(މެއި 8، 2014 ވަނަ ދުވަހުގެ ބަޔާ ގުޅޭ)
ރައީސް މައުމޫނުގެ ވެރިކަން ނިމުން
ދިވެހިންނަށް މިނިވަންކަމާ އެކު ވޯޓް ލުމުގެ ހައްގު ލިބިދިން ފުރަތަމަ ރިޔާސީ އިންތިހާބު އޮކްޓޯބަރު 8، 2008 ގައި ބޭއްވުނެވެ.
އިންތިހާބަށް ކުރިމަތިލެއްވި ފަސް ކެންޑިޑޭޓުންގެ ތެރެއިން އެންމެ ގިނަ ވޯޓް ލިބިވަޑައިގެން ދެވަނަ ބުރަށް ވާދަ ކުރެއްްވީ ޑީއާރްޕީގެ ފަރާތުން ރައީސް މައުމޫނާއި އެމްޑީޕީން ރައީސް ނަޝީދެވެ.
އެއީ އޮކްޓޯބަރު 29، 2008 ވަނަ ދުވަހެވެ. ނަތީޖާ ފާޅު ކުރުމުގެ ވަގުތެވެ. އަޅުގަނޑު އައީ ޑީއާރްޕީ ފޭދޫ އޮފީސް ކުރިމަތިންނެވެ. މަޑުކޮށްލީ އެމްޑީޕީ ފޭދޫ ޖަގަހައިގެ ދޮށުގަ އެވެ. އެއީ "ވަތަން އެދޭ ގޮތަށް" ކެމްޕޭން ކުރި އެމްޑީޕީގެ އިއްތިހާދުގެ ޖަހަގަ އެވެ.
މީހުން ތިބީ ވަރަށް ވަރުބަލިވެފަ އެވެ. ގިނައީ މި ދެތިން ދުވަހު އިންތިހާބުގެ ކަންކަމުގައި ވަރަށް އަވަދިނެތި ބުރަކޮށް މަސައްކަތް ކުރި މީހުންނެވެ. އެތައް ދުވަހެއް ވަންދެން އެ މީހުން ކުރި ބުރަ މަސައްކަތުގެ ނަތީޖާ ލިބޭ ވަގުތެވެ. ޑިމޮކްރަސީއަށްޓަކައި ދިވެހިން ވި ގުރުބާނީ އެވެ.
ދެ ފަރާތުގެ މީހުން ވެސް ތިބީ ވަރަށް ހިމޭމުންނެވެ. ނަތީޖާ ދާނެ ގޮތަކާ މެދު މާ ބޮޑު ޔަގީން ކަމެއް ނެތް ކަހަލަ ގޮތަކަށެވެ. އެންމެ ފުރަތަމަ އިއުލާން ކުރެއްވީ އައްޑޫގައި ތިބޭ ފުލުހުން ވޯޓްލީ ފޮށީގެ ނަތީޖާ އެވެ. ތަފާތު ބޮޑު ނަތީޖާއަކާ އެކު ފުލުހުންގެ ވޯޓް އެމްޑީޕީ އިއްތިހާދަށް ލިބިގެން ދިޔަ އެވެ.
ވަރަށް ގިނަ ބަޔަކު ހީކޮށްގެން ތިބި ގޮތާ ހިލާފަށް ފުލުހުންގެ މިހާ ބޮޑު ތަރުހީބެއް ލިބިގެން ދިއުމަކީ އިއްތިހާދުގެ އެންމެންގެ އުންމީދު އައުވެގެން ދިޔަ ކަމަކަށެވެ. ރަށަކަށް ފަހު ރަށެއްގެ ވޯޓް ގުނައި ނިމިގެން ނަތީޖާތައް އިއުލާން ކުރަމުން ދިޔަ ވަރަކަށް އެމްޑީޕީ އިއްތިހާދުގެ ކެންޑިޑޭޓް ރައީސް ނަޝީދަށް ލިބިވަޑައިގަންނަވާ ވޯޓް އިތުރުވަމުން ދިޔަ އެވެ.
ނަތީޖާ ލިބެމުން ދިޔަ ގޮތުން ރައީސް ނަޝީދަށް އިންތިހާބް ކާމިޔާބް ކުރެވޭނެ ކަމަށް ބެލެވެން ފަށައިފި އެވެ. އަދި އެންމެ ފަހުން ރައީސް މައުމޫނަށް ނާކާމިޔާބީ އާ ކުރިމަތިވެވަޑައިގަތްކަން ޔަގީނެވެ.
އައްޑޫގެ ހުރިހާ ރަށެއްގެ އެމްޑީޕީގެ ޖަގަހަތަކުން އުފާ ފާޅު ކުރުމުގެ ޕްރޮގްރާމްތައް ހިނގަމުން ދިޔަ އެވެ. އެކި ދިމަދިމާއިން ޖާފަތް އަންނަމުން ދިޔަ އެވެ. އަޑުގަދަ ކުރާ ތަކުން އިވެމުން ދިޔަ ގައުމީ ލަވައިގެ ޖޯޝުގައި މީހުން ހޭލަމޭލަވާ ތަން ފެންނަނީ ވަރަށް ވަރުގަދަ ރޫހަކާ އެކުގަ އެވެ.
މަގުމަތި ބަލަހައްޓަން ނިކުމެ ތިބި ފުލުހުން ރަށުތެރޭގައި ހަރަކާތްތެރިވަމުން ދިޔަ އެވެ. އެކަމަކު ބަރުގޮނު އަޅަމުން ގޮތްގޮތަށް ދުއްވަމުންދާ ސައިކަލްތަކާއި ކާރުތަކުން މަގުމަތި ވަނީ ހަލަބޮލިކޮށްލައިފަ އެވެ.
އެހެން ނަމަވެސް އެހެން ރަށްރަށުގެ ކަންތައް ވެސް އޮތް ގޮތް ދެކިލާށެވެ. ފޭދޫން މަރަދޫފޭދޫ އަދި މަރަދޫ ތެރެއިން އަޅުގަނޑުމެން ދަތުރު ކުރަމުން ދިޔައީ ހިތަދު އަށެވެ.
ދެނެކާ ދެނެއް ނެތެވެ. ހުރިހާ ރަށެއް އޮތީ ހަމަ މިހާ ފޯރީގަ އެވެ. އެނބުރި އައި މަގުމަތީގައި އަަޅުގަނޑުގެ ހިތަށް އެރި އެވެ. އެކަލާނގެ ހެޔޮ ރަހުމަތްފުޅާ އެކު ދިވެހިން ކުރިމަތިލަނީ ޒަމާނުއްސުރެ އެދިއެދި ތިބި ހެޔޮ ބަދަލުތަކާ އެވެ.
އިރާދަކުރެއްވިއްޔާ މާދަމާ އަށް އިރު އަރާނީ އެ ބަދަލުތަކުގެ ފެށުމާ އެކުގަ އެވެ. ހަމަ ގައިމު ވެސް މި ރެއެއް ދެނެއް ނާންނާނެ އެވެ. އެހެންކަމުން ފޭދު އަށް އައިސް އަޅުގަނޑުމެން ދެން މިސްރާބު ޖެހީ ގަމާ ދިމާއަށެވެ.
ދަންވަރުގެ ހަމަހިމޭން ވަގުތެވެ. ގަން އޮތީ ނިދައިފަ އެވެ.
ވައިރޯޅިއެއްހާ ވަރު ވެސް ނުވާ ދުނިޔެއެއްގައި ގަހަކުން ފަތެއް ހެލިލާ ތަނެއް ވެސް ނުފެނެ އެވެ. މިރޭ ގަން ފެންނަނި ވަރަށް އަސަރު ކުރުވާ ކަހަލަ ގޮތަކަށެވެ.
އަޅުގަނޑު ހިތަށް އެރި އެވެ. ގަމަކީ އައްޑޫގެ ހިތެވެ. އައްޑޫގެ ދިރުން ގުޅިފައި ވަނީ އެ ހިތުގެ ވިންދާ އެވެ. މީގެ 30 އަހަރު ކުރިން ރައީސް މައުމޫނަަށް ވެރިކަން ލިބިވަޑައިގަތުމާ އެކު އެ ގަން، އައްޑޫގެ ރައްޔިތުންނަށް އެންމެ ފައިދާ ހުރި ގޮތެއްގައި ހިންގަވާ ދެއްވާނެ ކަމަށް ވައުދުވެވަޑައިގަތީ ވެސް އެހެންވެގެންނެވެ.
އެހެން ނަމަވެސް އެ ދުވަހު ރައީސް މައުމޫން ވަޑައިގަންނަވާ މަގުތަކަށް މާ އުކައި ދިން ސްކޫލް ކުދިން ބޮޑެތިވެގެން މިއަދު މަސައްކަތަށް ނިކުމެ އެ ތިބީ، އެ ގަމުގެ މަންފާއެއް ނުކުރާ ދުނިއެއްގަ އެވެ.
އެ މަނިކުފާނުގެ ކެމްޕޭން ދަތުރުފުޅުތަކުގައި މިއަދު އައްޑޫގެ މަގުތަކުން ފެނުނީ މުޅިން ތަފާތު މަންޒަރުތަކެކެވެ. ހިތްހަމަޖެހުމެވެ. ނަފުރަތެވެ. ރައީސް މައުމޫން ވަޑައިގެންނެވި ކާރުކޮޅު ދަތުރު ކުރި މަގުތަކަށް ޓަޔަރު އަޅައި، ރޯކޮށް، މަގުތައް ބައްދައި އެ ހިންގި ނޭއްގާނީ އަމަލުތަކެވެ. ރައީސް މައުމޫންގެ ސަރުކާރާ މެދު އައްޑޫގެ ގިނަ ބަޔަކު ހިތްހަމަނުޖެހިފައި ތިބި ވަރެވެ.
ހަމަ ޔަގީނުން ވެސް ރައީސް މައުމޫންގެ ވެރިކަމުގެ ދިގު 30 އަހަރު ރާއްޖޭގެ އަތޮޅެއް ތަރައްގީ ކުރެއްވުމަށާއި އެ އަތޮޅެއްގެ ރައްޔިތުންނަށް އުފާ ފާގަތި ދިރިއުޅުމެއް ހޯއްދެވުމަށް އެންމެ ބޮޑު މަސައްކަތެއް ކުރައްވަން ޖެހިވަޑައިގަތީ އައްޑު އަށްޓަކަ އެވެ. އައްޑޫ "ގަން" ހިންގެވުމަށެވެ. (ނިމުނީ)
ނޯޓް: މިއީ ފޭދޫ އަލީ ފަހުމީ އަހުމަދު ސެޕްޓެމްބަރު 25، 2013 ގައި ނެރުއްވި "އައްޑޫ ގަން ހިންގުން" މި ފޮތެވެ.
"އައްޑޫ ލައިވް" ގައި މި ފޮތް ސިލްސިލާއެއްގެ ގޮތުގައި ޝާއިއު ކުރަން ހަދިޔާ ކުރެއްވި ކަމަށްޓަކައި، މި ނޫހުގެ ފަރާތުން ފަހުމީ އަށް ހާއްސަ ޝުކުރެއް އަރިސް ކުރަމެވެ.