އޭއެފްސީ ޗެލެންޖް ކަޕްގެ ފޯރި ގަދަކުރުމުގެ ގޮތުން މީދޫ ޖަމިއްޔާއެއް ކަމަށްވާ މީދޫ ކޯޕަރޭޓް ކޮމިއުނިއަމް (އެމްސީސީ) އިން އިންތިޒާމް ކޮށްގެން މިއަދު ހަވީރު ކުރިއަށްގެންދިޔަ ބޮއްކުރާ ރޭސް ލާއޯސް ރަމްޒުކޮށްދިން ބެސްޓް ސިލެކްޝަންގެ ބޮއްކުރާ ޓީމް ކާމިޔާބްކޮށްފިއެވެ.
ޗެލެންޖް ކަޕްގައި ވަދަލުރާ 8 ޓީމް ރަމްޒުކޮށްދޭ ގޮތަށް ކުރިއަށް ގެންދިޔަ ބޮއްކުރާ ރޭސް ފައްޓަވާ ދެއްވީ ޔޫތު މިނިސްޓަރ މުހައްމަދު މަލީހް ޖަމާލްއެވެ.
މަލީހް ވިދާޅުވީ މީދޫގެ ޒުވާނުން އިސްނަގައިގެން މުބާރާތުގެ ފޯރި ގަދަކުރުމަށް މިވަރުގެ ހަރަކާތެއް އިންތިޒާމް ކުރީތީ ދިވެހި ސަރުކާރާއި މިނިސްޓްރީގެ ނަމުގައި ރަށުގެ ރައްޔިތުންނަށް ޝުކުރު ދަންނަވާ ކަމަށެވެ. އަދި ރާއްޖޭގައި މިބޭއްވޭ މުބާރާތަކީ ފެންވަރުގެ ގޮތުން މި ސަރަހައްދުގެ އެހެން ގައުމު ތަކަށް ނަމޫނާ މުބާރާތަކަށް މި މުބާރާތް ހެދުމަށް މަސައްކަތް ކުރަމުން އަންނަ ކަމަށެވެ.
ބޮއްކުރާ ރޭހުން އެއްވަނަ އަށް ދިޔަ ޓީމަށް އެމްސީސީން ހުށަހެޅި 1000 ރުފިޔާގެ އިނާމް ހަވާލު ކޮށްދެއްވީ މިނިސްޓަރ މަލީހް ޖަމާލްއެވެ.
މިއަދުގެ ބޮއްކުރާ ރޭސް ބެލުމަށް ރަށުގެ ގިނަ އަދަދެއްގެ ބަޔަކު ވަނީ ބަނދަރު ސަރަހައްދަށް ޖަމާވެފައެވެ.
ބޮއްކުރާ ރޭސް ނިންމުމަށް ފަހު މަލީހް ވަނީ މީދޫ ބޯޅަދަނޑުގެ މަސައްކަތް ބައްލަވާ ލައްވާފައެވެ.