މި މަހުގެ 19-30 އަށް މާލެ އާއި އައްޑޫގައި ކުރިއަށްދާ އޭއެފްސީ ޗެލެންޖް ކަޕްގައި އައްޑޫގެ ސަލާމަތީ ކަންކަން ބެލެހެއްޓުމުގައި ހަރަކާތްތެރިވާ ފުލުހުން މިއަދު ހެނދުނު އައްޑު އަށް ފުރައިފިއެވެ.
އައްޑު އަށް ދާ ފުލުހުން ފުރާފައިވަނީ މިއަދު ހެނދުނު 06:30 ހާއިރު ކަނޑު މަގުންނެވެ.
އޭއެފްސީ ޗެލެންޖް ކަޕްގެ ގްރޫޕް ބީގެ މެޗުތައް އައްޑޫ ސިޓީގައި ކުޅޭ އިރު އައްޑޫ ސިޓީގެ ޒޯން ސްޓޭޑިއަމް އާއި ޓީމްތައް ތިބުމަށް ހަމަޖެހިފައިވާ ދެ ރިސޯޓްގެ އިތުރުން ޓީމްތަތައް ދަތުރު ކުރާ މަގުތަކާއި ކޮންމެ ޓީމެއްގެ ސަލާމަތީ ކަންކަން ބެލެހެއްޓުމާއި ޓީމްތައް ޕްރެކްޓިސް ކުރުމަށް ހަމަޖެހިފައިވާ ދެ ދަނޑުގެ ސަލާމަތީ ކަންކަން ބެލެހެއްޓުމުގައި ފުލުުހުން ހަރަކާތްތެރި ވާނެ އެވެ.
މީގެ އިތުރުން ވެސް އައްޑޫ ސިޓީގައި ކުށް ކުރުން މަދުކުރުމަށް އައްޑޫގައި މަސައްކަތް ކުރާ ފުލުހުންގެ އިތުރުން މިއަދު އައްޑޫ ސިޓީއަށް ފުރި ފުލުހުން މަސައްކަތް ކުރަމުން ދާނެ އެވެ.
އޭއެފްސީ ޗެލެންޖް ކަޕްް ސަލާމަތާއި ރައްކާތެރިކަމާ އެކު ކުރިއަށް ގެންދެވޭނެ މާހައުލެއް ޤާއިމްކޮށް ދިނުމުގެ ފުލުހުން ވަނީ ޚާއްސަ އޮޕަރޭޝަނެއް ފަށައިފަ އެވެ.