ޞިއްޚީ ޚިދުމަތް ހޯދަން ހުޅުމީދޫ ރައްޔިތުން އުފުލާ ބުރައަށް، ޚާއްޞަކޮށް މާބަނޑު މީހުން އުފުލަމުންދާ ބުރައަށް އެންމެ ފަސޭހައިން ލުއި ހޯދައިދެވޭނީ ހިތަދޫ ރީޖަނަލް ހޮސްޕިޓަލް (އެޗްއާރުއެޗް) އަށް ކަމަށް ޑރ. ޢަބްދުﷲ އަފީފް ވިދާޅުވެއްޖެ އެވެ.
ހުޅުމީދޫގެ މާބަނޑު މީހުންނާއި އެހެނިހެން ބަލިމީހުން ޑޮކްޓަރަށް ދެއްކުމަށްޓަކައި އެޗްއާރުއެޗަށް ދިއުމަށް ކުރަމުންދާ "ވޭންދެނިވި" ދަތުރާ ބެހޭ ގޮތުން "އައްޑޫލައިވް"ގައި އިއްޔެ ޝާއިޢުކޮށްފައިވާ ކިޔުންތެރިއެއްގެ ކޮމެންޓަކާއި ގުޅިގެން ޑރ. އަފީފް ސޯޝަލް މީޑިއާގައި މިއަދު ވިދާޅުވީ ހުޅުމީދޫ ޞިއްޚީ މަރުކަޒުގައި ހަފްތާއަކު އެއްފަހަރު މާބަނޑު މީހުން ޑޮކްޓަރަށް ދެއްކޭނެ އިންތިޒާމް ޤާއިމްކުރަން ޖެހޭ ކަމަށެވެ.
އެގޮތުން އެޗްއާރުއެޗްގައި ހުންނަ މާބަނޑު މީހުންނަށް ފަރުވާދޭ ޚާއްޞަ ޑޮކްޓަރު ހަފްތާއަކި އެއްދުވަހު ހުޅުމީދޫ އަށް ގޮސް، މާބަނޑު މީހުންގެ ކްލިނިކް ހިންގަންވީ ކަމަށް ޑރ. އަފީފް ވިދާޅުވިއެވެ.
ޑރ. އަފީފް ވިދާޅުވީ މި ކަމަކީ ކޮންމެހެން ހެލްތް މިނިސްޓްރީ އަށް ނުވަތަ ރާއްޖޭގެ ރައީސުލްޖުމްހޫރިއްޔާ އަށް ނާންގާވެސް ކުރެވިދާނެ ކަމެއް ކަމަށާއި ބޭނުންވަނީ އިސްނެގުމާއެކު ރައްޔިތުންނަށް ޚިދުމަތް ދިނުން ކަމަށެވެ.
ޓައީ އަޅައިގެން ފިނި ކޮޓަރީގައި ތިއްބަސް އަދި އެ ނިމުނީ ނޫން ކަމަށް ސ. މީދޫއަށް ނިސްބަތްވާ މަޝްހޫރު ކުޑަކުދިންގެ ޑޮކްޓަރު ޑރ. އަބްދުﷲ އަފީފް ވިދާޅުވިއެވެ.
ހިތަދޫ ރީޖަނަލް ހޮސްޕިޓަލަށް ހުޅުމީދޫ ރައްޔިތުން އަދިވެސް ދަތުރު ކުރަމުން ދަނީ ވަރަށް ދަތިހާލުގައެވެ. އެމްވީކޭ ފެރީގައި ހެނދުނު އަންނަ ބަލި މީހާއަށް ރަށައް ދެވެނީ ހަވީރު އިރުއޮއްސޭ ފަހުންނެވެ.
"ހެނދުނު 7 ގެ ފެރީން ފޭދޫ އަށް ގޮސްފައި، ޕަބްލިކް ޓްރާންސްޕޯޓޭ ކިޔާފައި އޮންނަ ކުޑަ އަލިފާން ފޮއްޓެއްވަރު ބަހަކަށް ނުވަތަ ބޮޑު އަގު ދީފައި ޓެކްސީއަކަށް އަރައިގެން ހިތަދޫ ހޮސްޕިޓަލަށް. ގިނަ ބަޔަަކު ހޮސްޕިޓަލަށް ދައްކާ ނިމޭނެ މެންދުރުކުރިން، އެކަމަކުވެސް ހަމަ މަގުމަތީގައި ނުވަތަ ކޮންމެވެސް ގެއެއްގައި ވަރުބަލިކަންމަތީ ތާށިވެފައި ތިބެން މި ޖެހެނީ 4 ޖަހާއިރު ފެރީ ފުރަންދެން! ކައުންސިލާއި ސަރުކާރުން މިކަން ރަނގަޅުކޮށްދޭނީ ކޮންއިރަކުންބާ؟" އައްޑޫލައިވްގެ ކިއުންތެރިއަކު ކޮމެންޓްކޮށްފައި ވެއެވެ.
ހުޅުމީދޫ ސިއްހީ މަރުކަޒުން އިމަޖެންސީގައި ބަލި މީހުން ހިތަދޫ ރީޖަނަލް ހޮސްޕިޓަލަށް ގެންދަން ބޭނުން ކުރަމުން ދިޔަ ލޯންޗް މަރާމާތަށް ގެންދިޔަ ގޮތަށް ފ. އަތޮޅަށް ފޮނުވަން ވަނީ ނިންމާފައެވެ. އެހެންވެ އެރަށުގެ މީހުން އިމަޖެންސީއެއް ދިމާވެއްޖެ ނަމަ ހޮސްޕިޓަލަށް ދާން ޖެހެނީ 2500 ރުފިޔާ ހަރަދުކޮށްފައެވެ.