މި މަހުގެ 19 ވަނަ ދުވަހު ފެށުމަށް ހަމަޖެހިފައިވާ އޭއެފްސީ ޗެލެންޖް ކަޕްގެ ގްރޫޕް ބީގެ މެޗްތައް ބެލުމަށް އައްޑޫގެ ރަށްތަކުން ދަތުރުކުރާ ފަރާތްތަކަށް ފަސޭހައި ދަތުރު ކުރެވޭނެ އިންތިޒާމް ހަމަޖައްސަމުންދާ ކަމަށް ކުޅިވަރާއި ބެހޭ ވަޒީރު މުހައްމަދު މަލީހް ޖަމާލް ވިދާޅުވެއްޖެ އެވެ.
"އައްޑޫ ލައިވް" އިން ދެންނެވި ސުވާލަކަށް މަލީހް ވިދާޅުވީ އައްޑޫގެ ދަތުރު ފަތުރުގެ ކަންކަން ހަމަޖެއްސުމަށް މިއަދު ޓްރާންސްޕޯޓް މިނިސްޓްރީއާއި މަޝްވަރާ ކުރާނެކަ މަށެވެ.
އައްޑޫގެ އެއްގަމާއި، ކަނޑުގެ ދަތުރު ފަތުރުގެ ކަންކަން ހަމަޖެއްސުމަށް ސަރުކާރުން ހަވާލް ކޮށްފައިވަނީ އެމްވީކޭ ކުންފުނިއާއިއެވެ.
"އަޅުގަނޑުމެން މިވަނީ މުބާރާތާއި ގުޅިގެން ވަރަށް ބޮޑެތި ކަންކަން ކޮށްފައި، އެހެންވެ އައްޑޫގެ އެކި ރަށްތަކުން މެޗްބަލަންދާ ފަރާތްތަކަށް ފަސޭހައި ދެވޭނެ އިންތިޒާމް ހަމަޖެއްސުމަށް ޓްރާންސްޕޯޓް މިނިސްޓްރީ އާއި އަދި ކައުންސިލާއި ވެސް މަޝްވަރާ ކުރާނަން." މިނިސްޓަރު ވިދާޅުވި އެވެ.
މަލީހް ވިދާޅުވީ ގްރޫޕް ބީގެ މެޗް ކުޅުމަށް ހަމަޖެހިފައިވާ ހިތަދޫ ޒޯން ސްޓޭޑިއަމްއަށް މެޗް ބެލުމަށް ފުވައްމުލަކާއި، ހުވަދޫން މީހުން އައުމަށް ހަމަޖެހިފައިވާކަމަށް ހަބަރުލިބިފައިވާ ކަމަށެވެ.
އައްޑޫގެ ރަށްތަކަށް ޓްރާންސްޕޯޓް ހިދްމަތްދޭ އެމްވީކޭއިން މިހާރު ހުޅުމީދޫ އާއި ފޭދޫ ދެމެދު ދުވާލަކު ކުރަނީ އެންމެ ދަތުރެކެވެ، އަދި އެއްގަމު ދަތުރުތަކުގައި ބޭނުން ކުރަމުންދަނީވެސް އެންމެ ބަހެކެވެ.
އެމްވީކޭއިން ވަނީ ފުވައްމުލަކާއި ދެމެދު ކުރަމުން އައި ފެރީ ހިދްމަތް ވެސް މެދުކާޑާލާފައެވެ.