މި މަހުގެ 19-30 އަށް މާލެ އާއި އައްޑޫ ސިޓީގައި ބޭއްވުމަށް ހަމަޖެހިފައިވާ އޭއެފްސީ ޗެލެންޖް ކަޕްގައި އައްޑޫ ސިޓީގައި މެޗުތައް ކުޅުމަށް ހަމަޖެހިފައިވާ ދުވަސްތަކުގައި މެޗު ފެށުމަށް ހަމަޖެހިފައިވާ ވަގުތުގެ ދެ ގަޑިއިރު ކުރިން އައްޑޫ ސިޓީ ޒޯން ސްޓޭޑިއަމްގެ ވަށައިގެންވާ މަގުތައް އެއްގަމު ދަތުރުފަތުގެ ނިޒާމުގައި ބޭނުން ކުރާ އުޅަނދުތަކަށް ދަތުރު ނުކުރެވޭ ގޮތަށް ބަންދު ކުރާ ގޮތަށް ހަމަޖައްސައިފި އެވެ.
އެގޮތުން ބަންދުކުރުމަށް ހަމަޖެހިފައިވާ މަގުތަކަކީ ޝަރަފުއްދީން މަގާއި ޝީޝަމް ހިނގުން ގުޅުނު ކަންމަތިން ފެށިގެން ދެކުނަށް، ޝަރަފުއްދީން މަގާއި ޝީޝަމް ހިނގުން ގުޅުނު ކަންމަތިން ފެށިގެން ހުޅަނގަށް، ޝަރަފުއްދީން މަގާއި ވާދީ ހިނގުން ގުޅުނު ކަންމަތިން ފެށިގެން ދެކުނަށް، ވާދީ ހިނގުމާއި ޒޯން ހިނގުން ގުޅުނު ކަންމަތިން ފެށިގެން އިރަށެވެ.
އަދި މަގުތައް ބަންދު ކުރުމަށް ހަމަޖެހިފައިވާ ސަރަޙައްދުތަކަކީ ޝަރަފުއްދީން މަގާއި ޝީޝަމް ހިނގުން ގުޅުނު ކަންމަތި، ޝަރަފުއްދީން މަޤާއި ވިޝަންގޯޅި ގުޅުނު ކަންމަތި، ޝަރަފުއްދީން މަގާއި އަސްނާ ހިނގުން ގުޅުނު ކަންމަތި، ޝަރަފުއްދީން މަގާއި ސަވާގޯޅި ގުޅުނު ކަންމަތި، ޝަރަފުއްދީން މަގާއި ވާދީ ހިނގުން ގުޅުނު ކަންމަތި، ވާދީ ހިނގުމާއި ޒޯން ހިނގުން ގުޅުނު ކަންމަތި، ވާދީ ހިނގުމާއި ދެވިނަގޯޅި ގުޅުނު ކަންމަތި އަދި ޒޯން ހިނގުމާއި ޝަރަފުއްދީން މަގު ގުޅުނު ކަންމައްޗެވެ.
އަށް ޓީމް ވާދަ ކުރާ އޭއެފްސީ ޗެލެންޖް ކަޕުގައި އައްޑޫގައި ކުޅޭނީ ގްރޫޕް ބީގެ މެޗްތަކެވެ. އެ ގްރޫޕްގައި ހިމެނެނީ ތުރުކްމެނިސްތާން، ފިލިޕިންސް، އަފްޢާނިސްތާން އަދި ލާއޯސް އެވެ.
މުބާރާތުގެ ކުޅުން އައްޑޫގައި ފަށާނީ މި މަހުގެ 20 ވަނަ ދުވަހު އެވެ.