އޭއެފްސީ ޗެލެންޖް ކަޕްގެ ފޯރި ގަދަ ކުރުމުގެ ގޮތުން ހާއްސަ ބޮއްކުރާ ރޭހެއް މީދޫގައި ބާއްވަން އެރަށު ޖަމިއްޔާއެއް ކަމަށްވާ މީދޫ ކޯޕަރޭޓް ކޮމިއުނިއަމް (އެމްސީސީ) ނިންމައިފި އެވެ.
އެމްސީސީގެ ރައީސް އަހްމަދު ޝާޠިރު މިއަދު ވިދާޅުވީ ޗެލެންޖް ކަޕްގެ ފޯރި ގަދަކުރުމުގެ ގޮތުން ބާއްވާ ރޭސް އޮންނާނީ މާދަމާ ހަވީރު ކަމަށެވެ.
ޗެލެންޖް ކަޕްގައި ބައިވެރިވާ އަށް ޓީމް ރަމްޒުކޮށްދޭ މުބާރާތުގައި ބައިވެރިވާ ޓީމްތައް މިހާރު ދަނީ ފައިނަލް ކުރަމުންނެވެ. އެގޮތުން އެމްއެންޑިއެފް އާއ ޕޮލިހުންގެ އިތުރުން ރަށުގެ ޒުވާނުންގެ ތެރެއިން ވަނީ ޓީމްތައް ހަދައި ބައިވެރިވެފަ އެވެ.
ކޮންމެ ޓީމެއްގައި 3 ކުޅުން ތެރިން ތިބޭއިރު، ރޭސް ފެށުމަށް ހަމަޖެހިފައި ވަނީ މީދޫ ބަނދަރުންނެވެ.
"އަޅުގަނޑުމެން މިހާރު ބަނދަރު މަތި ޒީނަތްތެރި ކުރަމުން މިދަނީ ރޭހަށް. މިކަމުގައި މުޅިންވެސް އިސްވެ ހަރަކާތްތެރިވަނީ މީދޫގެ ޒުވާނުން"
ޝާޠިރު ވިދާޅުވީ ބަނދަރު ސަރަހައްދުގައި ޗެލެންޖް ކަޕްގެ ލަވަ ޖެހުމާއި ޓީމް ތަކުގެ ދިދަ ޖަހައި ޒީނަތްތެރިކުރުމުގެ މަސައްކަތް ކުރިއަށް ދާކަމަށެވެ.
އޭއެފްސީ ޗެލެންޖް ކަޕްގެ ފޯރި ގަދަ ކުރުމުގެ ގޮތުން މާލޭގައި ތަފާތު ހަރަކާތް ހިންގަމުން އަންނަ އިރު މިދިޔަ ހަފްތާގެ ހޮނިހިރު ދުވަހު ޗެލެންޖް ކަޕްގެ ޓްރޮފީއާއި އެކު ވެހިކަލް ބުރެއް ވަނީ ބާއްވާފައެވެ. އޭގެ ފަހުން މިހާތަނަށް މުބާރާތް އިޝްތިހާރު ކުރުމަށް އެފްއޭއެމްއާއި ޔޫތު މިނިސްޓްރީއިން އައްޑޫގައި ހަރަކާތެއް ނުހިންގައެވެ.
ޝާޠިރު ވިދާޅުވީ މާދަމާގެ ރޭހުން އެއްވަނަ އަށް ދާ ފަރާތަކަށް އެމްސީސީން އިނާމް ހުށަހަޅާފައިވާ ކަމަށެވެ.