އޭއެފްސީ ޗެލެންޖް ކަޕް ގްރޫޕް ބީގެ ޓީމްތައް ތިބުމަށް ހަމަޖެހިފައިވާ ހެރެތެރެ ރިސޯޓްގެ އިންތިޒާމް ތަކާއި މެދު ޓީމްތަކުން ޝަކުވާކޮށްފި އެވެ.
މެޗްގެ ކުރިން މިއަދު ހެރެތެރޭގައި ބޭއްވި ނޫސްވެރިންގެ ބައްދަލުވުމުގައި ޕިލިޕީންސްގެ ކޯޗު ތޯމަސް ޑުލޭ ވަނީ ކެއުމުގެ އިންތިޒާމްތަކާއި މެދު ޝަކުވާކޮށްފައެވެ. މުލޭ ބުނީ އޭނާގެ ޓީމްގެ ކުޅުންތެރިންނަށް ކެއުމުގެ މައްސަލަ ކުރިމަތިވެފައިވާ ކަމަށެވެ. އަދި އެހެން ޓީމްތަކަށްވެސް މިކަން ކުރިމަތިވެފައިވާނެ ކަމަށް މުލޭ ބުންޏެވެ.
މުލޭ ބުނީ މީ ޝަކުވާ ކުރުމަށް ދައްކާ ވާހަކަތަކެއް ނޫން ކަމަށާއި އޭނާގެ ޓީމަށް ދިގު ދަތުރު ކުރުމާއި ކެއުމުގެ މައްސަލަ ކުރިމަތިވެފައިވާ ކަމަށެވެ.
ގްރޫޕް ބީގައި ހިމެނޭ ލާއޯސް، ތުރުކަމަނިސްތާން، އަފްޢާނިސްތާން އަދި ޕިލިޕީންސްގެ ޓީމް ހެރެތެރޭގައި ތިބުމަށް ހަމަޖެހިފައިވާއިރު އެންމެ ބޮޑު މައްސަލައެއް ކުރިމަތުވެފައިވަނީ ދަތުރުގެ ކަންކަމުގައިއެވެ.
ހެރެތެރެ އަކީ ބޮޑު ރިސޯޓަކަށްވެފައި ހުރިހާ ޓީމްތަކަށް އެތެރޭގެ ދަތުރު ހަމަޖައްސައި ދިނުމުގައި ގިނަ މައްސަލަތަކެއް ދަނީ ކުރިމަތިވަމުންނެވެ.
އެގޮތުން މީދޫ ދަނޑަށް ކުޅުންތެރިން އުފުލުމާއި، ހެރެތެރެއިން ހިތަދޫ ސްޓޭޑިއަމްއަށް ކުޅުންތެރިން ޕްރެކްޓިސްއަށް އުފުލުމުގައި ލަސްވުމުގެ ޝަކުވާ ޓީމްތަކުންވަނީ ކޮށްފައެވެ.
ކުޅިވަރާއި ބެހޭ ވަޒީރު މަލީހް ޖަމާލް ވިދާޅުވީ ރާއްޖޭން ޓީމްތަކަށް ލިބެމުން ދަނީ ވޯލްޑް ކަޕްގައި ބްރެޒިލްއިންވެސް ނުލިބޭ ވަރުގެ މެހުމާން ދާރީއެއްކަމަށެވެ.