އައްޑޫގެ ގުޅިފައިވާ ރަށްތަކަށް ކަރަންޓު ދިނުމަށް ބޭނުންކުރާ އިންޖީނެއްގެ ހޮޅިއެއް ފަޅައިގެން ދިއުމުގެ ސަބަބުން އިންޖީނުތައް އޯވަރލޯޑްވެ އައްޑޫގެ ބޮޑު ސަރަހައްދަކުން ކަރަންޓް ކެޑިއްޖެއެވެ.
ސަދަން ޔޫޓިލީސް ހިންގެވުމާ ހަވާލުވެ ހުންނެވި އަބްދުﷲ ޒުހައިރު ވިދާޅުވީ ކަރަންޓު ކެނޑެމުން ދަނީ އާރްއޭފްގައި ހުންނަ މަރުކަޒީ އިންޖީނުގޭގައި ބޭނުން ކުރަމުން އަންނަ ހަ އިންޖީނުގެ ތެރެއިން އެއް އިންޖީނުގެ ހޮޅިއެއް ފަޅައިގެން ގޮސް ތެޔޮ ލީކުވުމުގެ ސަބަބުން އިންޖީނު މަރާމާތު ކުރުމަށް ބައެއް އިންޖީނުތައް ނިވާލަން ޖެހިފައިވާތީއެވެ.
ޒުހައިރު ވިދަޅުވީ ހޮޅި ފަޅައިގެން ދިޔަ އިންޖީނު މަރާމާތު ކުރެވެން ދެން ދޭތެރެ ދޭތެރެއިން އައްޑޫގެ އެކި ސަރަހައްދު ތަކުން ކަރަންޓް ކަޑަމުންދާނެކަމަށެވެ.
"ދޭތެރެ ދޭތެރެއިން ކަރަންޓް ކެޑުމަކީ އެކަށީގެންވަ ކަމެއް. ބައެއް އިންޖީނުތައް ނިއްވާލަން އެބަޖެހޭ. އެހެންވެ ކަރަންޓް ކެޑިދާނެ" ޒުހައިރު ބުންޏެވެ.
މެންދުރުން ފެށިގެން އައްޑޫގެ އެކި ސަރަހައްދުތަކުން ކަރަންޓް ކެޑެމުން ދާތީ އާއްމުން ވަނީ ވަރަށް ބޮޑަށް ހިތް ހަމަ ނުޖެހިފައިއެވެ. އަދި އެކަމުގެ ޝަކުވާ އާއްމުން ދަނީ ކުރަމުންނެވެ.
"އެންމެ ބޮޑު މައްސަލަ އަކީ ހަމަ ކުއްލިއަކަށް ހުރެފައި ކަރަންޓް ކެޑިދާނެ. ދެން ނޭގޭނެ ކަރަންޓް ލިބޭނެ ގަޑިއެއް" ހިތަދޫން ވާހަކަ ދެއްކި މީހަކު ބުންޏެވެ.
އެހެން މީހަކު ބުނީ މިދޭތެރެއިން ކަރަންޓް ކެޑުނު އިރު އެގޭގައި ބޭނުން ކުރަމުން އައި އިލެކްޓްރޯނިކްސް ސާމާން ހަލާކުވެފައިވާ ކަމަށެވެ. އޭނާ ބުނީ މިކަމުގެ ޝަކުވާ ކުރާނެތަނެއް ނެތް ކަމަށެވެ.
ޒުހެއިރު ވިދާޅުވީ އައްޑޫގެ މަރުކަޒީ އިންޖީނުގޭގައި ތިބި އިންޖީނުތަކަށް ފުރިހަމަ ސާވިސް ނުދެވި ކަރަންޓް ކެޑުމުގެ މައްސަލަ ހައްލު ނުވާނެ ކަމަށެވެ.
ކަރަންޓު ކެނޑުމުގެ މައްސަލައަށް ދާއިމީ ހައްލެއް ލިބޭނީ މަރުކަޒީ އިންޖީނު ގޭގެ ހަ އިންޖީނު އެކަށީގެންވާ ވަރަށް މަރާމާތުކޮށްގެން ކަމަށް ޒުހެއިރު ވިދާޅުވިއެވެ.