މާދަމާ ފަށާ އޭއެފްސީ ޗެލެންޖް ކަޕް ގްރޫޕް ބީގެ ފުރަތަމަ މެޗްގައި ވާދަކުރާ ލާއޯސް އާއި ތުރުކަމަނިސްތާން ޓީމްގެ ޕްރެކްޓިސް މެޗް ކުޅޭ އައްޑޫ ސްޓޭޑިއަމްގައި ބާއްވައިފިއެވެ.
މިއަދު ހަވީރު ފުރަތަމަ ފަރިތަކުރުން ބާއްވާފައިވަނީ ލާއޯސް ޓީމުންނެވެ. ހަވީރު 4 އިން 5 ޖަހަންދެން ކުރިއަށް ގެންދިޔަ ޓްރެއިނިންގައި ކޯޗް ބޮޑަށް ބަލާފައިވަނީ ޕާސިން ގޭމެއް ކުޅުމަށެވެ. ޕްރެކްޓިސް ކުރަމުން ދިޔަ ވަގުތު ލާއޯސް ޓިމްގެ ކީޕަރު ކޮންމެ ވެސް ވަރެއްގެ އިންޖަރީއެއްގައި ހުރިތަން ފާހަނގަވެގެން ދިޔައެވެ.
ރާއްޖެއާއި ލާއޯސް ބައްދަލު ކުރި މެޗްގައި ލާއޯސްގެ ކީޕަރަށް ވަނީ ކޮންމެވެސް ވަރެއްގެ އިންޖަރީއެއް ވެފައެވެ. ލާއޯސް ކޯޗު ބުނީ ޗެލެންޖް ކަޕްގައި އޭނާގެ ޓީމުން ދައްކާނީ ރާއްޖެ އާއި ކޫލުނު ފަދަ ގޭމެއް ނޫން ކަމަށެވެ.
ލާއޯސްގެ ޓީމް އައްޑޫއަށް އައިސްފައިވަނީ ރޭ 10:30 ހާއިރުއެވެ.
ފުރަތަމަ މެޗްގައި ވާދަ ކުރާ ތުރުކަމަނިސްތާންގެ ޓީމުންވެސް ވަނީ މިއަދު ފަރިތަކުރުން ސްޓޭޑިއަމްގައި ބާއްވާފައެވެ. ގްރޫޕް ބީގައި ހިމެނޭ އަފްޢާނިސްތާން ޓީމާއި، ޕިލިޕީންސްގެ ޓީމްގެ ފަރިތަކުރުންތައް ކުރިއަށް ގެންގޮސްފައިވަނީ މީދޫ ސްޓޭޑިއަމްގައެވެ.