ކެމަރޫނަށް ބްރެޒިލް ބަލިކުރެވޭނެ ކަމަށް ކެމަރޫންގެ ކޯޗު ރިގޮބާޓް ސޮންގް ބުނެފި އެވެެ.
ވޯލްޑް ކަޕްގެ ގްރޫޕް ޖީ ގައި މިރޭ ކެމަރޫން އާއި ބްރެޒިލް ބައްދަލުކުރާއިރު، މި މެޗަށް ނިކުންނައިރު ބްރެޒިލް ވަނީ ކުޅުނު ދެ މެޗުން މޮޅުވެ ލިބުނު ހަ ޕޮއިންޓާ އެކު ދެވަނަ ބުރުން ޖާގައެއް ކަށަވަރުކޮށްފަ އެވެ. ކެމަރޫނަށް ދެ މެޗުން ލިބުނީ އެއް ޕޮއިންޓް ކަމަށްވާއިރު ދެވަނަ ބުރަށް ދިޔުމަށް މިރޭ ބްރެޒިލް ބަލިކުރުން ކެމަރޫނަށް މަޖުބޫރެވެ.
މިރޭގެ މެޗުގެ ކުރިން ވާހަކަދައްކަމުން ސޮންގް ބުނީ ބްރެޒިލްގައި އޮތީ ވަރަށް ރީތި ޓީމެއް ކަމަށާއި ބްރެޒިލް އަށް ވަރަށް އިހުތިރާމް ކުރާ ކަމަށެވެ. ނަމަވެސް ފުޓްބޯޅައިގައި ކޮންމެ ކަމަކީ ވެސް ކުރެވިދާނެ ކަމެއް ކަމަށާއި ބްރެޒިލް ބަލިކުރެވިދާނެ ކަމަށް ގަބޫލުކުރަނީ ވެސް އެހެންވެ ކަމަށް ސޮންގް ބުންޏެވެ.
"ކެމަރޫން އިން މީގެކުރިން ވެސް ބްރެޒިލް ބަލިކުރި. ދެން ވެސް ބަލިކުރެވޭނެ." ސޮންގް ބުންޏެވެ.
ސޮންގް ބުނީީ ބްރެޒިލްއާ ދެކޮޅަށް ކުޅޭ މެޗު ފަސޭހަ ނުވާނެކަން އެނގޭ ކަމަށާއި ނަމަވެސް އެ މެޗު ވެގެންދާނީ ވަރަށް ޝައުގުވެރި މެޗަކަށް ކަމަށެވެ. އަދި ދަނޑު މަތީގައި ކެމަރޫން އަށް ކުރެވެން އޮތް ހުރިހާ ކަމެއް ކުރާނެ ކަމަށްވެސް ސޮންގް ބުންޏެވެ.
ބްރެޒިލް އާއި ކެމަރޫން މީގެކުރިން ހަ ފަހަރު ބައްދަލުކޮށްފައިވާއިރު ފަސް މެޗު ކާމިޔާބުކުރީ ބްރެޒިލް އިންނެވެ. ކެމަރޫނަށް ބްރެޒިލް ބަލިކުރެވުނީ އެންމެ ފަހަރަކު އެވެ. އެއީ 2003 ވަނަ އަހަރުގެ ކޮންފެޑެރޭޝަންސް ކަޕްގަ އެވެ.
ކެމަރޫން އާއި ބްރެޒިލް ބައްދަލުކުރާ މެޗު ފަށާނީ މިރޭ ރާއްޖެގަޑިން 12 ޖަހާއިރު އެވެ.