ފުވައްމުލަކު ގޮނޑުދޮށް ހިމާޔަތްކުރުމުގެ މަސައްކަތް ކުރިއަށް ދާގޮތް ނައިބު ރައީސް ފައިސަލް ނަސީމް ބައްލަވާލައްވައިފި އެވެ.
އުފަން ރަށުގެ އެ މަސައްކަތް ފައިސަލް ބައްލަވައިލެއްވީ އެ މަނިކުފާނު އެ ސިޓީ އަށް މިހާރު ކުރައްވަމުންގެންދަވާ ދަތުރުފުޅުގެ ތެރެއިންނެވެ. ފައިސަލް ބުރާސްފަތި ދުވަހު އައްޑު އަށް ވަޑައިގްނެވުމަށް ފަހު ފުވައްމުލަކަށް ވަޑައިގެންނެވީ ހަމަ އެ ދުވަހު އެވެ.
ފުވައްމުލަކުގެ ގޮނޑުދޮށް ހިމާޔަތްކުރުމުގެ މަސައްކަތް އިއްޔެ ބައްލަވާލައްވައި އެ މަސައްކަތުގެ މަސައްކަތުގެ އެންމެ ފަހުގެ މައުލޫމާތުތައް އޮޅުންފިލުއްވާފައިވެ އެވެ. މިއީ 300 މިލިއަން ރުފިޔާގެ މި މަޝްރޫއެކެވެ. އެގޮތުން ފުވައްމުލަކުގައި 2،650 މީޓަރުގެ ސީވޯލްއެއް ގާއިމްކުރާނެ އެވެ. އެ މަސައްކަތް ހަވާލުކޮށްފައި ވަނީ ޑެންމާކްގެ އެމްޓީ ހޯގާޑާ އެވެ.
Vice President @FaisalNasym visited the site of the coastal protection project in Fuvahmulah City and inquired about the progress. The MVR 300 million project encompasses the construction of 2,650 metres of coastline protection walls in the island. pic.twitter.com/kK8F130RUf
— The President's Office (@presidencymv) December 17, 2022
ފައިސަލް ވިދާޅުވީ މިއީ ފުވައްމުލަކު ރައްޔިތުންނަށް މުހިއްމު އަދި އެތައް ޒަމާނެއް ވަންދެން އުފުލަމުން ދިޔަ ތަކުލީފުތަކަށް ނިމުމެއް އަންނާނެ މަޝްރޫޢެއް ކަމަށެވެ.
"ރައީސް ވިދާޅުވެފައި ވަނީ ރައްޔިތުންނަށް މި ސަރަހައްދުގައި ހައިވޭއެއް ވެސް ހައްދަވައި ދެއްވާނެ ކަމަށް. އެއީ ވެސް އިތުރު ކުރިއެރުމެއް. ވަރަށް ބޮޑު ފަސޭހައެއް ވެގެންދާނެ،" އެ މަނިކުފާނު ވިދާޅުވި އެވެ. "އަޅުގަނޑަށް ހީވަނީ މިއާ އެކީ ފުވައްމުލަކު ރައްޔިތުންނަށް ވަރަށް ބޮޑު ލުޔެއް ލިބިގެންދާނެހެން. މިއީ ފުވައްމުލަކުގެ ތާރީހުގައި ފުވައްމުލަކު ރައްޔިތުންނަށް، ފުވައްމުލަކަށް ކޮށްދެވޭ ބޮޑު ކަމަކަށް ވާނެ."
ނައިބު ރައީސް ފުވައްމުލަކު ދަތުރު ނިންމަވާލެއްވުމަށް ފަހު މާލެ ވަޑައިގަންނަވަނަ ހަމަޖެހިފައި ވަނީ މާދަމަ އެވެ.