އައްޑޫ ލިންކް ރޯޑްގެ "ރުއް ފަށާގައި" ހުރި ރުއްތައް ނެގިތާ ގިނަ ދުވަސްތަކެއް ފަހުން އެތަނުގައި މަގުބައްތި ޖަހަން ޖަހައިފި އެވެ.
"ރުއްފަށާ" ގައި ހުރި 50 އަށް ވުރެ ގިނަ ރުއް އައްޑޫ ސިޓީ ކައުންސިލުން ނެގީ މި އަހަރުގެ މާޗް މަހުގެ 10 ގަ އެވެ. ކައުންސިލުން ބުނެފައިވާ ގޮތުގައި ރުއްތައް ނެގީ އެ ރުއް ތަކަކީ ބޭނުން ހިފޭ ރުއްތަކަކަށް ނުވެފައި، ރުއްތައް ހުރި ސަރަހައްދުން ދުއްވާ އިރު، ރުއްތަކުން އެއްޗެހި ވެއްޓި ދުއްވާ އެއްޗިއްސަށް ގެއްލުން ވެސް ވަމުން ދާތީ ކަމަށެވެ.
ނަމަވެސް ކައުންސިލުން އެ ރުތައް ނެގުމުން ގިނަ ބަޔަކު އެކަމާ ކަންބޮޑުވުން ފާޅުކޮށް، ކައުންސިލަށް ވަރަށް ބޮޑަށް ފާޑު ވެސް ކިޔާފައިވެ އެވެ.
ރުއްތައް ނެގުމަށް ފަހު ކައުންސިލުން ބުނެފައި ވަނީ އެތަނުގައި ގަސްތަކެއް އިންދައި ލައިޓް ވެސް ޖަހާނެ ކަމަށެވެ. "ރުއްފަށާ" ސަރަހައްދުގައި ލައިޓްތައް މިހާރު ޖަހައި ނިންމާފައިވާ އިރު، މޭޔަރު އަލީ ނިޒާރު ރޭ ކުރެއްވި ފޭސްބުކް ޕޯސްޓެއްގައި ވިދާޅުވީ މިހާރު ކުރިއަށްދާ އައްޑޫ މަގު ހެދުމުގެ މަޝްރޫއު އެއްކޮށް ނިމޭ އިރު، ލިންކް ރޯޑްގައި އެއްކޮށް ދިއްލައިލެވޭނެ އެވެ.
ލިންކް ރޯޑް ފާހަގަކުރެވެނީ މަގު ހިމެނޭ ފަޅު ހިސާބުތަކުގައި ލައިޓްތައް ޖަހާފައި ނެތް މަގެއްގެ ގޮތުގަ އެވެ.