ބޮލީވުޑްގެ މަޝްހޫރު ބަތަލާ މަދޫރީ ޑިކްޝިޓަށް 47 އަހަރު ފުރިއްޖެ އެވެ.
މިއަދަކީ އޭނާގެ އުފަން ދުވަހެެވެ. އެހެންވެ މަދުރީގެ ފޭނުން އަންނަނީ ސޯޝަލް މީޑިއާ މެދުވެރިކޮށް އޭނާ އަށް އުފަން ދުވަހުގެ ތަހުނިޔާ ވެސް ފޮނުވަމުންނެވެ.
މޮޅު އެކްޓަރެއްގެ އިތުރުން ހުނަރުވެރި ނެށުންތެރިއެއްގެ ގޮތުގައި މަޝްހޫރުވެފައިވާ މަދޫރީ އެންމެ ފުރަތަމަ ބޮލީވުޑަށް ނިކުތީ ރާޖްޝްރީ ޕްރޮޑަކްޝަންގެ "އަބޯދް" އިން 1984 ގަ އެވެ.
އެހެން ނަމަވެސް އެ ފިލްމުން ގިނަ ބަޔަކަށް އޭނާ ފާހަގަވެގެން ގޮސްފައި ނެތަސް، މަދޫރީ މަޝްހޫރު ތަރިއަކަށް ވެގެން ދިޔައީ އޭގެ ހަތަރު އަހަރު ފަހުން އަނިލް ކަޕޫރާ އާ އެކު ކުޅުނު "ތޭޒާބް" އިންނެވެ. އެ ފިލްމު ބޮޑު ބްލޮކްބަސްޓާއަކަށްވެގެން ދިޔަ އިރު، ސަރޯޖް ހާންގެ ބަޑިތަކަށް މަދޫރީ ނެށި "އެކް ދޯ ތީން" ލަވައަކީ އަދި އަދަށް ވެސް ބެލުންތެރިންގެ މެދުގައި ވަރަށް މަޝްހޫރު އަދި ވަރަށް މަގުބޫލް ލަވައެކެވެ.
އެ ލަވައިން މަދޫރީ ވަނީ އޭނާއަކީ ވަރުގދަ ނެށުންތެރިއެއްކަން ސާބިތުކޮށް ދީފަ އެވެ. "ތޭޒާބް" އިން ލިބުނު ކާމިޔާބާ އެކު މަދުރީވެގެން ދިޔައީ 1990 ގެ އަހަރުތަކުގައި އެންމެ ވިދާލި، އެންމެ ނުފޫޒު ގަދަ އެއް ބަތަލާއަށެވެ.
އެ ދުވަސްވަރު އޭނާ ކާމިޔާބު ވަރަށް ގިން ފިލްމްތަކެެއް ކުޅުނެވެ. މަދޫރީގެ ފިލްމީ ކެރިއާ 2000 ވަނަ އަހަރުގެ ކުރީ ކޮޅާ ހަމައަށް ވަރަށް ކުލަގަދަކޮށް ފާގަހަވަމުން ދިޔަ އެވެ.
އެހެން ނަމަވެސް 1999 ގައި ކައިވެނިކޮށް، މަދޫރީ ވަނީ އެމެރިކާ އަށް ދިރިއުޅުން ބަދަލުކޮށްފަ އެވެ. އޭރު އެންމެ ފަހުން އޭނާ ބޮޑު ސްކްރީނުން ފެނުނު ފިލްމަކީ ސަންޖޭ ލީލާ ބަންސާލީގެ "ދޭވްދާސް" އެެވެ.
އެމެރިކާގައި ދިރިއުޅެމުން ދިޔަ އިންޑިއާ އަށް ނިސްބަތްވާ ޑރ. ސްރީރާމް ނޭނޭ އާ ކައިވެނިކޮށްގެން މަދޫރީ އަށް ވަނީ ދެ ފިރިހެން ކުދިން ވެސް ލިބިފަ އެވެ. އެއީ 11 އަހަރުގެ އަރިން އާއި ނުވަ އަހަރުގެ ރާޔަން އެވެ.
އަދި އެމެރިކާގައި ގިނަ ދުވަސްތަކެއް ވަންދެން އުޅުމަށް ފަހު 2011 ވަނަ އަހަރު އޭނާ ވަނީ އަލުން މުމްބާއީ ބަދަލުވެފަ އެވެ. އިންޑިއާ އަށް އަލުން ބަދަލުވުމުވުގެ ކުރިން އިންޑިއާ އަށް ދޭތެރެ ދޭތެރެ އިން ގޮސް މަދުރީ ވަނީ 2007 ވަނަ އަހަރު "އަޖް ނަޗްލޭ" ބެލުންތެރިންނާ ހަމައަށް ގެނެސް ދީފަ އެވެ. އެކަމަކު އެ ފިލްމަށް ބެލުންތެރިންގެ މާ ބޮޑު ތަރުހީބެއް ނުލިބުނެވެ.
އެހެންވެ ރީތި ހިނިތުންވުމެއްގެ ވެރި މަދޫރީ ބޮޑު ސްކްރީނާ ދުރުގައި ހުރެގެން މަސައްކަތް ކުރަމުން ދިޔައީ ރަނގަޅު އޮފާއެއް ލިބިއްޖެ ނަމަ އަލުން ބޮޑު ސްކްރީނަށް އައުމަށެވެ.
އެކަމަކު ހިތްހަމަޖެހޭ ވަރުގެ ސްކްރިޕްޓެއް އަތުނުޖެހިގެން މަދޫރީ އުޅުނީ ބޮޑު ސްކްރީނާ ދުރުގަ އެވެ. ނަމަވެސް ޓީވީ ޗެނަލްތަކުން ގެނެސް ދީފައިވާ މަޝްހޫރު ބައެއް ޑާންސް ޝޯތަކުގެ ޖަޖްކަން މަދޫރީކޮށްފައިވެ އެވެ.
ގިނަ ދުވަސްތަކެއް ވަންދެން ބޮޑު ސްކްރީނާ ދުރުގައި ހުރުމަށް ފަހު، މަދޫރީ އެންމެ ފަހުން އެނބުރި އައީ މި އަހަރު އެވެ. އޭނާގެ ދެ ފިލްމެއް މި އަހަރުގެ މިހާތަނަށް ވަނީ ނިކުމެފަ އެވެ. އެއީ "ގުލާބް ގޭންގް" އާއި "ދޭޅް އިޝްގިޔާ" އެވެ.
މަދޫރީގެ ފާހަގަކޮށްލެވޭ އިތުރު ފިލްމުތަކުގެ ތެރޭގައި "ހަމް އާޕްކޭ ހޭ ކޯން". "ކަލްނަޔަކް"، "ދިލް ތޯ ޕާގަލް ހޭ"، "ރާމް ލަކަން"، "ޕަރިންދާ" ފަދަ ފިލްމުތައް ހިމެނެ އެވެ.