ހިތަދޫގައި ރައީސް ނަޝީދު ސަރުކާރުން އިމާރާތްކުރި ކޮންވެންޝަން ސެންޓަރު (އީސީސީ) ވިރާނާ ވެގެން ދިޔަ ގޮތަށް ހިތަދޫ ޒޯން ސްޓޭޑިއަމް ވިރާނާވެގެން ނުދާނެ ކަމަށް ކުޅިވަރާ ބެހޭ ވަޒީރު މުހައްމަދު މަލީހް ޖަމާލް ވިދާޅުވެއްޖެ އެވެ.
މަލީހް ވިދާޅުވީ ހިތަދޫ ޒޯން ސްޓޭޑިއަމް އޭއެފްސީން ގަބޫލް ކުރާ ފެންވަރަށް ވަނީ ތައްޔާރު ކުރެވިފައިކަމަށާއި، ކުރި މަގުގައި ބައިނަލް އަގްވާމީ މެޗްތައް ޒޯން ސްޓޭޑިއަމްގައި ކުޅެވޭނެ ކަމަށެވެ.
"އަޅުގަނޑާއި އޭއެފްސީގެ އިސްވެރިންނާއި ބައްދަލުކޮށް ވަނީ ވާހަކަ ދެކެވިފައިފައި. އަންނަ 2015 ވަނަ އަހަރުގެ ފުރަތަމަ ކުއާޓާރު ނުވަތަ ފުރަތަމަ މަސްތަކުގައި ވޯލްޑް ކަޕް ކޮލިފައިން މެޗްތަކެއް ޒޯން ސްޓޭޑިއަމްގައި ކުޅޭ ގޮތަށް." އޭނާ ވިދާޅުވި އެވެ.
މަލީހް ވިދާޅުވީ މި ސަރުކާރުން ސްޓޭޑިއަމް ތަރައްޤީ ކުރީ ޕްލޭނެއް އޮވެގެން ކަމަށެވެ. އެހެންވެ އީސީސީއަށް ވީ ގޮތް ނުވާނެކަމަށެވެ.
މަލީހް މިގޮތަށް ވިދާޅުވެފައިވާ އިރު ސްޓޭޑިއަމްގެ ފުރާޅު މުޅިން ހިޔާކުރަން ނިންމާފައި އޮތް ނަމަވެސް ހިޔާކޮށްފައިވަނީ ހަމައެކަނި ވީއައިޕީން ތިބޭ ތަން އެކަނިއެވެ. އަދި ދަނޑުގެ ވަށައިގެން ޖަހާފައިވަނީ ވަރަށް އާދައިގެ ފެންސެކެވެ.
ހިތަދޫ ޒޯން ސްޓޭޑިއަމްގައި ދާއިމީ ލައިޓިން ހެދުމަށް އޮތް ނަމަވެސް ޗެލެންޖް ކަޕަށް ލަންކާއިން ވަނީ ވަގުތީ ލައިޓިން ސިސްޓަމެއް ގެނެސް ހަރުކުރުމުގެ މަސައްކަތް ފަށާފައެވެ. އަދި ތަނުގެ ވީއައިޕީ އޭރިއާގައި ޖެހުމަށް ނިންމާފައިވަނީ އީސީސީން ގެންނަ ގޮޑިތަކެވެ.