ރާއްޖޭން 2030 ގެ ކުރިން އެއިޑްސް އާއި ހެޕަޓައިޓިސް އަދި ޖިންސީ ގުޅުންތަކުން އަރާ ބަލިތައް ނައްތާލަން ގައުމީ ފެންވަރުގެ ޕްލޭނެއް އިފްތިތާހުކޮށްފި އެވެ.
އެ ޕްލޭން އިފުތިތާހުކުރީ އެއިޑްސް ދުވަސް ފާހަގަކުރުމަށް ގއ. އަތޮޅުގައި ކުރިއަށްދާ ހަރަކާތްތަކުގެ ތެރެއިން، ވިލިނގިލީގައި އިއްޔެ ހަވީރު ބޭއްވި ރަސްމިއްޔާތެއްގަ އެވެ.
އެ ރަސްމިއްޔާތުގައި އެއިޑްސް ޖައްސާ އެޗްއައިވީ ވައިރަޖާއި ހެޕަޓައިޓިސް އަދި ސެކްޝުއަލީ ޓްރާންސްމިޓެޑް އިންފެކްޝަން (އެސްޓީއައި) ނޭޝަނަލް ސްޓްރެޓެޖިކް ޕްލޭން އިފްތިތާހުކޮށް ދެއްވީ ރައީސް އޮފީހުގެ ސްޕެޝަލް އެޑްވައިޒަރު އޮން ސޯޝަލް ޕޮލިސީ ޑރ. މުސްތަފާ ލުތުފީ އެވެ. މިއީ ފަސް އަހަރުގެ ގައުމީ ޕްލޭނެކެވެ.
އެޗް.އައި.ވީ، ހެޕަޓައިޓިސް އަދި އެސް.ޓީ.އައި ގެ ނޭޝަނަލް ސްޓްރެޓެޖިކް ޕްލޭން، ރައީސުލް ޖުމްހޫރިއްޔާގެ އޮފީހުގެ ސްޕެޝަލް އެޑްވައިޒަރ އޮން ސޯޝަލް ޕޮލިސީ ޑރ. މުޞްޠަފާ ލުޠުފީ ލޯންޗްކޮށް ދެއްވައިފި pic.twitter.com/go5BpEzMnt
— Ministry of Health (@MoHmv) December 9, 2022
ރަސްމިއްޔާތުގައި ހެލްތު މިނިސްޓަރު އަހުމަދު ނަސީމް ވިދާޅުވީ ޕްލޭނަކީ އެއިޑްސް، ހެޕަޓައިޓިސް އަދި ޖިންސީ ގުޅުމުން އަރާ އެހެނިހެން ބަލިތައްވެސް، 2030ވަނަ އަހަރުގެ ކުރިން ރާއްޖޭން ނައްތާލުން ކަމަށެވެ. އެހެންވެ މިކަމަށް އޮތް އެންމެ މުހިންމު ކަމަކީ އާއްމުން ހޭލުންތެރިވެ، ދިރިއުޅުމުގެ ނޭދެވޭ އާދަތަކުން މުޖުތަމައު ދުރުހެލިވުން ކަމަށް މިނިސްޓަރު ވިދާޅުވި އެވެ.
ކޮންމެ އަހަރެއްގެ ޑިސެންބަރު މަހުގެ 1 ވަނަ ދުވަހަކީ ބައިނަލްއަޤްވާމީ އޭޑްސް ބައްޔާއި ދެކޮޅަށް މަސައްކަތް ކުރާ ދުވަސް ، މިދުވަސް ފާހަގަ ކުރުމުގެ މައިގަނޑު މަޤްސަދަކީ އޭޑްސް ބަލީގެ ނުރައްކަލުން ދިވެހި މުޖުތަމައު ސަލާމަތްކުރުމުގެ ގޮތުން ހޭލުންތެރިކަން އިތުރުކުރުމާއި، pic.twitter.com/ZQTUYHWkIk
— Ministry of Health (@MoHmv) December 9, 2022
ނަސީމް ވިދާޅުވީ އެފަދަ ބަލިތަކުގެ ފަރުވާނެ ނިޒާމު މިހާރު ވެސް ރާއްޖޭގައި ފުޅާކޮށްފައިވާ ކަމަށެވެ. އެގޮތުން ބައެއް ބަލިތަކުގެ ޓެސްޓުތައް ސިއްޙީ މަރުކަޒުތަކާއި ހޮސްޕިޓަލްތަކުގައި ޓެސްޓުކުރެވޭނެ އިންތިޒާމު ހަމަޖައްސާފައިވާ ކަމަށާއި އަންނަ އަހަރުގެ ކުރީކޮޅުން ފެށިގެން، ހެޕަޓައިޓިސްއަށް ޓެސްޓުކުރެވޭނެ ފަސޭހަ އިންތިޒާމް ވެސް ރާއްޖޭގެ އެކި ކަންކޮޅުތަކުގައި ހަމަޖެހިގެން ދާނެ ކަމަށް މިނިސްޓަރު ވިދާޅުުވި އެވެ.
ބަލި ފެތުރުމަށް މަގުފަހިވާފަދަ އާދަތަކާއި ދުރުހެލިވުމަށް އެހީތެރިވެދިނުން، އޭޑްސް ދުވަހާއި ގުޅިގެން، ޑިސެންބަރު 5 ން 12 އަށް ގއ. ވިލިނގިލި، ދާންދޫ އަދި ގެމަނަފުށީގައި ހަރަކާތްތަކެއް ކުރިއަށް ގެންދިއުމަށް ވަނީ ހަމަ ޖެހިފައި، @WHOMaldives @SDF_SAARC @HPA_MV @UNICEFMaldives pic.twitter.com/p2JfshzyHp
— Ministry of Health (@MoHmv) December 9, 2022
"މަސައްކަތްކޮށް ރާއްޖެއިން މި ބަލިތައް ނައްތާލެވޭނެކަމުގެ ޔަގީންކަން ޑަބްލިއުއެޗްއޯއިންވެސް ދޭ،" ނަސީމު ވިދާޅުވި އެވެ. "މީގެ ކުރިން ވެސް ރާއްޖެ އަކީ މިފަދަ އެކި ބަލިތައް ނައްތާލުމުގައި މުޅި ސަރަޙައްދުގައި ވެސް ނަމޫނާ ގައުމެއް."