ޒުވާން ދެ ތަރިން ކަމަށްވާ ސިދާތު މަލްއުތުރާ އާއި ޝްރަދާ ކަޕޫރު ލީޑް ރޯލް ކުޅެފައިވާ ފިލްމް "އެކް ވިލަން" ގެ ފުރަތަމަ ޓްރެއިލާ ލޯންޗްކޮށް، ފިލްމް ޖޫން މަހުގެ 27 ގައި ރިލީޒް ކުރާ ގޮތަށް ހަމަޖައްސައިފި އެވެ.
މި ފިލްމަކީ މިދިޔަ އަހަރުގެ އެންމެ ކާމިޔާބު އެއް ފިލްމް ކަމަށްވާ "އާޝިގީ 2" އަށް ފަހު، އެ ފިލްމުގެ ޑައިރެކްޓަރު މޯހިތު ސޫރީ ގެނެސްދޭ ފުރަތަމަ ފިލްމެވެ.
އަދި މިއީ މީގެ ކުރިން ބަޓް ކޭމްޕްގެ ފިލްމްތައް ޑައިރެކްޓް ކުރަމުން ދިޔަ މޯހިތު އެހެން ޕްރޮޑަކްޝަން ހައުސްއަކާ ގުޅިގެން ހަދާ ފުރަތަމަ ފިލްމު ވެސް މެ އެވެ.
"އެކް ވިލަން" ޕްރޮޑިއުސްކޮށްފައި ވަނީ މީގެ ކުރިން ކާމިޔާބު ގިނަ ފިލްމްތަކެއް އުފައްދާފައިވާ އެކްތާ ކަޕޫރުގެ ބަލާޖީންނެވެ.
އަސަރު ގަދަ ލޯބީގެ ހާދިސާތަކެއް ދައްކުވައުދޭ "އެކް ވިލަން" އަކީ ކަރަން ޖޯހަރުގެ "ސްޓޫޑަންޓް އޮފް ދި އިޔާ" އިން ބޮލީވުޑަށް ނިކުތް ސިދާތުގެ ތިން ވަނަ ފިލްމެވެ. އަދި މި ފިލްމަކީ "އާޝިގީ 2" ގެ ބަތަލާ ޝްރަދާ އާ އެކު އޭނާ ކުޅޭ ފުރަތަމަ ފިލްމް ވެސް މެ އެވެ.
މި ފިލްމުގައި އެ ދެ ތަރިންގެ އިތުުރުން ރިތޭޝް ދޭޝްމުކް ވެސް މުހިއްމު ރޯލަކުން ފެނިގެން ދާނެ އެވެ.