ މެދުގައި އިންނަ ނިޝާނާއި އަރަބި ބަހުން ލިޔެފައިވާ އަކުރުތައް ވަނީ ދިދައިން ފޮހެލާފަ އެވެ.
ވޯލްޑް ކަޕްގެ ގްރޫޕް ސްޓޭޖުގައި އިރާނާއި އެމެރިކާ ލައްވާލާފައިވަނީ އެއް ގްރޫޕެއްގައި ކަމަށްވާއިރު ގްރޫޕްގެ ފަހު މެޗުގައި ބައްދަލުކުރަން ޖެހެނީ ވެސް މި ދެ ޓީމެވެ. އެގޮތުން އެ މެޗުން މޮޅުވާ ޓީމަކަށް މުބާރާތުގެ ދެވަނަ ބުރަށް ދެވޭނެ އެވެ.
އެމެރިކާ އިން ބުނީ އިރާންގެ ރަސްމީ ދިދަ ބޭނުން ކުރަން ބޭނުން ނުވީ އިރާންގައި މިހާރު މުޒާހަރާ ކުރަމުންދާ އަންހެނުންނަށް ތާއީދު ކުރުމުގެ ގޮތުން ކަމަށެވެ. ނަމަވެސް ފަހުން އެ ޕޯސްޓް ވަނީ ޑިލީޓްކޮށްލާފަ އެވެ.
The official Twitter account of the US national football (soccer) team (@USMNT) has removed the Islamic Republic's "Allah" emblem and the "takbirs" from Iran's three-colored flag in a picture it has posted of their FIFA World Cup group's standings ahead of Iran-US Tuesday match. pic.twitter.com/cQgBepEiPN
— Iran International English (@IranIntl_En) November 26, 2022
އިރާނުގެ ފުޓްބޯޅަ އިދާރާގެ ލީގަލް އެޑްވައިޒަރު ފަހަންޕޫރްއާ ހަވާލާވީ އެގައުމުގެ ދައުލަތުގެ މީޑިއާ އިން ބުނީ އެމެރިކާގެ މި އަމަލަކީ ފީފާގެ ގަވާއިދުތަކާ ހިލާފު އަމަލެއް ކަމަށާއި މި އަމަލުގެ އެކަށީގެންވާ އަދަބަކީ 10 މެޗުގެ ސަސްޕެންޝަނެއް ކަމަށެވެ.
އެމެރިކާ އިން އިރާނުގެ ދިދަ އަށް އިހުތިރާމް ނުކުރި މައްސަލަ ފީފާގެ އެތިކްސް ކޮމިޓީ އަށް ހުށަހަޅާނެ ކަމަށްވެސް ބުނެފައިވެ އެވެ. އަދި ގައުމުތަކުގެ ދިދަ އަށް އިހުތިރާމް ކުރުމަކީ ހުރިހާ ގައުމަކުން ވެސް ކުރަންޖެހޭ ކަމެއް ކަމަށްވާއިރު އެމެރިކާގެ އަމަލަކީ ބައިނަލްއަގުވާމީ ގާނޫނުތަކާ ހިލާފު އަމަލެއް ކަމަށް ވެސް ބުނެފައިވެ އެވެ.
އިރާނުގައި މިހާރު ކުރަމުންދާ މުޒާހަރާތަކަކީ އެމެރިކާ އާއި ހުޅަނގުގެ ގައުމުތައް އަޑީގައި އޮވެގެން ކުރާ ކަމެއް ކަމަށް އިރާނުން ތުހުމަތު ކުރެ އެވެ. އެ މުޒާހަރަތަކާ ގުޅިގެން އެމެރިކާ އިން މިހާތަނަށް ވަނީ އިރާނުގެ ބައެއް އޮފިޝަލުންނަށް ދަތި ކުރުމުގެ ފިޔަވަޅުތައް ވެސް އަޅާފަ އެވެ.
އިރާނާއި އެމެރިކާ އިން ވަނީ 1980 ވަނަ އަހަރުން ފެށިގެން ޑިޕްލޮމެޓިކް ގުޅުން ކަނޑާލާފަ އެވެ.