އައްޑޫ ހަންކެޑެއިގެ ބްރިޖް ބަދަލުކުރުމުގެ މަސައްކަތުގެ ތެރެއިން އެތަނުގެ މަސައްކަތަށް ބޭނުންވާ އައިގާޑަތައް ފޭދޫން ބްރިޖް ސައިޓަށް ގެންދިއުމުގެ މަސައްކަތް ކުރަމުން އަންނާތީ ލިންކް ރޯޑް ބޭނުން ކުރުމުގައި ސަމާލުވާން ކައުންސިލުން އެދިއްޖެ އެވެ.
ކައުންސިލުން ނެރުނު އިއުލާނެއްގައި ބުނީ އައްޑޫ ލިންކް ރޯޑަކީ ދުވާލުގެ ވަގުތުތަކުގައި ބާރު ބޮޑު މަގެއް ކަމުން ރައްޔިތުންނަށް މަގު ބޭނުންކުރުމުގައި ދިމާވެދާނެ ދަތިކަން ކުޑަކުރުމަށްޓަކައި ޕްރީ ކާސްޓް ކޮށްފައިވާ އައިގާޑަތައް ފޭދޫން ބްރިޖް ސައިޓަށް ގެނައުމުގެ މަސައްކަތް ރޭގަނޑު 9:00 އިން ފެށިގެން ފަތިހު 6:00 އާ ހަމައަށް ކުރިއަށް ގެންދަން ހަމަޖެހިފައިވާ ކަމަށެވެ.
އެހެންވެ އެ ވަގުތުގެ ތެރޭގައި މަގު ބޭނުންކުރާ އިރު ރައްޔިތުންގެ ސަމާލުވާން އެދޭ ކަމަށް ބުންޏެވެ.
"ގާތްގަޑަކަށް ސާޅީސް ވަރަކަށް ޓަނުގެ ބަރުދަން ހުރި ތަނބުތައް އުފުލުމުގެ މަސައްކަތް ފެށިގެން ކުރިއަށްދާ ނއިރު ރޭގަޑުގެ އެ ގަޑިތަކުގައި ލިންކްރޯޑް އިން ދަތުރުކުރާ އެންމެހާ ފަރާތްތަކުން އުޅަނދަށް ސަމާލުވެގެން ދަތުރުފަތުރުކުރުމަށް އިލްތިމާސް ކުރަމެވެ." ކައުންސިލުން ބުންޏެވެ.
އެ ތަކެތި އުފުލާ ވެހިކަލްދަތުރުކުރާ ރޫޓް ހިމެނޭ ޗާޓެއް ވެސް ކައުންސިލުން އާންމުކޮށްފައިވެ އެވެ.
ހަންކެޑެ ބްރިޖް ބަދަލުކުރުމުގެ މަސައްކަތުގެ ތެރެއިން އެ ބްރިޖާއި މަރަދޫގެ ބޮޑުމަގުގެ ކޮޅުން ގުޅައިލުމުގެ ތައްޔާރީތައް މިހާރު އަންނަނީ ވަމުންނެވެ.