ވަރަށް އަވަހަށް މި ސަރުކާރުގެ ވަޒީރުން އިސްތިއުފާ ދޭން ފަށާނެ ކަމަށް އިދިކޮޅުން ބުނެފި އެވެ.
ރޭ ޕީޕީއެމް-ޕީއެންސީން ބޭއްވި ޖަގަހަ ޖަލްސާގައި ވާހަކަދައްކަމުން ޕީއެންސީގެ ނައިބް ރައީސް އިބްރާހިމް ޝުޖާއު ވިދާޅުވީ ހުރިހާ ކަމެއް ވެސް ދަނީ އިދިކޮޅުން ލިޔެފައިވާ ތަރުތީބާއި އެއްގޮތަށް ކަމަށާއި ވަރަށް އަވަހަށް މި ސަރުކާރުގެ ވަޒީރުންނާއި ޑެޕިއުޓީ މިނިސްޓަރުން އިސްތިއުފާ ދެއްވަން ފަށާނެ ކަމަށެވެ.
އެގޮތުން ރައީސް އިބްރާހިމް މުހައްމަދު ސޯލިހަށް އެނގިވަޑައިނުގަންނަވާ ބައިވަރު ކަންތައްތައް ސަރުކާރުގެ ތެރެއިން ހިނގަމުންދާ ކަމަށާއި އެ ކަންކަން ހިނގަމުންދަނީ މަޑުމަޑުން ރޭވިފައި އޮތް ގޮތަށް ކަމަށްވެސް ޝުޖާއު ވިދާޅުވި އެވެ.
"އަޅުގަނޑުމެން މިވެނި ވަޒީރެއް ކައިރީގައި ބުނީމަ އޭނާ އިސްތިއުފާ ދޭން ޖެހެނީ. އެހެންވީމަ އެގޮތަށް މިކަން ރޭވިފައި އޮތީ. އެހެންވީމަ ރިޕޯޓުތައް އާންމުވާނެ." ޝުޖާއު ވިދާޅުވި އެވެ.
ޝުޖާއު ވިދާޅުވީ މި ސަރުކާރަށް ބިރަކަށް ވެގެން އުޅެނީ ކުރީގެ ރައީސް އަދި އިދިކޮޅު ލީޑަރު އަބްދުﷲ ޔާމީން ކަމަށާއި ނަމަވެސް އެމަނިކުފާނުގެ ނަންފުޅު އަންނަ އަހަރު ބާއްވާ ރިޔާސީ އިންތިހާބުގެ ވޯޓު ކަރުދާސްކޮޅުގައި އޮންނާނެ ކަމަށެވެ. އަދި މި ސަރުކާރަށް ބާކީ އޮތީ ބަރާބަރު 8 މަސް ދުވަސް ކަމަށާއި މި ވެރިކަން ނިންމާނެ ކަމަށް ޝުޖާއު ވިދާޅުވި އެވެ.
"ރައީސް އަބްދުﷲ ޔާމީން އަބްދުލްގައްޔޫމް ވެރިކަމަށް ނާންނާނެ އެއްވެސް ގޮތެއް އެމީހުންނަށް ނެހެދޭނެ." އޭނާ ވިދާޅުވި އެވެ.
އިދިކޮޅު ޕީޕީއެމްގެ ރިޔާސީ ޓިކެޓް ޔާމީނަށް އަރުވާފައިވާއިރު އެމަނިކުފާނުގެ މައްޗަށް އުފުލާފައިވާ ދައުވާތަކުގެ ޝަރީއަތްތައް މިހާރު ވެސް ކޯޓުގައި ދަނީ ހިނގަމުންނެވެ. އެގޮތުން ވ. އާރަށުގެ މައްސަލައިގައި ޔާމީންގެ މައްޗަށް އުފުލާފައިވާ މަނީ ލޯންޑްރިންގެ ދަޢުވާ އާއި، ރިޝްވަތު ޤަބޫލުކުރުމުގެ ކުށުގެ ދައުވާގެ ހުކުމް މި މަސްތެރޭގައި އިއްވާނެ ކަމަށް ބެލެވެ އެވެ. މި ދައުވާ ސާބިތުވެއްޖެ ނަމަ ޔާމީނަށް އަންނަ އަހަރު ބާއްވާ ރިޔާސީ އިންތިހާބުގައި ވާދަކުރުމުގެ ފުރުސަތު ގެއްލޭނެ އެވެ.