ހުޅުދޫގައި ހަދާ ސްޕޯޓްސް އެރީނާގެ އިތުރުން ދެން އަންނަ މުބާރާތަކަށް ހުޅުދޫ ފުޓްބޯޅަ ދަނޑު ޔޫތު މިނިސްޓްރީން ހަދައި ދޭނެކަމަށް ޔޫތު މިނިސްޓަރ މުހައްމަދު މަލީހް ޖަމާލް ވިދާޅުވެއްޖެއެވެ.
އައްޑޫ ފުޓްބޯޅަ ދަނޑު ހުޅުވުމަށް މިރޭ ބޭއްވި ރަސްމިއްޔާތުގައި މަލީހް ވިދާޅުވީ ހުޅުދޫގެ ޒުވާނުންނަށްޓަކައި އެރަށުގެ ބޯޅަ ދަނޑު މިނިސްޓްރީން ހަދައިދޭނެކަމަށެވެ.
އޭއެފްސީ ޗެލެންޖް ކަޕާއި ގުޅިގެން އައްޑޫއަށް އެދެވޭ ކުރިއެރުމެއް ހޯދައިދިނުމުގައި މަލީހް ފެއިލްވެފައިވާކަމަށް އެރަށުގެ މަޖްލިސް މެމްބަރު މުހައްމަދު ޝާހިދް (ޝާޑް) ވަނީ ވިދާޅުވެފައެވެ.
މަލީހް ވިދާޅުވީ މިއަހަރު ފަހުކޮޅު ހިތަދޫ ޒޯން ސްޓޭޑިއަމްގައި އިތުރު މުބާރާތެއް ބޭއްވުމަށް ތައްޔާރުވަމުން އަންނަ ކަމަށާއި، އައްޑޫ ސްޓޭޑިއަމްގައި ދާއިމީ ލައިޓްޖެހި އަންނަ އަހަރު މާޗް މަހުގެ ތެރޭ ފީފާ ވޯލްޑްކަޕް ކޮލިފައިން މެޗްތަކެއް ކުޅުމަށް ހަަމަޖެހިފައިވާ ކަމަށެވެ.
މަލީހް ވިދާޅުވީ މި ސަރުކާރުން ޒުވާނުންނަށް ހާއްސަ އިސްކަމެއް ދޭ ކަމަށާއި، އައްޑޫގެ ރަށްތަކުގައި ސްޕޯޓްސް އެރީނާ ތަކާއި، ފުޓްސަލް ދަނޑުތައް ވަރަށް އަވަހަށް ހެދިގެންދާނެކަމަށެވެ.
ޗެލެންޖް ކަޕާއި ގުޅިގެން ހުޅުދޫ އަދި މީދޫއަށް އެދެވޭ ކުރިއެރުމެއް ލިބިފައި ނުވާކަމަށް ބުނެ ޝާޑް ވަނީ މަލީހްެއަށް ވަރަށް ބޮޑަށް ފާޑު ވިދާޅުވެފައެވެ.