ހިތަދޫގައި އިމާރާތްކޮށްފައިވާ އިކްއުޓޯރިއަލް ކޮންވެންޝަން ސެންޓަރ (އީސީސީ) ވިރާނާވާން ދޫކޮށްލި މައްސަލާގައި މަޖިލީހުގައި ޖަވާބުދާރީ ވުމުގެ ފުރުސަތަށް އިންތުޒާރު ކުރައްވާކަމަށް ހައުސިން މިނިސްޓަރ ޑރ. މުހައްމަދު މުއިއްޒު ވިދާޅުވެއްޖެއެވެ.
އީސީސީ ވިރާނާވާން ދޫކޮށްލި މައްސަލާގައި މަޖިލިސް ތެރެއިން ހައުސިން މިނިސްޓަރ ޑރ. މުއިއްޒު ޖަވާބުދާރީ ކުރުވާނެކަމަށް ހިތަދޫ ދެކުނު ދާއިރާއިން އަލަށް އިންތިހާބްވި އަލީ ނިޒާރު "އައްޑޫލައިވް"ގައި ވިދާޅުވެފައިވަނިކޮށް މުއިއްޒު ކުރެއްވި ޓްވީޓެއްގައި ވިދާޅުވެފައިވަނީ އެ ފުރުސަތަށް އިންތިޒާރު ކުރައްވާ ކަމަށެވެ.
ފާއިތުވި ދެ ސަރުކާރުގެވެސް ހައުސިން މިނިސްޓަރަކަށް ހުންނެވި މުއިއްޒު މި ގޮތަށް ވިދާޅުވެފައިވާ އިރު ހައުސިން މިނިސްޓްރީގެ ބެލުމުގެ ދަށުގައި ހުރެ އީސީސީވަނީ ވީރާނާވެފައެވެ. އަދި އެތަނުގެ މަރާމާތަށް ދައުލަތުންވަނީ އެތައް މިލިއިން ރުފިޔާއެއް ހަރަދުކުރަން ވަނީ މަޖްބޫރުވެފައެވެ.
ހައުސިން މިނިސްޓްރީގެ ބެލުމުގެ ދަށުން ތަނުގެ ސެކިއުރިޓީ އެމްއެންޑީއެފް އާއި ހަވާލުކޮށްފައިވާއިރު ތަނުން ބައެއް ތަކެތި ވަނީ ވަގަށް ގެންގޮސްފައެވެ. މިހާތަނަށް މިއިން ކަމެއް ހައްލު ކުރުމަށް ހައުސިން މިނިސްޓްރީން މަސައްކަތެއް ކުރެވިފައި ނުވެއެވެ.
ނިޒާރު ވިދާޅުވީ އީސީސީ ވީރާނާވާން ދޫކޮށްލި މައްސަލައަކީ ސީރިިއަސް މައްސަލައެއް ކަމަށެވެ. އަދި މިކަމުގައި ހައުސިން މިނިސްޓަރު މަޖިލީސްތެރެއިން ޖަވާބުދާރީ ކުރުވުމަށް އައްޑޫއަށް ނިސްބަތްވާ ހުރިހާ މަޖިލިސް މެމްބަރުން ބައިވެރިވުމަށް އެދިވަޑައިގަތެވެ.